នៅព្រឹកថ្ងៃទី០៦ ខែវិច្ឆិកា ឆ្នាំ២០២៣ គណៈប្រតិភូក្រុង Dalian នៃសាធារណរដ្ឋប្រជាមានិតចិន បានជួបសម្តែងការគួរសម ពិភាក្សាការងារ និងចុះអនុស្សារណ:យោគយល់គ្នាលើកិច្ចសហប្រតិបត្តិការដោយផ្តោតលើវិស័យសំខាន់ៗមួយចំនួន ជាមួយរដ្ឋបាលខេត្តសៀមរាប រួមមានវិស័យអប់រំ វប្បធម៌ កសិកម្ម ទេសចរណ៍ ពាណិជ្ជកម្ម កីឡា និងវិស័យផ្សេងៗទៀត។
លោក Wang Tianwei ប្រធានគណៈកម្មាធិការអចិន្ត្រៃយ៍សភាប្រជាជនក្រុង Dalian នៃសាធារណរដ្ឋប្រជាមានិតចិន បានបញ្ជាក់ថា គោលបំណងរបស់ប្រតិភូនាពេលនេះ គឺសំដៅលើការចងសម្ព័ន្ធមេត្រីភាពរវាងក្រុង Dalian និងខេត្តសៀមរាប ដើមី្បចុះអនុស្សារណ:យោគយល់គ្នាលើកិច្ចសហប្រតិបត្តិការមួយចំនួន។ ជាមួយគ្នានោះភូមិសាស្ត្រសេដ្ឋកិច្ចរបស់ក្រុង Dalian ជាក្រុងមួយដែលមានយន្តហោះផ្ទាល់ ហើយគ្រោងនឹងធ្វើការហោះហើរផ្ទាល់ឆ្ពោះមកកាន់ខេត្តសៀមរាប នៅពេលខាងមុខ ដើមី្បជាការបង្កើននូវវិស័យទេសចរណ៍ សំដៅឲ្យខេត្ត/ក្រុងសម្ព័ន្ធមេត្រីទាំងពីរ មានការរីកចម្រើនបន្ថែមទៀត។ ក្នុងនោះលោក ក៏បានសំណូមពរដល់អាជ្ញាធរខេត្តសៀមរាប ធ្វើការជួយជម្រុញដល់កិច្ចសហប្រតិបត្តិការរវាងខេត្ត/ក្រុងទាំងពីរ ឲ្យបានដំណើរការទៅដោយរលូន ហើយលោកក៏សង្ឃឹមជឿជាក់ថា ក្រុមប្រឹក្សាក្រុង Dalian និង ក្រុមប្រឹក្សាខេត្តសៀមរាប ក៏ដូចរដ្ឋបាលខេត្ត/ក្រុងទាំងពីរ មានកិច្ចប្រតិបត្តិការល្អនឹងគ្នាយ៉ាងស្អិតរមួត សំដៅការអភិវឌ្ឍខេត្ត/ក្រុងទាំងពីរទៅអនាគត និងសូមស្នើសុំដល់ប្រធានក្រុមប្រឹក្សាខេត្ត គណៈអភិបាលខេត្តសៀមរាប ចាត់តាំងរៀបចំប្រតិភូទៅធ្វើការទស្សនកិច្ចសិក្សាស្វែងយល់នៅក្រុង Dalian ខេត្ត Liaoning នាពេលខាងមុខផងដែរ។
ព័ត៌មានជាតិ ថ្មីៗ
ថ្លែងក្នុងនាមអាជ្ញាធរខេត្ត ឯកឧត្តម អ៊ាន ឃុន ប្រធានក្រុមប្រឹក្សាខេត្តសៀមរាប បានបង្ហាញការស្វាគមន៍យ៉ាងកក់ក្តៅ ចំពោះប្រតិភូក្រុង Dalian ដែលបានចូលជួបសម្តែងការគួរសមនាពេលនេះ។ ឯកឧត្តមថា ខេត្តសៀមរាប ប្រទេសកម្ពុជា និងសាធារណរដ្ឋប្រជាមានិតចិន បានចងសម្ព័ន្ធមេត្រីភាព និងបានធ្វើកិច្ចសហប្រតិបត្តិការជាមួយខេត្ត-ក្រុងចំនួន៣០ នៃសាធារណរដ្ឋប្រជាមានិតចិន តាមរយៈអនុស្សរណៈនៃការយោគយល់គ្នាចំនួន ០៩ខេត្ត/ក្រុង កិច្ចព្រមព្រៀងចំនួន ៦ខេត្ត/ក្រុង និងលិខិតផ្តួចផ្តើមចំនួន ១៥ខេត្ត/ក្រុងផងដែរ។ ក្រោមកិច្ចសហប្រតិបត្តិការជាមួយខេត្ត/ក្រុងទាំងនេះ ឯកឧត្តម ក៏បានស្នេីដល់ប្រតិភូ សូមនាំអ្នកវិនិយោគទុន ក៏ដូចជាប្រជាជនចិន ដេីម្បីធ្វេីការវិនិយោគនៅប្រទេសកម្ពុជា ពិសេសវិនិយោគនៅខេត្តសៀមរាប ដែលជាខេត្តមានសក្តានុពលលេីវិស័យទេសចរណ៍ និងវិស័យកសិកម្ម។
មានប្រសាសន៍ក្នុងឱកាសនោះដែរ លោក នាក់ ណេរ៉ុន អភិបាលរងខេត្តសៀមរាប បានគូរបញ្ជាក់ថា តាមរយៈការបង្កើតអនុស្សរណៈនៃការយោគយល់គ្នា ក្នុងការទំនាក់ទំនងកិច្ចសហប្រតិបត្តិការមិត្តភាព នាពេលនេះ និងជួយផ្សព្វផ្សាយអំពីវប្បធម៌ អរិយធម៌ និងលើកកម្ពស់ការអភិវឌ្ឍន៍វិស័យផ្សេងៗ ក្នុងខេត្ត/ក្រុងទាំងពីរ ឲ្យកាន់តែមានភាពរីកចម្រើន។ ការចុះកិច្ចព្រមព្រៀងនេះដែរ ភាគីទាំងពីរ សុទ្ធតែបានគាំទ្រ និងជម្រុញដូចគ្នាទៅលើវិស័យសេដ្ឋកិច្ច ពាណិជ្ជកម្ម វប្បធម៌ អប់រំ សុខភាព កីឡា និងវិស័យផ្សេងៗទៀត ព្រមទាំងធ្វើការផ្លាស់ប្តូរដំណើរទស្សនកិច្ចសិក្សា និងចែករំលែកបទពិសោធន៍ ក្នុងគោលបំណងបង្កើនសមត្ថភាពដល់មន្ត្រី នៃខេត្តក្រុងទាំងពីរ ហើយក្នុងនោះរដ្ឋបាលខេត្ត នឹងធ្វើការជ្រើសរើសនូវពេលវេលាសមស្របណាមួយ រៀបចំប្រតិភូទៅទស្សនកិច្ចសិក្សានៅក្រុង Dalian ផងដែរ៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
