រដ្ឋបាលខេត្តសៀមរាប សហការជាមួយទីភ្នាក់ងារសហប្រតិបត្តិការអាល្លឺម៉ង់ ដែលហៅកាត់ថា GIZ និង Siem Reap Tourism Club-STC បានរៀបចំបើកសិក្ខាសាលាមួយ ស្តីពីការកាត់បន្ថយការប្រើប្រាស់ផលិតផលប្លាស្ទិកប្រើបានតែមួយដង តាមទម្លាប់ចាស់ នៅសណ្ឋាគារ អង្គរមិរ៉ាខល ក្នុងក្រុងសៀមរាប នាព្រឹកថ្ងៃទី ០៧ ខែ វិច្ឆិកា ឆ្នាំ២០២៣នេះ ដោយមានការចូលរួមពីអ្នកពាក់ព័ន្ធជាច្រើនរូប។
លោក Frank Jattke ប្រធានក្រុមការងារអាស៊ានប្រចាំប្រទេសកម្ពុជា លើកឡើងថា នៅលើភពផែនដីយើងនេះ បានរងផលប៉ះពាល់យ៉ាងខ្លាំងលើកាកសំណល់ប្លាស្ទិក ដែលបានបំពុលដល់បរិស្ថាន អនាម័យ និងធម្មជាតិ ប៉ុន្តែដើមី្បកាត់បន្ថយការប្រើប្រាស់ផលិតផលប្លាស្ទិកប្រើបានតែមួយដង តាមទម្លាប់ចាស់ នៅតាមលំនៅដ្ឋាន ឬ ភោជនីយដ្ឋាន សណ្ឋាគារ និង នៅតាមទីផ្សារ ទីប្រជុំជន គួតែយើងគ្រប់ៗគ្នា ធ្វើការកាត់បន្ថយការប្រើប្រាស់ប្លាស្ទិក ដោយជ្រើសរើសយកឧបករណ៍ដែលប្រើប្រាស់ហើយវាមិនប៉ះពាល់ដល់បរិស្ថានលើភពផែនដី និង ក្នុងទឹក ព្រមទាំងបង្កើតបាននូវជីវៈចម្រុះបម្រើដល់ធម្មជាតិ និង ផលប្រយោជន៍ដល់យើងផងដែរ ខណៈក្រុងសៀមរាប ជាក្រុងគំរូមួយនៅតំបន់អាស៊ាន ក្នុងវិស័យទេសចរណ៍ នឹងបានកំពុងឆ្ពោះទៅជាក្រុងគ្មានប្រើប្លាស្ទីក សម្រាប់ទៅអនាគត ។
ព័ត៌មានជាតិ ថ្មីៗ
លោក យុន លីនណេ អភិបាលរងខេត្តសៀមរាប បានលើកឡើងថា ថង់ប្លាស្ទិកវាស្អាតនៅពេលយើងប្រើវា ប៉ុន្តែនៅពេលដែលវាក្លាយជាសំរាមគ្មានអ្នកណាចង់ទៅជិតនោះទេ ដូច្នេះការកាត់បន្ថយការប្រើប្រាស់ប្លាស្ទិក វាផ្តើមចេញពីយើងទាំងអស់គ្នា ហេតុនេះសិក្ខាសាលានាថ្ងៃនេះ គឺពិតជាមានសារៈសំខាន់ខ្លំាងណាស់ ចំពោះអាជីវករពាក់ព័ន្ធទំាងអស់ក្នុងវិស័យម្ហូបអាហារ និងភេសជ្ជៈ ក្នុងការបង្កើនការយល់ដឹងពីការគ្រប់គ្រងកាកសំណល់ និង ការកាត់បន្ថយការប្រើប្រាស់ផលិតផលប្លាស្ទិកប្រើបានតែមួយដង នៅក្នុងភោជនីយដ្ឋាន ហាងកាហ្វេ និងកន្លែងលក់ម្ហូបអាហារទាំងអស់ក្នុងខេត្តសៀមរាប ហើយក៏ដូចជា ការផ្តល់ឱកាសដល់អាជីវករក្នុងវិស័យម្ហូបអាហារ និងភេសជ្ជៈ បានចែករំលែកពីបទពិសោធន៍ជោគជ័យ ក្នុងការកាត់បន្ថយការប្រើប្រាស់ផលិតផលប្លាស្ទិកប្រើបានតែមួយដង និងការអនុវត្ត ដែលគិតគូរពីបរិស្ថានក្នុងការប្រកបរបរអាជីវកម្មរបស់ខ្លួនផងដែរ។
