លោក ឡុង កុសល អ្នកនាំពាក្យរបស់អាជ្ញាធរជាតិអប្សរា បានលើកឡើងថា បន្ទាប់ពីទទួលបានការអនុញ្ញាតឲ្យជួសជុល កែលម្អគេហដ្ឋាន ឬរុះរើផ្ទះចាស់សាងសង់ផ្ទះថ្មីជំនួស អ្នកស្រុកបានធ្វើការជួសជុល កែលម្អគេហដ្ឋាន ឬរុះរើផ្ទាស់ចាស់សាងសង់ផ្ទះថ្មីជំនួស ខុសពីលិខិតអនុញ្ញាត ដែលធ្វើឱ្យសំណង់របស់ពួកគេក្លាយជាសំណង់ខុសច្បាប់ទៅវិញ ព្រោះថា សំណង់ខុសច្បាប់ជាច្រើនខ្នង បាននឹងកំពុងសង់ក្នុងរូបភាពស្របច្បាប់ បន្ទាប់ពីប្រជាពលរដ្ឋរស់នៅក្នុងរមណីយដ្ឋានអង្គរទទួលបានលិខិតអនុញ្ញាតសាងសង់ស្របច្បាប់ពីអាជ្ញាធរជាតិអប្សរា។
លោក ឡុង កុសល បានបញ្ជាក់ទៀតថា ការរៀបចំលំនៅដ្ឋានក្នុងតំបន់រមណីយដ្ឋានបេតិកភណ្ឌពិភពលោកអង្គរ គឺត្រូវឱ្យស្រប និងជាផ្នែកមួយនៃការលើកតម្លៃបេតិកភណ្ឌ ដូច្នេះរាល់ការស្នើសុំសាងសង់ទាំងអស់ ចាំបាច់ត្រូវសុំច្បាប់ជាមុន និងចាំបាច់ត្រូវធ្វើការសាងសង់ស្របតាមខ្លឹមសារដែលបានអនុញ្ញាត ដូច្នេះក្នុងករណីប្រជាពលរដ្ឋមានបំណងស្នើសុំជួសជុល កែលម្អគេហដ្ឋាន សង់របង រោងគោ រោងមាន់ បង្គន់អនាម័យឬតម្រូវការផ្សេងៗ ដែលមានលក្ខណៈជាប្រភេទសំណង់ស្រាល សូមបងប្អូនប្រជាពលរដ្ឋអាចធ្វើការទាក់ទងមកក្រុមការងារសហគមន៍តាមគោលដៅភូមិនីមួយៗតាមរយៈភូមិឃុំ/សង្កាត់ ។
លោក ឡុង កុសល បញ្ជាក់បន្ថែមថា ក្នុងករណីប្រជាពលរដ្ឋមានបំណងស្នើសុំរុះរើផ្ទះចាស់ សាងសង់ផ្ទះថ្មីជំនួសនោះពួកគាត់អាចអញ្ជើញមកដាក់ពាក្យស្នើសុំនៅមជ្ឈមណ្ឌលសេវាកម្មរបស់អាជ្ញាធរជាតិអប្សរា ឬក៏នៅច្រកចេញចូលតែមួយរបស់ស្រុកពួក ក្រុងសៀមរាប និងសាលាខេត្តសៀមរាប ហើយរាល់ការចុះពិនិត្យបច្ចេកទេស និងការផ្តល់លិខិតអនុញ្ញាត គឺមិនមានបង់ប្រាក់ទេ ដូច្នេះ អាជ្ញាធរជាតិអប្សរា ស្នើសុំដល់ប្រជាពលរដ្ឋដែលកំពុងរស់នៅក្នុងតំបន់រមណីយដ្ឋានអង្គរ ត្រូវដាក់ពាក្យសុំសាងសង់មកអាជ្ញាធរជាតិអប្សរា ដោយត្រូវកំណត់ទ្រង់ទ្រាយនិងទំហំឱ្យបានច្បាស់លាស់ និងត្រូវធ្វើការជួសជុលឬសាងសង់ដោយគោរពទៅតាមអ្វីដែលបានស្នើសុំនោះ ជៀសវាងធ្វើឱ្យសំណង់ទាំងនោះក្លាយជាសំណង់ខុសច្បាប់ក្នុងពេលជួសជុលឬសាងសង់ព្រោះប្រឈមនឹងមោឃភាពលិខិតអនុញ្ញាត ការរើរុះចេញ និងវិធានការច្បាប់៕
អត្ថបទ និង រូបថត ៖ លោក អ៊ិន សីហរិទ្ធ
កែសម្រួលអត្ថបទ ៖ លោក លីវ សាន្ត
