ក្រុមអ្នកទេសចរជនជាតិថៃ ប្រមាណជាង៣០នាក់ ជាមួយនឹងម៉ូតូធំ ជាង២០គ្រឿង ចេញដំណើរពីទីក្រុងបាងកក មកទស្សនាប្រាសាទអង្គរវត្តក្នុងខេត្តសៀមរាប រយៈពេល២ថ្ងៃ ( ថ្ងៃទី២២ និងថ្ងៃទី២៣ ខែវិច្ឆិកា ឆ្នាំ២០១៩ ) បានបង្ហាញពីការចូលរួមផ្សព្វផ្សាយ តំបន់ទេសចរណ៍ក្នុងខេត្តសៀមរាប ក៏ដូចជាវិស័យទេសចរណ៍ក្នុងប្រទេសកម្ពុជាផងដែរ។
តាមការឲ្យដឹងពី លោក ង៉ូវ សេងកាក់ ប្រធានមន្ទីរទសចរណ៍ខេត្តសៀមរាប នេះជាលើកទី៣ហើយ ដែលក្រុមអ្នកទេសចរថៃជិះម៉ូតូធំ ធ្វើដំណើរឆ្លងដែនចូលមកទស្សនាកម្ពុជា ក៏ប៉ុន្តែនេះគឺជាលើកទី១ សម្រាប់ការចូលមកទស្សនាអង្គរ-សៀមរាប ដែលពួកគេបានដាក់ប្រធានបទនៃដំណើរកំសាន្តនេះថា “ថៃ-កម្ពុជា ក្រុមម៉ូតូធំជួបជុំនៅអង្គរ-សៀមរាប ( BIKE MEET Siem Reap ឬ Angkor BIKERS )”។
លោកប្រធានមន្ទីរទសចរណ៍ខេត្ត បានបន្តថា វត្តមានក្រុមអ្នកទេសចរថៃជិះម៉ូតូធំនេះ ក៏ជាការឆ្លើយតបរបស់ភាគីថៃ បន្ទាប់ពីភាគីកម្ពុជា បានធ្វើដំណើរទស្សនកិច្ចឆ្លងដែនទៅកាន់បណ្តាខេត្តមួយចំនួនរបស់ប្រទេសថៃ នៅជាប់ព្រំដែននៃប្រទេសកម្ពុជា កាលពីក្នុងអំឡុងសប្តាហ៍ទី៤ នៃខែតុលាកន្លងទៅ របស់ក្រុម Siem Reap Caravan Tour To Thailand ដែលរៀបចំឡើងដោយក្លឹបសមាគមទេសចរណ៍សៀមរាប ( STC ) ដើម្បីពង្រឹងកិច្ចសហប្រតិបត្តិការលើវិស័យទេសចរណ៍ បង្ហាញសក្តានុពលទេសចរណ៍កម្ពុជា និងដើម្បីបង្ហាញថា ទេសចរណ៍ឆ្លងដែនមកកាន់កម្ពុជា មិនមានរបាំងឧបស័គ្គ នោះឡើយ ។
អ្នកដឹកនាំដំណើរកំសាន្តនៃក្រុមម៉ូតូធំថៃ លោក យោធិន ដូរ៉ាក់ខ្លាង បានរៀបរាប់ពីអារម្មណ៍របស់ខ្លួនថា ៖ បើទោះបី នេះជាលើកទី១ ជាមួយរយៈពេលដ៏ខ្លី ដែលក្រុមរបស់លោក បានឆ្លងដែនចូលមកទស្សនាសៀមរាប-អង្គរ ក៏ប៉ុន្តែវាគឺជាកំណត់ត្រានៃអនុស្សាវរីយ៍ដ៏មានន័យ នៅលើដែនដីអច្ឆរិយៈ បេតិកភណ្ឌពិភពលោកមួយនេះ។ លោកគិតថា អង្គរវត្តជាស្ថាបត្យកម្មដ៏កំពូលនៃមនុស្សជាតិ វាពិតជាមិនអាចរាប់ទំព័រនៃការចងចាំបាននោះបានឡើយ ។ ក្រុមរបស់លោក ពិតជា មានភាពកក់ក្តៅ និង រីករាយខ្លាំងណាស់ សម្រាប់ដំណើរកំសាន្តលើកនេះ ។
គួរបញ្ជាក់ដែរថា ការទទួលស្វាគមន៍ ដំណើរកំសាន្តឆ្លងដែនលើកទី១ នៃក្រុមម៉ូតូធំរបស់ថៃ មកកាន់អង្គរ-សៀមរាបនេះ បានរៀបចំឡើងដោយមន្ទីរទេសចរណ៍ សហការជាមួយក្លឹបសមាគមទេសចរណ៍សៀមរាប និងមានការគាំទ្រដោយក្រសួងទេសចរណ៍ អាជ្ញាធរខេត្តសៀមរាប និងអាជ្ញាធរជាតិអប្សរាផងដែរ ៕
អត្ថបទ និង រូបថត ៖ លោក ងិន គឹមឡឹង
កែសម្រួលអត្ថបទ ៖ លោក សេង ផល្លី