លោកបន្តថា ការប្រមូលធាតុចូលពីម្ចាស់អាជីវកម្ម និងអ្នកពាក់ព័ន្ធ អំពីបញ្ហាប្រឈម និងដំណោះស្រាយក្នុងការកាត់បន្ថយការប្រើប្រាស់ផលិតផលប្លាស្ទិកប្រើបានតែមួយដង ពិតជាមានសារៈសំខាន់ក្នុងការបង្កើនទស្សនទានជារួម ដើម្បីជំរុញឱ្យមានការកាត់បន្ថយ និងឈានទៅរកបញ្ឈប់ការប្រើប្រាស់ប្លាស្ទិកប្រើបានតែមួយដងតាមទម្លាប់ចាស់។ វិស័យម្ហូបអាហារ និងភេសជ្ជៈដើរតួនាទីយ៉ាងសំខាន់លើផ្នែកសេដ្ឋកិច្ច និងឧស្សាហកម្មទេសចរណ៍ ជាពិសេសក្នុងខេត្តសៀមរាប វិស័យនេះ បានទាក់ទាញភ្ញៀវទេសចរជាប្រចាំ ដោយការទទួលទានអាហារនៅភោជនីយដ្ឋាន ហាងកាហ្វេ និងអាជីវកម្មម្ហូបអាហារផ្សេងៗទៀត។
លោកអភិបាលរងខេត្តសៀមរាប បន្តថា ដោយសារមានការកើនឡើងព្រមគ្នានៃការប្រើប្រាស់ផលិតផលប្លាស្ទិកក្នុងវិស័យនេះ យើងត្រូវការជាចាំបាច់នូវវិធីសាស្ត្រ និងដំណោះស្រាយថ្មីៗ ប្រកបដោយនិរន្តរភាព និងកិច្ចខិតខំប្រឹងប្រែងពី អ្នកពាក់ព័ន្ធគ្រប់ជាន់ថ្នាក់ក្នុងវិស័យម្ហូបអាហារ និងភេសជ្ជៈ ព្រោះកាកសំណល់ប្លាស្ទិក កើតចេញមកពីការវិចខ្ចប់អាហារទៅក្រៅ ការផ្ដល់សេវាកម្មដល់អតិថិជនដោយផ្ដោតលើគុណភាព និងអនាម័យ និងកត្តាគួបផ្សំដទៃទៀត ដែលបណ្ដាលឱ្យមានបញ្ហាប្រឈមក្នុងការគ្រប់គ្រងសំរាមសំណល់រឹង ហើយដើម្បីសម្រេចផែនការសកម្មភាពនេះ រដ្ឋបាលខេត្តសៀមរាបជាមួយទីភ្នាក់ងារសហប្រតិបត្តិការអាល្លឺម៉ង់ និងសមាគមក្លឹបទេសចរណ៍សៀមរាប បានសហការយ៉ាងជិតស្និទ្ធ ដើម្បីពង្រឹងសមត្ថភាពដល់អ្នកពាក់ព័ន្ធមកពីវិស័យសាធារណៈ និងឯកជន ដើម្បីកែលំអរការគ្រប់គ្រងសំរាម សំណល់រឹងនៅក្នុងទីក្រុង និងលើកកម្ពស់ការកែច្នៃឡើងវិញ៕
អត្ថបទ និងរូបភាព៖ សហការី
កែសម្រួល៖ លោក លីវ សាន្ត
