អ្នករស់នៅជាមួយមេរោគអេដស៍ចំនួន៣០៥នាក់ ក្នុងនោះចំនួន ២២៦នាក់ មកពី១២សង្កាត់ក្នុងក្រុងសៀមរាប , ចំនួន ៤៨នាក់ មកពី១៣ឃុំក្នុងស្រុកពួក និង ចំនួន៣១នាក់ មកពី៧ឃុំក្នុងស្រុកប្រាសាទបាគង ទទួលបានអំណោយមនុស្សធម៌សាខាកាកបាទក្រហមកម្ពុជាខេត្តសៀមរាប កាលពីព្រឹកថ្ងៃទី២៣ ខែវិច្ឆិកា ឆ្នាំ ២០១៩នេះ ក្រោមអធិបតីភាពលោកជំទាវ ទាង អេង ទៀសីហា អនុប្រធានគណៈកម្មាធិការកាកបាទក្រហមកម្ពុជាខេត្ត តំណាងដ៏ខ្ពង់ខ្ពស់ឯកឧត្ដម ទៀ សីហា ប្រធានគណៈកម្មាធិការកាកបាទក្រហមកម្ពុជាខេត្ត ដែលក្នុងមួយនាក់ទទួលបានភួយ១ , មុង១ , សារុង១ , ក្រមា ១ , ទឹកដោះគោខាប់២កំប៉ុង , អាវយឺត២ , ស្ករស ១ គីឡូក្រាម , មី១កេស , សាប៊ូក្រអូប២ដុំ , ត្រីខ១យួរ , អង្ករ ៣០ គីឡូក្រាម, ទឹកត្រី១យួរ និង ថវិកា៥ម៉ឺនរៀល ។
មានប្រសាសន៍សំណេះសំណាលក្នុងឱកាសនោះ លោកជំទាវ ទាង អេង ទៀសីហា បានពាំនាំនូវការផ្ដាំផ្ញើសាកសួរសុខទុក្ខពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលសម្តេចតែងតែយកចិត្តទុកដាក់គិតគូរខ្ពស់ចំពោះសុខទុក្ខ បងប្អូនប្រជាពលរដ្ឋដែលងាយរងគ្រោះ និងរងគ្រោះ ដោយសារឧបទ្ទវហេតុផ្សេងៗនៅទូទាំងព្រះរាជាណាចក្រកម្ពុជា ជាពិសេសក្នុងគោរម្យងារជាឥស្សរជនឆ្នើមថ្នាក់ជាតិ នៃវេទិកាភាពជាអ្នកដឹកនាំប្រចាំតំបន់អាស៊ី-ប៉ាស៊ីហ្វិក ឆ្លើយតបមេរោគ-ជំងឺអេដស៍ និងការអភិវឌ្ឍនៅកម្ពុជានោះ សម្តេចកិត្តិព្រឹទ្ធបណ្ឌិត តែងតែមានសន្តានចិត្តប្រោសប្រណី និងគិតគូរចំពោះទុក្ខលំបាករបស់បងប្អូនប្រជាពលរដ្ឋរងគ្រោះ ដោយសារមេរោគអេដស៍ និងជំងឺអេដស៍ផងដែរ ។
លោកជំទាវ ទាង អេង ទៀសីហា មានប្រសាសន៍ទៀតថា ក្នុងទិវាពិភពលោកប្រយុទ្ធនឹងជំងឺអេដស៍១ធ្នូ ជារៀងរាល់ឆ្នាំសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន តែងតែផ្ញើសារអប់រំសុខភាព ដល់ប្រជាពលរដ្ឋកម្ពុជាគ្រប់រូប រួមមាន៖ទី១. សូមបងប្អូនជនរួមជាតិទាំងអស់ ពិសេសក្មួយៗជាយុវជន យុវនារី ត្រូវស្វែងយល់ឲ្យបានប្រចាំនូវចំណេះដឹង ស្ដីពីការបង្ការការចម្លងមេរោគអេដស៍ ដើម្បីបង្ការខ្លួនយើង គ្រួសារយើង សហគមន៍យើង និងសង្គមជាតិពីការរាលដាលនៃមេរោគអេដស៍ , ២. ប្រជាពលរដ្ឋដែលបានប្រព្រឹត្ត ឬសង្ស័យថា ខ្លួនបានប្រឈម និងការឆ្លងមេរោគអេដស៍ សូមប្រញាប់រួសរាន់ស្វែងរកសេវផ្តល់ប្រឹក្សា និងធ្វើតេស្តឈាមរកមេរោគអេដស៍ដោយស្ម័គ្រចិត្តការសម្ងាត់ នៅតាមសេវាសាធារណៈ សេវាអង្គការសង្គមស៊ីវិល សេវាឯកជន។ល។ ដើម្បីឆាប់បានដឹងពីស្ថានភាពផ្ទុកមេរោគអេដស៍ ដែលអាចប្រើប្រាស់ក្នុងការសម្រេចចិត្តទទួលបានសេវាថែទាំ និងព្យាបាលបន្តបានទាន់ពេលវេលា , ៣. ស្ត្រីមានផ្ទៃពោះទាំងអស់ សូមប្រញាប់រួសរាន់ទៅស្វែងរកសេវាថែទាំ និងពិនិត្យផ្ទៃពោះឲ្យបានត្រឹមត្រូវ និងទៀងទាត់តាមការណែនាំរបស់បុគ្គលិកពេទ្យ ដើម្បីទប់ស្កាត់ការចម្លងមេរោគអេដស៍ពីម្តាយទៅទារក , ៤. ត្រូវបញ្ឈប់ជាដាច់ខាតនូវ គ្រប់ទម្រង់រើសអើង ឬមាក់ងាយទៅលើអ្នកផ្ទុកមេរោគអេដស៍និងជំងឺអេដស៍ ព្រោះជាអំពើផ្ទុយទៅនឹងច្បាប់ស្តីពីការបង្ការ និងទប់ស្កាត់ការរីករាលដាលមេរោគអេដស៍ និងជំងឺអេដស៍នៅកម្ពុជា និង ៥.ប្រជាពលរដ្ឋទាំងឡាយដែលមានមុខរបរ ឬការប្រព្រឹត្តប្រឈមខ្ពស់នឹងការឆ្លងមេរោគអេដសំ សូមប្រើប្រាស់ស្រោមអនាម័យឲ្យបាន១០០% នៅរៀងរាល់ពេលដែលមានទំនាក់ទំនងរួមភេទ។
លោកជំទាវ ទាង អេង ទៀ សីហា មានប្រសាសន៍បន្ថែមថា៖ ជាការពិតណាស់កាកបាទក្រហមកម្ពុជាតែងតែចាត់តំណាងចុះសួរសុខទុក្ខបងប្អូន និងផ្តល់ប្រឹក្សាលើកទឹកចិត្ត ឲ្យបន្តយកចិត្តទុកដាក់ថែទាំសុខភាពទៀងទាត់ ក៏ដូចជាបានផ្តល់អំណោយមនុស្សធម៌ ជួយសង់លំនៅដ្ឋានសមរម្យ និងផ្តល់អណ្តូងទឹកស្អាតដល់គ្រួសារក្រីក្រដោយជំងឺនេះទៀតផង ពិសេសសាខាកាកបាទក្រហមកម្ពុជាខេត្តសៀមរាបយើង ដោយមានកិច្ចសហការជាមួយសុខាភិបាល និងអាជ្ញាធរមូលដ្ឋាន បានចុះសាកសួរសុខទុក្ខ និងផ្តល់អំណោយមនុស្សធម៌ដល់បងប្អូនដែលរងគ្រោះដោយជំងឺនេះជាបន្តបន្ទាប់ ដោយយើងទាំងអស់គ្នា តែងចាត់ទុកថា ក្នុងចំណោមអ្នកងាយរងគ្រោះបំផុតដែលកាកបាទក្រហមយកចិត្តទុកដាក់នោះ មានចាស់ជរាគ្មានទីពឹង អ្នកជំងឺរ៉ាំរ៉ៃ ជនពិការ ស្ត្រីមេម៉ាយក្រីក្រមានកូនច្រើនក្នុងបន្ទុក កុមារកំព្រាគ្រួសារក្រីក្រ ក្នុងនោះក៏មានអ្នកជំងឺអេដស៍ផងដែរ ។
បើតាមរបាយការណ៍របស់ លោកវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាលខេត្ត និងជាសមាជិកសគណៈកម្មាធិការកាកបាទក្រហមសាខាខេត្តសៀមរាប បានបង្ហាញថា៖តាមរយៈសកម្មភាពផ្តល់ប្រឹក្សាធ្វើតេស្តឈាមរកមេរោគអេដស៍ដោយស្ម័គ្រចិត្ត លាក់ការណ៍សំងាត់និងឥតបង់ប្រាក់ ចាប់ពីឆ្នាំ២០១៤ សេវាផ្តល់ប្រឹក្សានិងធ្វើតេស្តឈាមរកមេរោគអេដស៍ត្រូវបានដាក់ឱ្យដំណើរការគ្រប់ទីកន្លែងតាមសេវាមន្ទីរពេទ្យបង្អែក បណ្ឌលសុខភាព ប៉ុស្តិ៍សុខភាពនិងតាមសហគមន៍សម្រាប់ក្រុមតាមគោលដៅប្រឈមមុខខ្ពស់។ជាលទ្ឋផលនៅឆ្នាំ២០១៩អតិថិជនមកទទួលការផ្តល់ប្រឹក្សានិងធ្វើតេស្តឈាមចំនួន៥១.១១២នាក់ក្នុងនោះអ្នកមានលទ្ឋផលវិជ្ជមាន៣៨៧នាក់ ៕
អ្នករស់នៅជាមួយមេរោគអេដស៍ចំនួន៣០៥នាក់ ក្នុងខេត្តសៀមរាប ទទួល…..
អ្នករស់នៅជាមួយមេរោគអេដស៍ចំនួន៣០៥នាក់ ក្នុងខេត្តសៀមរាប ទទួលបានអំណោយមនុស្សធម៌សាខាកាកបាទក្រហមកម្ពុជាខេត្តសៀមរាប#ព័ត៌មានខេត្តសៀមរាប
Posted by ទូរទស្សន៍ជាតិខេត្តសៀមរាប – TV Siem Reap on Saturday, November 23, 2019
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត