ផ្លូវបេតុងចំនួន៥ខ្សែ មានប្រវែងសរុប៣,៩៩០ម៉ែត្រ ស្ថិតក្នុងក្រុងសៀមរាប រួមមាន ៖ ១- ផ្លូវបេតុង និងដាក់លូបណ្តោយផ្លូវ១ម៉ែត្រ នៅភូមិតាវៀន ពីក្រោយផ្សារលើកាត់ផ្ទះតាអុច ដល់ផ្លូវវាងក្រុង , ២- ផ្លូវបេតុង និងដាក់លូប្រអប់បណ្តោយផ្លូវ ៣,៥ម៉ែត្រ នៅភូមិតាវៀន ពីផ្លូវ៧មករា ចំណុចហាងលក់គ្រឿងសំណង់ លី ហាំងសេង ដល់ផ្លូវគ្លីនិក នាគទេព , ៣- ផ្លូវបេតុង និងដាក់លូបណ្តោយផ្លូវ១ម៉ែត្រ នៅភូមិចុងកៅស៊ូ ពីផ្លូវជាតិលេខ៦ ចំណុចភ្លើងស្តុបស្មាញលីង ដល់ផ្លូវផ្ទះតាអុច , ៤- ផ្លូវបេតុង និងដាក់លូបណ្តោយផ្លូវ ០,៨ម៉ែត្រ នៅភូមិតាវៀន ពីផ្លូវក្រោយផ្សារលើ ដល់ផ្លូវវាងក្រុង ចំណុចតារាងបាល់ទាត់ជន្លង់ និង ៥- ផ្លូវបេតុង និងដាក់លូបណ្តោយផ្លូវ ០,៨ម៉ែត្រ ស្ថិតនៅភូមិតាវៀន ពីភោជនីយដ្ឋានស្វាយមាស ដល់ផ្លូវវាងក្រុង ត្រូវបានប្រកាសបើកការដ្ឋានសាងសង់ជាផ្លូវការហើយ កាលពីព្រឹកថ្ងៃទី២៣ ខែវិច្ឆិកា ឆ្នាំ២០១៩នេះ ក្រោមអធិបតីភាព លោក ពិន ប្រាកដ អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម ទៀ សីហា អភិបាលនៃគណៈអភិបាលខេត្ត និងមានការអញ្ជើញចូលរួមពីសំណាក់លោក លោកស្រី ជានាយករដ្ឋបាល ទីចាត់ការ អង្គភាពចំណុះសាលាខេត្ត , ថ្នាក់ដឹកនាំមន្ទីរ អង្គភាពជុំវិញខេត្ត អាជ្ញាធរមូលដ្ឋាន និងប្រជាពលរដ្ឋរស់នៅអមសងខាងផ្លូវ ។
លោក ពិន ប្រាកដ អភិបាលរងខេត្តសៀមរាប មានប្រសាសន៍ថា ឆ្នាំ២០១៩នេះ រដ្ឋបាលខេត្ត បានលើកគម្រោថវិកា សាងសង់ផ្លូវចំនួន១៧គម្រោងក្នុងក្រុងសៀមរាប ហើយផ្លូវទាំង ៥ខ្សែដែលប្រកាសបើកការសាងសង់នៅពេលនេះ គឺស្ថិតក្នុងចំណោមផ្លូវទាំង ១៧ខ្សែនេះផងដែរ ខណៈកន្លងមក ការយឺតយ៉ាវនៃការសាងសង់ និង ជួសជុលឡើងវិញនូវផ្លូវក្នុងសៀមរាប គឺដោយសាររដ្ឋបាលខេត្ត មិនទាន់ទទួលបាននូវកញ្ចប់ថវិកាក្នុងសាងសង់ ការជួសជុល និង ការថែទាំនៃផ្លូវថ្នល់ដែលបានលើកគម្រោងរួចមកនោះ ប៉ុន្តែពេលនេះ រដ្ឋបាលខេត្តបាលទទួលកញ្ចប់ថវិកាទាំងអស់នេះហើយ ដូច្នេះសាងសង់ផ្លូវចំនួន១៧គម្រោងក្នុងក្រុងសៀមរាប នឹងដំណើរការចាប់ពេលនេះតទៅ ។
