ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានសម្ដែងនូវការចាប់អារម្មណ៍ និងវាយតម្លៃខ្ពស់ ចំពោះមន្ទីរព៍ត៌មានខេត្តសៀមរាប លើសកម្មភាពការងារកន្លងមក ថាអាចយកជាគំរូដល់បណ្តាមន្ទីរព៍ត៌មានរាជធានីខេត្ត ក្នុងការដឹកនាំគ្រប់គ្រង និងការអនុវត្តការងារភារកិច្ចប្រកបដោយភាពច្នៃប្រឌិត សាមគ្គី សហការល្អ ជាពិសេសលើការងាររៀបចំ និងគ្រប់គ្រងការងារបច្ចេកទេស ដែលមានលក្ខណៈស្តង់ដារសម្រាប់ធ្វើជាគំរូដល់បណ្តាមន្ទីរដទៃទៀត ហើយតារយៈសមិទ្ឋផលការងារដែលសម្រេចបាននេះ មិនអាចកាត់ផ្តាច់បានពីកិច្ចខិតខំប្រឹងប្រែងរបស់ថ្នាក់ដឹកនាំ មន្ត្រីរាជការនិងមន្ត្រីកិច្ចសន្យារបស់មន្ទីរព័ត៌មានខេត្តសៀមរាបនោះទេ។
សូមជម្រាបថា ឯកឧត្តមរដ្ឋមន្ត្រី ថ្លែងដូច្នេះក្នុងឱកាស ឯកឧត្តម អញ្ជើញពិនិត្យដំណើរការផ្សាយវិទ្យុ និងទូរទស្សន៍ និងជួបសំណេះសំណាលជាមួយថ្នាក់ដឹកនាំ មន្ត្រីរាជការ និងមន្ត្រីជាប់កិច្ចសន្យា នៃមន្ទីរព័ត៌មានខេត្តសៀមរាប នារសៀលថ្ងៃទី០៣ ខែវិច្ឆិកា ឆ្នាំ២០២៣នេះ។
ឯកឧត្តម នេត្រ ភក្ត្រា មានប្រសាសន៍ថា ទោះបីជាមានការលំបាកខ្លះក្នុងការងារ តែយើងត្រូវតែសហការគ្នាតស៊ូពុះពារដោយមិនបណ្តែតបណ្តោយទៅលើអ្វីដែលជួបប្រទះនោះទេ ផ្ទុយទៅវិញអាស្រ័យលើភាពជាអ្នកដឹកនាំនិងភាពច្នៃប្រឌិតនេះហើយ ដែលអាចធ្វើឱ្យអ្វីដែលយើងខ្វះ និងអ្វីដែលយើងមានអាចកែច្នៃ ដើម្បីបម្រើការងាររបស់យើង ដូច្នេះក្នុងឱកាសនេះ លើកទឹកចិត្តឲ្យមន្ត្រីរាជការទាំងអស់បន្តកិច្ចសហការគ្នា និងខិតខំប្រឹងប្រែងបន្តទៀតលើសកម្មភាពជំនាញរៀងៗខ្លួន ដើម្បីធ្វើឲ្យវិស័យព័ត៌មាន និងសោតទស្សន៍ក្នុងខេត្តកាន់តែមានភាពរីកចម្រើន ស្របតាមចក្ខុវិស័យដែលក្រសួងព័ត៌មាន និងរាជរដ្ឋាភិបាលបានដាក់ចេញក្នុងអាណត្តិទី៧ ។
ឯកឧត្តមបន្តថា ថ្វីត្បិតតែជាលើកដំបូងសម្រាប់ការចុះបេសកកម្មបានពីរខេត្ត គឺខេត្តកំពង់ធំនិងខេត្តសៀមរាប ក្នុងតំណែងជារដ្ឋមន្ត្រីក្រសួងព័ត៌មាននៃអាណត្តិទី៧ ក៏ពិតមែន ប៉ុន្តែឯកឧត្តម បានមើលឃើញនិង បានវាយតម្លៃខ្ពស់ចំពោះមន្ទីរព័ត៌មានខេត្តសៀមរាប ដែលអាចយកធ្វើជាគំរូសម្រាប់មន្ទីរព័ត៌មានរាជធានី-ខេត្តដទៃទៀត ដោយការពិនិត្យឃើញអំពីទម្រង់ និងលក្ខណៈបច្ចេកទេសបម្រើឱ្យប្រព័ន្ឋផ្សព្វផ្សាយ មានស្តង់ដារអាចទទួលយកបានសម្រាប់ជាគំរូដល់ខេត្តផ្សេងៗទៀតដូច្នេះសុំឲ្យថ្នាក់ដឹកនាំមន្ទីរសិក្សានិងរៀបចំ នូវទម្រងបែបស្តង់ដារប្រតិបត្តិមួយ ដើម្បីយកទៅអនុវត្តនៅតាមន្ទីរព័ត៌មានផ្សេងទៀត ជាពិសេសគឺសម្ភារៈ ឧបករណ៍និងការរៀបចំស្ទីឌីយោទាំងវិទ្យុនិងទូរទស្សន៍និងការរៀបចំមួយចំនួនទៀតដែលគាំទ្រដប្រព័ន្ឋផ្សព្វផ្សាយ។
ឯកឧត្តម លីវ សុខុន ទីប្រឹក្សាក្រសួង និងជាប្រធានមន្ទីរព័ត៌មានខេត្តសៀមរាប បានឲ្យដឹងថា បើទោះបីជាមន្ទីរសម្រេចបានលទ្ធផលគួរជាទីមទតនៈក៏ពិតមែន ប៉ុន្តែបច្ចុប្បន្ននេះ មន្ទីរព័ត៌មានខេត្តសៀមរាប នៅជួបប្រទះបញ្ហាប្រឈមមួយចំនួន ដូចជា ៖កង្វះមន្ត្រីដឹកនាំមន្ទីរ និងការិយាល័យ , កង្វះមន្ត្រីក្របខ័ណ្ឌសម្រាប់បម្រើការងារ , ខ្វះម៉ាស៊ីនភ្លើង និងគ្រឿងឧបករណ៍បច្ចេកទេសបម្រើឲ្យស្ថានីយវិទ្យុ និងទូរទស្សន៍ , កង្វះថវិកាគាំទ្រដំណើរការផ្សាយវិទ្យុ និងទូរទស្សន៍ , ខ្វះមធ្យោបាយធ្វើដំណើរយកព័ត៌មាន , ខ្វះទីតាំងដីសម្រាប់សាងសង់អង់តែនវិទ្យុ និងទូរទស្សន៍ ជាដើម៕
អត្ថបទ និងរូបភាព៖ លោក យូ វង្ស
កែសម្រួល៖ លោក លីវ សាន្ត
