នៅថ្ងៃចាប់ផ្ដើមនៃការប្រឡងសញ្ញាបត្រមធ្យមសិក្សាទុតិយភូមិ ក្នុងក្រុងសៀមរាប នៅថ្ងៃទី៦ ខែវិច្ឆិកា ឆ្នាំ២០២៣នេះ ឯកឧត្តម អ៊ាន ឃុន ប្រធានក្រុមប្រឹក្សាខេត្តសៀមរាប ឯកឧត្តម លោកជំទាវសមាជិកក្រុមប្រឹក្សាខេត្ត និងលោក លោកស្រីអភិបាលរងខេត្តសៀមរាប បានអញ្ជើញជាធិបតីក្នុងការបើកវិញ្ញាសារ ដើម្បីបញ្ជាក់ថាដំណើរការនៃការប្រឡងនាពេលនេះ មានភាពសុក្រឹត្យ និងពុំមានការបែកធ្លាយវិញ្ញាសារនោះឡើយ។
មានប្រសាសន៍ក្នុងពិធីបើកវិញ្ញាសារ ក្នុងមណ្ឌលប្រឡង នៃវិទ្យាល័យ ១០ មករា ១៩៧៩ ក្រុងសៀមរាប ឯកឧត្តម ពិត ចំណាន រដ្ឋលេខាធិការក្រសួងអប់រំ យុវជននិង កីឡា និងឯកឧត្តម អ៊ាន ឃុន ប្រធានក្រុមប្រឹក្សាខេត្ត បានណែនាំដល់បេក្ខជនទាំងអស់ ត្រូវគោរពឲ្យបាននូវវិន័យផ្ទៃក្នុង នៅពេលប្រឡង ដើមី្បធានានូវគុណភាព នៃការបណ្តុះ បណ្តាល ធនធានមនុស្ស ជាពិសេសជាការបង្ហាញពីសមត្ថភាពរបស់ក្មួយៗ ដែលបានខិតខំសិក្សាអស់រយៈពេល១២ឆ្នាំកន្លងមក និងឈានក្លាយទៅជាទំពាំងស្នងឫសី្ស នៃប្រទេសជាតិទៅថ្ងៃអនាគត ។
ព័ត៌មានជាតិ ថ្មីៗ
តាមរបាយការណ៍របស់មន្ទីរអប់រំ យុវជន និងកីឡាខេត្តសៀមរាប បង្ហាញថា សម្រាប់ខេត្តសៀមរាប ក្នុងឆ្នាំសិក្សា២០២២-២០២៣នេះ បេក្ខជនចូលរួមប្រឡងសញ្ញាបត្រមធ្យមសិក្សាទុតិយភូមិ មានចំនួនសរុប ១០ ៨១៩នាក់ ក្នុងនោះស្រី ៦ ២៥១នាក់។ ចំនួននេះ មានការកើនឡើងប្រមាណ ៤ភាគរយ បើធៀបនឹងចំនួនបេក្ខជនសរុបក្នុងឆ្នាំសិក្សា២០២១-២០២២ ដែលស្មើនឹង ១០ ៨១៩នាក់។
ទន្ទឹមនោះ ដើម្បីបង្កភាពងាយស្រួល ដល់អ្នកពាក់ព័ន្ធក្នុងដំណើរការរៀបចំការប្រឡង បេក្ខជន និងអាណាព្យាបាល រដ្ឋបាលខេត្តសៀមរាប ក៏បានចេញសេចក្ដីជូនដំណឹង ធ្វើការអំពាវនាវដល់ម្ចាស់អាជីវកម្មសេវាកម្មស្នាក់នៅ មធ្យោបាយធ្វើដំណើរ និងចំណីអាហារ សូមកុំធ្វើការតម្លើងថ្លៃ ឬសម្រួលថ្លៃសេវាកម្មជូនពួកគាត់ អំឡុងពេលដំណើរការប្រឡង។ បន្ថែមលើនោះ សហភាពសហព័ន្ធយុវជនកម្ពុជាខេត្តសៀមរាប ក៏បានចូលរួមជាមួយអាជ្ញាធរ សមត្ថកិច្ច សម្រួលសណ្ដាប់ធ្នាប់ និងរៀបចំចំណតដល់បេក្ខជន នៅតាមមណ្ឌលប្រឡងទាំង១៦ ដោយមិនគិតថ្លៃផងដែរ។
គួរជម្រាបថា រយៈពេល ២ថ្ងៃ នៃការប្រឡងសញ្ញាបត្រមធ្យមសិក្សាទុតិយភូមិ មានបេក្ខជនចូលរួមប្រឡងនៅទូទាំងប្រទេស សរុបចំនួន ១៣៧ ៤១២នាក់ ក្នុងនោះបេក្ខជនថ្នាក់វិទ្យាសាស្ត្រមានចំនួន ៤១ ៣៧៩នាក់ និងបេក្ខជនថ្នាក់វិទ្យាសាស្ត្រសង្គមមានចំនួន ៩៦ ០៣៣នាក់។
អត្ថបទ និងរូបភាព៖មន្ត្រី មន្ទីរព័ត៌មាន
កែសម្រួល៖ លោក សេង ផល្លី
