នៅថ្ងៃទី៨ ខែធ្នូ ឆ្នាំ២០២៥ ក្រុមប្រឹក្សាខេត្តសៀមរាប បានបន្តរៀបចំវេទិកាផ្សព្វផ្សាយ និងពិគ្រោះយោបល់ សម្រាប់គោលដៅទី៩ នៅក្រុងរុនតាឯកតេជោសែន ដើម្បីផ្ដល់ឱកាសដល់ប្រជាពលរដ្ឋក្នុងក្រុងរុនតាឯក បញ្ចេញមតិយោបល់ និងសំណូមពរដោយផ្ទាល់ទៅកាន់ថ្នាក់ដឹកនាំ និងក្រុមប្រឹក្សាខេត្ត។
ឯកឧត្តម លី សំរិទ្ធ ប្រធានក្រុមប្រឹក្សាខេត្ត បានគូសបញ្ជាក់ថា វេទិកានេះមានសារៈសំខាន់ណាស់ក្នុងការធានាការអនុវត្តនូវគោលការណ៍នៃអភិបាលកិច្ចល្អ និងការគ្រប់គ្រងតាមបែបប្រជាធិបតេយ្យនៅថ្នាក់ក្រោមជាតិ ព្រមទាំងជំរុញការអភិវឌ្ឍមូលដ្ឋាន ដើម្បីឱ្យអាជ្ញាធរបានដឹងឮ និងរកដំណោះស្រាយជូនប្រជាពលរដ្ឋ។
ឯកឧត្តម ក៏បានជំរុញដល់រដ្ឋបាលក្រុង សង្កាត់ និងប៉ុស្តិ៍នគរបាលរដ្ឋបាល ត្រូវផ្ដល់សេវាប្រកបដោយគុណភាព និងសីលធម៌ខ្ពស់ បន្តផ្សព្វផ្សាយពីការបញ្ឈប់អំពើហិង្សាលើស្ត្រី បញ្ហាក្មេងទំនើង លុបបំបាត់បញ្ហាអសន្តិសុខក្នុងមូលដ្ឋាន។ ជាពិសេស ត្រូវបន្តយកចិត្តទុកដាក់លើបញ្ហាក្មេងទំនើងគេចសាលាមិនចូលរៀន ពិសេសគ្រឿងញៀន និងបារីអេឡិចត្រូនិក។
ព័ត៌មានជាតិ ថ្មីៗ
លោក ហែន ពុទ្ធី អភិបាលរងខេត្ត បានចាត់ទុកវេទិកានេះជាការបើកចំហក្នុងការទទួលយកមតិយោបល់ពីប្រជាពលរដ្ឋ ដែលជាកម្លាំងចលករដ៏មានប្រសិទ្ធភាពក្នុងការអនុវត្តនូវយុទ្ធសាស្ត្រអភិវឌ្ឍន៍ «មនុស្ស ផ្លូវ ទឹក ភ្លើង និងបច្ចេកវិទ្យា» ដែលជាអាទិភាពគន្លឹះរបស់ខេត្ត។ លោកក៏បានស្នើដល់អាជ្ញាធរមូលដ្ឋានយកចិត្តទុកដាក់ផ្ដល់សេវាជូនប្រជាពលរដ្ឋ ក្ដាប់ឱ្យជាប់រឿងបញ្ហាក្មេងទំនើង គ្រឿងញៀន បារីអេឡិចត្រូនិក ដោយត្រូវយកចិត្តទុកដាក់ទប់ស្កាត់ឱ្យបានខ្ពស់ និងជំរុញដល់ប្រជាពលរដ្ឋដែលមិនទាន់បានចុះបញ្ជីក្បាលដី ឱ្យរួសរាន់ទៅចុះបញ្ជីឲ្យបានរួចរាល់។
សូមជម្រាបថា វេទិកានាពេលនេះ ក្រុមការងារបានទទួលសំណួរ សំណូមពរចំនួន១៩ ក្នុងនោះសំណួរសំណូមពរផ្ទាល់មាត់ចំនួន១២ ត្រូវបានមន្ត្រីជំនាញបកស្រាយជូនភ្លាមៗ។ ដោយឡែក សំណួរសំណូមពរជាលាយលក្ខណ៍អក្សរចំនួន៧ ត្រូវបាន ក្រុមការងារ ប្រមូលយកទៅពិនិត្យ ពិភាក្សាក្នុងក្របខណ្ឌក្រុមប្រឹក្សាខេត្ត ហើយនឹងធ្វើការឆ្លើយតប និងជម្រាបជូនដំណឹងជាលាយលក្ខណ៍អក្សរដល់បងប្អូនប្រជាពលរដ្ឋនៅពេលក្រោយ៕
អត្ថបទ និងរូបភាព៖ លោក ឡៃ បញ្ញា
កែសម្រួល៖ លោក អ៊ុន ណារាជ្យ