លោក ពិន ប្រាកដ មានប្រសាសន៍បន្ថែមថា ខេត្តសៀមរាបជាខេត្តទេសចរណ៍ធំជាងគេ ក្នុងចំណោមខេត្តទាំងអស់នៃប្រទេសកម្ពុជា ដូច្នេះបញ្ហាផ្លូវថ្នល់ ជាបញ្ហាអាទិភាពខ្ពស់បំផុតជាងគេ ដែលរដ្ឋបាលខេត្ត ជាពិសេស ឯកឧត្តម ទៀ សីហា អភិបាលខេត្តសៀមរាប តែងតែយកចិត្តទុកខ្លាំងណាស់ ព្រោះថា ក្រៅពីជួយសម្រួលដល់កាធ្វើដំណើររបស់ភ្ញៀវទេសចរនោះ ផ្លូវថ្នល់នេះ វាជាផ្នែកមួយយ៉ាងសំខាន់បំផុត សម្រាប់បម្រើឲ្យការប្រកបមុខរបរ ដើម្បីបង្កើនជីវភាពរស់នៅប្រចាំថ្ងៃរបស់បងប្អូនប្រជាពលរដ្ឋយើងផងដែរ ។
ព័ត៌មានជាតិ ថ្មីៗ
លោក ពិន ប្រាកដ មានប្រសាសន៍បន្ថែមទៀតថា កន្លងមកឯកឧត្តម ទៀ សីហា តែងតែបានយកចិត្តទុកដាក់ និង តាមដានជាប់ជាប្រចាំចំពោះមតិ យោបល់របស់បងប្អូនប្រជាពលរដ្ឋលើបញ្ដាញទំនាក់ទំនងសង្គម ហ្វេសប៊ុក និង តែងតែយកចិត្តទុកដាក់ដោះស្រាយនូវសំណូមពររបស់ប្រជាពលរដ្ឋតាមរយៈការសម្ដែងមតិ យោបល់ ជុំវិញបញ្ហាធ្វើដំណើរ ដែលកន្លងមកផ្លូវមួយចំនួនមានការខូចខាតពិបាកធ្វើដំណើរ ហើយឯកឧត្តមអភិបាលខេត្តសៀមរាប តែងតែទទួលដោយការពេញចិត្តចំពោះបញ្ហាទាំងអស់នេះ ដើម្បីរិះរកវិធានការដោះស្រាយ ព្រោះថា ផ្លូវថ្នល់ទាំងអស់នេះ រដ្ឋបាលខេត្តបានលើកគម្រោងជួសជុលសម្រាប់ឆ្នាំ២០១៩នេះ ប៉ុន្តែពេលនេះ រដ្ឋបាលខេត្តបាលទើបទទួលកញ្ចប់ថវិកាទាំងអស់នេះនៅចុងឆ្នាំ២០១៩ ហើយចំពេលរដូវគ្មានភ្លៀងធ្លាក់ផង ហើយយើងក៏អាចដំណើរការដោយគ្មានឧបសគ្គ ដូច្នេះ ផ្លូវចំនួន១៧គម្រោងក្នុងក្រុងសៀមរាប យើងនឹងធ្វើបានរួចរាល់នៅពេលខាងមុខដ៏ខ្លីនេះ ពិសេសសូមបងប្អូន ដែលរស់នៅតាមដងផ្លូវ ដែលកំពុងដំណើរការសាងសង់ មេត្តាយោគយល់ក្នុងអំឡុងពេលដំណើរការសាងសង់ ដែលអាចបង្កការលំបាកធ្វើដំណើរ ការកកស្ទះចរាចរ និងផលប៉ះពាល់បរិស្ថានផងដែរ ៕
អត្ថបទ ៖ លោក លីវ សាន្ត
រូបថត ៖ លោក គឿន វេត
