នៅថ្ងៃទី២១ ខែធ្នូ ឆ្នាំ២០២៥ លោកជំទាវ ដាំ ដារីនី រដ្ឋលេខាធិការក្រសួងការពារជាតិ បានដឹកនាំក្រុមការងារចុះសួរសុខទុក្ខ និងនាំយកអំណោយដ៏ថ្លៃថ្លារបស់សម្ដេចធិបតី ហ៊ុន ម៉ាណែត នាយករដ្ឋមន្ត្រី និងលោកជំទាវបណ្ឌិត ចែកជូនដល់បងប្អូនជនភៀសសឹកចំនួន ៣៤៥គ្រួសារ ដែលកំពុងស្នាក់នៅវត្តខេមរាសាមគ្គីមុន្មីរង្សី ស្រុកពួក ខេត្តសៀមរាប ដើម្បីជួយសម្រួលជីវភាពរស់នៅក្នុងអំឡុងពេលស្ថានភាពដ៏លំបាកនេះ ដោយពិធីនេះ មានការចូលរួមពី លោក សំកុល សុចិត្រា និង លោក លី សារី អភិបាលរងខេត្ត ផងដែរ។
ថ្លែងក្នុងឱកាសនោះ លោកជំទាវ ដាំ ដារីនី បាននាំយកនូវការផ្ដាំផ្ញើសួរសុខទុក្ខពីសំណាក់ សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន និង សម្តេចមហាបវរធិបតី ហ៊ុន ម៉ាណែត លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ដែលតែងតែគិតគូរយកចិត្តទុកដាក់ពីសុខទុក្ខ និងជីវភាពរស់នៅរបស់បងប្អូនទាំងអស់ ដែលជាជនភៀសសឹក ក៏ដូចជាវីរៈកងទ័ព កងកម្លាំងគ្រប់ភេទ ដែលកំពុងបំពេញភារកិច្ចការពារជាតិនៅតាមបន្ទាត់ព្រំដែន។
លោកជំទាវបណ្ឌិត បានបញ្ជាក់ថា សិល្បៈករ កីឡាករ អាជ្ញាធរ កងកម្លាំងសមត្ថកិច្ច គ្រប់លំដាប់ថ្នាក់ ប្រជាពលរដ្ឋក្នុង និងក្រៅប្រទេសទាំងអស់ បានរួមគ្នាជាកម្លាំងសាមគ្គីដ៏រឹងមាំ ក្នុងស្មារតីរួមសាមគ្គី «ខ្មែរតែមួយ» ដើម្បីប្រឆាំងនឹងសត្រូវឈ្លានពាន ការពារបូរណភាពទឹកដី និងដែនអធិបតេយ្យភាពរបស់យើងពីចោរសៀម។ ជាមួយគ្នានេះ លោកជំទាវបណ្ឌិត បានអំពាវនាវដល់បងប្អូនជនភៀសសឹក និងប្រជាពលរដ្ឋទាំងអស់ សូមជឿទុកចិត្តលើការដឹកនាំដ៏ឆ្លាតវៃរបស់ប្រមុខរាជរដ្ឋាភិបាល ដែលកំពុងខិតខំប្រឹងប្រែងយ៉ាងសកម្ម ក្នុងការស្វែងរកសុខសន្តិភាពជូនដល់បងប្អូនប្រជាពលរដ្ឋ និងការពារដែនអធិបតេយ្យភាព ព្រមទាំងបូរណភាពទឹកដីជាតិយើងទាំងអស់គ្នា។
លោកជំទាវបណ្ឌិត បានថ្លែងអំណរអគុណដល់គណៈអភិបាលខេត្ត ក្រុង-ស្រុក ឃុំ-ចៅសង្កាត់ អាជ្ញាធរពាក់ព័ន្ធ កងកម្លាំប្រដាប់អាវុធគ្រប់លំដាប់ថ្នាក់ ដែលបានលះបង់ ទាំងកម្លាំងកាយ និងកម្លាំងចិត្ត ក្នុងការថែទាំសុខទុក្ខបងប្អូនជនភៀសសឹក រួមទាំងការរៀបចំជំរុំ ស្បៀងអាហារ ការព្យាបាល និងការថែទាំសុខភាព ព្រមទាំងការគាំទ្រដល់កងទ័ពនៅសមរភូមិមុខជាប្រចាំ។ លោកជំទាវបានអំពាវនាវដល់បងប្អូនជនភៀសសឹក និងគ្រួសារកងទ័ពទាំងអស់ ជាពិសេសកុមារតូចៗ ស្ត្រីមានផ្ទៃពោះ លោកយាយ លោកតា ចាស់ជរា និងជនពិការ សូមយកចិត្តទុកដាក់ថែរក្សាសុខភាពឱ្យបានល្អ ដើម្បីជៀសវាងហានិភ័យ និងគ្រោះថ្នាក់ផ្សេងៗ ដែលអាចកើតមានឡើង ក្នុងកាលៈទេសៈដ៏លំបាកនេះ៕
អត្ថបទ និងរូបភាព៖ លោក ឆាន ញា
កែសម្រួល៖ លោក អ៊ុន ណារាជ្យ
