អង្គកឋិនទានដែលផ្ដួចផ្ដើមឡើងដោយគណៈកម្មការ អាចា្យ និងប្រជាពុទ្ឋបរិស័ទជិតឆ្ងាយ ដង្ហែចូលទៅវេប្រគេនព្រះសង្ឃដែលគង់ចាំវស្សាអស់រយៈពេល បីខែ
ក្នុងពុទ្ធសេមាវត្តដំណាក់ ក្រុងសៀមរាប កាលពីថ្ងៃទី៥ ខែវិច្ឆិកា ឆ្នាំ២០២៣នេះ ទទួលបានថវិកាចំនួន ៤២លានរៀល និង ២.០៨៤ដុល្លារ ដែលបច្ច័យទាំងនេះ នឹងបែងចែកសម្រាប់ផ្គត់ផ្គង់ចតុបច្ច័យព្រះសង្ឃក្នុងវត្ត មួយចំនួនធំត្រូវបែងចែកយកទៅផ្គត់ផ្គង់ទិញសម្ភារៈសិក្សា ផ្នែកពុទ្ឋកៈបឋមសិក្សា និងពុទ្ឋកៈវិទ្យាល័យ ជួសជុលកែលំអទីសេនាសនសង្ឃ និងរៀបចំបរិស្ថាន សួនច្បារក្នុងវត្តក្នុងជាដើម។
ព្រះគ្រូធម្មវិសុទ្ឋិរង្សី ឡាច ចន្ថា ព្រះចៅអធិការវត្តដំណាក់ មានថេរៈដិកាថា “កឋិនទាន” ជាកាលទានមានផលវិសេសជាងទានទាំងពួង ព្រោះបានផលដល់ទាយកម្ចាស់ទានផង ផ្តល់នូវអានិសង្សដល់ភិក្ខុសង្ឃទទួលក្រាលគ្រងផង។ ក្នុងនោះសម្រាប់ភិក្ខុសង្ឃទទួលបាននូវអានិសង្សទាំង ៥យ៉ាងគឺ ត្រាច់ទៅកាន់ទីដទៃដោយមិនចាំបាច់លាភិក្ខុផងគ្នា ដោយមិនមានទោស ត្រាច់ចរទៅទីដទៃដោយមិនបាច់យកត្រៃចីវរគ្រប់ប្រដាប់ទៅតាម អាចទទួលឆាន់គណៈភោជន៍ បានមិនមានទោស អាចទុកដាក់អតិរេកចីវរបានតាមត្រូវការ និងចីវរណាដែលកើតឡើងក្នុងអាវាសនោះ ចីវរនោះបានដល់ភិក្ខុនោះ ឬ ភិក្ខុនោះមានសិទ្ធិទទួលបានទាំងអស់។ សម្រាប់ប្រជាពុទ្ឋបរិស័ទទទួលបាននូវអានិសង្ស ៥ដែរ គឺមានរូបសម្បត្តិល្អផូរផង់ មានពណ៌សម្បុរស្រស់ថ្លាល្អ មានទ្រង់ទ្រាយល្អពេញលក្ខណៈ បើជាបុរសនឹងបានជាឯហិភិក្ខុ បើជាស្រ្តីវិញនឹងបរិបូរណ៍ទៅដោយបុណ្យ ជាបញ្ចពិតកល្យាណីឬស្រ្តីគ្រប់លក្ខណ៍។
ព្រះអង្គបញ្ជាក់ថា កឋិនទានជាទានមួយដែលប្លែកពីទានដទៃៗឯទៀត គឺប្លែកដោយកាលមានត្រឹមតែ ២៩ថ្ងៃតែប៉ុណ្ណោះ ហើយវត្តនីមួយៗ អាចទទួលកឋិនបានតែម្តងក្នុង១ឆ្នាំ។ ប្លែកដោយអានិសង្ស អ្នកប្រគេនក៏បានអានិសង្ស និងអ្នកទទួលក្រាលគ្រងអនុមោទនាក៏បានអានិសង្ស។ ប្លែកដោយអំពើ គឺបុគ្គលអ្នកធ្វើតាមព្រះវិន័យប្រកបដោយធម៌ត្រឹមត្រូវ។ ប្លែកដោយវត្ថុ គឺវត្ថុសម្រាប់កឋិនមាន៣ សង្ឃាដី ចីវរ ស្បង់ តែប៉ុណ្ណោះក្រៅពីនោះជាបរិវាររបស់កឋិន។
ព័ត៌មានជាតិ ថ្មីៗ
តំណាងប្រជាពុទ្ធបរិស័ទដែលបានចូលរួមក្នុងអង្គកឋិនទាន នាឱកាសនោះដែរ មហាឧបាសិកា ង៉ែត វណ្ណដារ៉ា បានបង្ហាញអារម្មណ៍រីករាយ ជ្រះថ្លា និងបានក្រើនរម្លឹកដល់បងប្អូនប្រជាពុទ្ឋបរិស័ទគោរពជឿលើព្រះពុទ្ឋសាសនា ថាកឋិនទានយើងអាចនាំគ្នាធ្វើបានគ្រប់វ័យមិនដូចពំនោលតៗគ្នាថាចាំទាល់តែមានវ័យចំណាស់ឬមានដន្លងដងស្នែងទើបធ្វើបាននោះទេ នេះជាវាទៈនាំឱ្យអន់ថយដល់សទ្ឋាអ្នកគោរពជឿព្រះពុទ្ឋសាសនា៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
