អាជ្ញាធរខេត្តសៀមរាប បានធ្វើការអំពាវនាវយ៉ាងទទូចដល់អាជ្ញាធរមូលដ្ឋាន មន្ទីរអង្គភាពពាក់ព័ន្ធ គ្រឹះស្ថានសិក្សា និងមហាជនទូទៅ ជាពិសេសយុវជន យុវនារី សិស្សនិស្សិត ឱ្យចូលរួមទាញយក និងប្រើប្រាស់កម្មវិធីទូរស័ព្ទដៃ App NoDrug របស់អាជ្ញាធរជាតិប្រយុទ្ធប្រឆាំងគ្រឿងញៀន ឱ្យបានទូលំទូលាយ ដើម្បីយកគ្រឿងញៀនចេញពីសហគមន៍។
ក្នុងពិធីផ្សព្វផ្សាយការប្រើប្រាស់កម្មវិធីទូរស័ព្ទដៃ App NoDrug ជូនដល់អាជ្ញាធរមូលដ្ឋានក្នុងខេត្តសៀមរាប នៅថ្ងៃទី៨ ខែធ្នូ ឆ្នាំ២០២៥ លោក សំកុល សុចិត្រា អភិបាលរងខេត្តសៀមរាប និងជាអនុប្រធានគណៈកម្មាធិការត្រួតពិនិត្យគ្រឿងញៀនខេត្ត បានគូសបញ្ជាក់ថា ការប្រើប្រាស់ App NoDrug មានសារៈសំខាន់ខ្លាំងណាស់ ក្នុងការចូលរួមចំណែកជាមួយរាជរដ្ឋាភិបាលក្នុងការប្រយុទ្ធប្រឆាំងគ្រឿងញៀន។
លោក ក៏បានអំពាវនាវដល់ភាគីពាក់ព័ន្ធទាំងអស់ ឱ្យចូលរួមប្រើប្រាស់កម្មវិធីនេះ ដើម្បីទទួលព័ត៌មានអប់រំ និងចំណេះដឹង៖ ដើម្បីទទួលបានសារអប់រំ ព័ត៌មានទាន់ហេតុការណ៍ និងចំណេះដឹងពីផលប៉ះពាល់ វិនាសកម្មនៃគ្រឿងញៀន, ព័ត៌មានពាក់ព័ន្ធនឹងការផ្ដល់សេវាព្យាបាល និងស្ដារនីតិសម្បទាអ្នកញៀនគ្រឿងញៀន, ប្រើប្រាស់ជាមធ្យោបាយក្នុងការរាយការណ៍ដោយផ្ទាល់អំពីករណីប្រើប្រាស់ ការជួញដូរ ការដឹកជញ្ជូន និងការកែច្នៃផលិតគ្រឿងញៀនក្នុងសហគមន៍។ តាមរយៈការរាយការណ៍នេះ ក្រុមការងារទទួលព័ត៌មាននឹងបញ្ជូនទៅអាជ្ញាធរសមត្ថកិច្ច ដើម្បីមានវិធានការជាក់ស្តែង បង្ការ ទប់ស្កាត់ និងបង្ក្រាបបានទាន់ពេលវេលា សំដៅកាត់បន្ថយ និងលុបបំបាត់គ្រឿងញៀនពីសហគមន៍ ស្របតាមទស្សនវិស័យ «ចូលរួមទាំងអស់គ្នា ដើម្បីជីវិត និងសហគមន៍គ្មានគ្រឿងញៀន»។
ព័ត៌មានជាតិ ថ្មីៗ
លោកអភិបាលរងខេត្ត ក៏បានបន្ថែមថា អាជ្ញាធរជាតិប្រយុទ្ធប្រឆាំងគ្រឿងញៀន បានបង្កើត និងដាក់ដំណើរការជាផ្លូវការនូវកម្មវិធីទូរស័ព្ទដៃ NoDrug នេះ ក្នុងគោលបំណងលើកកម្ពស់ស្មារតីជាតិរួមគ្នាក្នុងការប្រយុទ្ធប្រឆាំងគ្រឿងញៀន ស្របតាមស្មារតីនៃការចាត់ទុកបញ្ហាគ្រឿងញៀនជាបញ្ហារួមដែលត្រូវដោះស្រាយទាំងអស់គ្នា។ លោកបានរំលឹកថា កាលពីថ្ងៃទី៨ ខែឧសភា ឆ្នាំ២០២៤ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី ក៏បានណែនាំ ជំរុញ និងលើកទឹកចិត្តដល់មហាជនទូទៅ ជាពិសេស យុវជន យុវនារី និស្សិត និងសិស្ស ឱ្យទាញយក និងប្រើប្រាស់កម្មវិធីទូរស័ព្ទដៃ NoDrug នេះឱ្យបានទូលំទូលាយរួចមកហើយ។
លោក សំកុល សុចិត្រា ក៏បានស្នើសុំដល់កងកម្លាំងប្រដាប់អាវុធគ្រប់ប្រភេទ រដ្ឋបាលក្រុង ស្រុក ឃុំ សង្កាត់ មន្ទីរ អង្គភាពពាក់ព័ន្ធ និងវិស័យឯកជននានា ចូលរួមសហការ និងអនុវត្តការងារប្រយុទ្ធប្រឆាំងគ្រឿងញៀននេះឱ្យបានព្រមៗគ្នា ដើម្បីការពារជីវិត និងសហគមន៍គ្មានគ្រឿងញៀន៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
