អគារសិក្សាមួយខ្នង មាន២បន្ទប់ សាងសង់អំពីថ្មប្រកសង័្កសី ស្ថិតនៅសាលាបឋមសិក្សា បិងការ៉ា ថ្មគោល ដែលជាសាលាឧបសម្ព័នសាលាធិបតី ក្នុងឃុំត្រីញ័រ ស្រុកពួក ខេត្តសៀមរាប ក្រោមការឧបត្ថម្ភគាំទ្រពីអង្គការរ៉ូតារីក្លឹប រ៉ក់ខាមតុន ហ្វីតស្សរោយ ផ្តល់តាមរយៈអង្គការចក្ខុវិស័យកម្ពុជា ត្រូវបានសម្ពោធដាក់ឲ្យប្រើប្រាស់ជាផ្លូវការ នៅព្រឹកថ្ងៃទី០៣ ខែវិច្ឆិកា ឆ្នាំ២០២៣នេះ។
លោក ស៊ត់ ចិន្ថា ប្រធានប្រតិបត្តិអង្គការចក្ខុវិស័យកម្ពុជា បានឲ្យដឹងថា អង្គការបានកំពុងរួមចំណែកយ៉ាងសកម្មលើកវិស័យអប់រំ និងផ្គត់ផ្គង់ស្បៀងអាហារ និងការកសាងអគារសិក្សានៅតាមមូលដ្ឋានជនបទនៅតាមស្រុកគោលដៅ ក្នុងខេត្តសៀមរាប ក៏ដូចនៅតាមបណ្តាខេត្តមួយចំនួនទៀត។ ហើយដោយមើលនូវភាពខ្វះខាតជួបការលំបាករបស់សិស្សានុសិស្សនៅក្នុងសាលាបឋមសិក្សា បិងការ៉ា ថ្មគោល ដែលជាសាលាឧបសម្ព័នសាលាធិបតី ហើយពុំមានលទ្ធភាពទៅសិក្សានៅសាលាឆ្ងាយ និងដោយអគារសិក្សានៅក្នុងភូមិខ្វះខាតនូវបន្ទប់សិស្សរៀនសូត្រ ទើបអង្គការសម្រេចសាងសង់អាគារសិក្សានេះឡើង ដើម្បីជាការជួយសម្រួលដល់ប្អូនៗដែលកំពុងសិក្សា។ លោកក៏សង្ឃឹមថា អគារសិក្សានេះ នឹងផ្តល់នូវដល់សិស្សានុសិស្សប្រកបដោយបរិស្ថាន សុវត្ថិភាព និងផាសុខភាពទៀតផង។ ជាមួយនេះក៏សូមសិស្សានុសិស្ស និងបងប្អូនជាអាណាព្យាបាលទាំងអស់ ចូលរួមជួយថែរក្សាអគារសិក្សាថ្មីនេះ ដើម្បីឲ្យប្រើប្រាស់បានយូអង្វែង។
មានប្រសាសន៍ក្នុងឱកាសនោះ លោក ស៊ិន ចាន់ថុល អភិបាលស្រុកពួក បានគូសបញ្ជាក់ថា ដើមី្បធានាគុណភាពនៃការអប់រំកម្រិត មតេ្តយ្យ បឋមសិក្សា និងអនុវិទ្យាល័យ ប្រមុខរាជរដ្ឋាភិបាលបានបង្កើឲ្យមានថ្នាក់មត្តេយ្យ និងបឋមសិក្សាតាមភូមិ អនុវិទ្យាល័យតាមឃុំ ដែលមានសារៈសំខាន់សម្រាប់សិស្សានុសិស្សទាំងអស់នៅកម្ពុជា ដើមី្បកសាងមាគ៌ាអប់រំពួកគេឆ្ពោះទៅដល់កម្រិតមធ្យមសិក្សាបឋមភូមិ។ ក្នុងនោះដែរយុទ្ធសាស្ត្របញ្ចកោណដំណាក់កាលទី១ នៃរាជរដ្ឋាភិបាលនីតិកាលទី៧ បានចាត់ទុកវិស័យអប់រំជាអទិភាពក្នុងការពង្រឹងពង្រីកវិស័យអប់រំទាំងបរិមាណ និងគុណភាព នៅគ្រប់គ្រឹះស្ថានសិក្សាទូទាំងប្រទេស។ សារៈសំខាន់នៃការកែលម្អរ បរិស្ថានអប់រំ គឺជាគន្លឹះដ៏សំខាន់ក្នុងការអភិវឌ្ឍន៍ធនធានមនុស្សនៅកម្ពុជា។
លោកអភិបាលស្រុក មានប្រសាសន៍ទៀតថា សម្រាប់វិស័យអប់រំ ទាំងស្ថាប័នរដ្ឋ និងផ្នែកឯកជន ពិតជាមានតួនាទីសំខាន់ណាស់ក្នុងការរួមចំណែកដល់ការអភិវឌ្ឍជាតិ ដោយផ្ទេរចំណេះដឹងដល់កុមារ យុវជន និងមនុស្សពេញវ័យ ឲ្យទទួលបានការសិក្សា និងការអប់រំពេញមួយជីវិត ហើយការអប់រំត្រូវផ្តោតលើការកសាងជំនាញ និងការផ្តល់ឱកាសដល់សិស្សគ្រប់រូប ក្នុងការទទួលបាននូវចំណេះដឹងមូលដ្ឋាន ដើម្បីឈានទៅសិក្សាលើចំណេះជំនាញបច្ចេកទេស និង ជំនាញឯកទេសផ្សេងៗ ដើម្បីជាឈ្នាន់សម្រេចបានការអភិវឌ្ឍ ដែលផ្តល់អត្ថប្រយោជន៍ពេញលេញដល់គ្រប់ស្រទាប់យុវជន ក្នុងការកសាងអនាគតរបស់ខ្លួនប្រកបដោយគុណភាព។ មួយវិញទៀតគោលការណ៍ នៃការអប់រំសម្រាប់ទាំងអស់គ្នាគឺទាមទារនូវលទ្ធភាពទទួលបានសេវាអប់រំប្រកបដោយសមធម៌ដែលផ្តល់ឱកាសសើ្មៗគ្នាដល់កុមារនិងយុវជនកម្ពុជាទាំងអស់បានទទួលបានការអប់រំមូលដ្ឋានក្នុងប្រព័ន្ធ និងការអប់រំក្រៅប្រព័ន្ធ៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
