នៅថ្ងៃទី២១ ខែធ្នូ ឆ្នាំ២០២៥ លោក លី សារី អភិបាលរងខេត្តសៀមរាប និងសប្បុរសជនមកពីរាជធានីភ្នំពេញ បានអញ្ជើញចុះសួរសុខទុក្ខ និងនាំយកអំណោយចែកជូនបងប្អូនជនភៀសសឹកចំនួន ៥៩២ គ្រួសារ ដែលកំពុងស្នាក់នៅក្នុងវត្តបល្ល័ង្ករង្សី ស្រុកពួក ខេត្តសៀមរាប ដើម្បីជួយសម្រាលទុក្ខលំបាក និងជួយកាត់បន្ថយបន្ទុកជីវភាពរស់នៅរបស់បងប្អូនជនភៀសសឹក ក្នុងស្ថានភាពដ៏លំបាកបច្ចុប្បន្ននេះ។
លោក លី សារី បានមានប្រសាសន៏ថា ការចែករំលែកអំណោយលើកនេះ គឺជាការបង្ហាញពីស្មារតី “ខ្មែរជួយខ្មែរ” ក្នុងគ្រាលំបាក ដើម្បីជួយសម្រួលដល់ជីវភាពប្រចាំថ្ងៃរបស់បងប្អូន ដែលមកស្នាក់នៅក្នុងភូមិសាស្ត្រខេត្តសៀមរាប ព្រមទាំងបង្ហាញពីសាមគ្គីភាព និងមនុស្សធម៌ដ៏ថ្លៃថ្លា ដែលជាកម្លាំងចិត្តដ៏សំខាន់ ក្នុងការឆ្លងកាត់គ្រាលំបាកនេះជាមួយគ្នា។
លោកក៏បានអំពាវនាវឲ្យបងប្អូនជនភៀសសឹក យកចិត្តទុកដាក់លើអនាម័យ និងបរិស្ថានជុំវិញកន្លែងស្នាក់នៅ ដោយត្រូវទុកដាក់សំរាមឲ្យបានត្រឹមត្រូវ ដើម្បីជៀសវាងសត្វល្អិត និងគ្រោះថ្នាក់ផ្សេងៗ ដែលអាចបង្កផលប៉ះពាល់ដល់សុខភាព ជាពិសេសកុមារតូចៗ។ លោកបានជំរុញដល់អាជ្ញាធរមូលដ្ឋាន និងកងកម្លាំងប្រដាប់អាវុធ បន្តរក្សាសណ្ដាប់ធ្នាប់ សន្តិសុខ និងសុវត្ថិភាព ជូនដល់បងប្អូនជនភៀសសឹក ដែលកំពុងស្នាក់នៅក្នុងមូលដ្ឋានរបស់ខ្លួន។
ក្នុងឱកាសដដែលនេះ លោកអភិបាលរងខេត្ត ក៏បានថ្លែងអំណរគុណយ៉ាងជ្រាលជ្រៅ ដល់លោក សេន រិទ្ធ និងលោកស្រី ប៊ុន សេដា ដែលបាននាំយកអំណោយមកចែកជូនបងប្អូនជនភៀសសឹក តាមរយៈមន្ទីរពាណិជ្ជកម្មខេត្តសៀមរាប ដោយបង្ហាញពីទឹកចិត្តសប្បុរស និងការចូលរួមជួយគ្នា ក្នុងស្មារតីរួបរួមជាធ្លុងមួយ ក្នុងកាលៈទេសៈដ៏លំបាកនេះ។
សូមជម្រាបថា អំណោយដែលបានចែកជូនគ្រួសារនីមួយៗ រួមមាន អង្ករ ទឹកសុទ្ធ តង់ ម្សៅទឹកដោះគោ ទឹកត្រី ទឹកស៊ីអ៊ីវ ពងទា គ្រឿងទេសមួយកញ្ចប់ និងថវិកាមួយចំនួន៕
អត្ថបទ និងរូបភាព៖ លោក ឆាន ញា
កែសម្រួល៖ លោក អ៊ុន ណារាជ្យ
