ក្នុងឱកាសដឹកនាំកិច្ចប្រជុំគណៈកម្មាធិការប្រយុទ្ធ នឹងជំងឺអេដស៍ខេត្ត ក្រោមប្រធានបទការឆ្លើយតបមេរោគអេដស៍ជាពហុវិស័យខេត្ត នាព្រឹកថ្ងៃទី ០៧ ខែ វិច្ឆិកា ឆ្នាំ ២០២៣នេះ លោក ពិន ប្រាកដ អភិបាលរងខេត្តសៀមរាប បានធ្វើការណែនាំដល់អង្គភាពពាក់ព័ន្ធ និង អាជ្ញាធរគ្រប់លំដាប់ថ្នាក់ ត្រូវចូលរួមដោះស្រាយឧបសគ្គ និង បញ្ហាផ្សេងៗ អំពីសកម្មភាព ការឆ្លើយតបមេរោគអេដស៍ ជំងឺអេដស៍លើក្រុមការងារគោលដៅដែលប្រឈមមុខខ្ពស់ ជាពិសេសរដ្ឋបាលក្រុង-ស្រុក ឃុំ-សង្កាត់ ត្រូវធ្វើបច្ចុប្បន្នភាពគណៈកម្មការអេដស៍ មកលេខាធិការដ្ឋាននៃគណៈកម្មាធិការប្រយុទ្ធនឹងជំងឺអេដស៍ខេត្ត និង ត្រូវផ្តល់របាយការណ៍អនុវត្តសកម្មភាពប្រចាំត្រីមាស ឬឆ្នាំឱ្យបានទៀងទាត់ ព្រមទាំងបន្តការផ្សព្វផ្សាយអំពីមេរោគអេដស៍ ឱ្យបានកាន់តែទូលំទូលាយ ក្នុងពិធីសំខាន់ៗដូចជា ពិធីបុណ្យអុំទូក និង ឆ្លងឆ្នាំសកលខាងមុខនេះ ។
លោកបន្តថា កិច្ចប្រជុំនាពេលនេះ គឺមានគោលបំណង បង្កើនទំនាក់ទំនង និងកិច្ចសហការល្អក្នុងការឆ្លើយមេរោគអេដស៍ជំងឺអេដស៍ និងពង្រឹងសកម្មភាព បទអន្តរាគមន៍ និងការចូលរួមជាពហុវិស័យឆ្លើយតបការរាលដាលមេរោគអេដស៍ នៅក្នុងខេត្តសៀមរាបប្រកបដោយប្រសិទ្ធភាព និង ពិនិត្យលើសកម្មភាពបទអន្តរាគមន៍បន្ថែមដើម្បីអនុវត្តទីក្រុងពន្លឿនការឆ្លើយតបមេរោគអេដស៍ ជំងឺអេដស៍នៅខេត្តសៀមរាប និងឈានសម្រេចគោលដៅ៩៥.៩៥.៩៥ ព្រមទាំងសម្របសម្រួលដោះស្រាយនូវឧបសគ្គ និងបញ្ហា ផ្សេងៗអំពីសកម្មភាព បទអន្តរាគមន៍ ការឆ្លើយតបមេរោគអេដស៍ ជំងឺអេដស៍នៅខេត្តសៀមរាបផងដែរ ។
ព័ត៌មានជាតិ ថ្មីៗ
បើតាមរបាយការណ៍របស់លេខាធិការដ្ឋាននៃគណៈកម្មាធិការប្រយុទ្ធនឹងជំងឺអេដស៍ខេត្តសៀមរាប បានឲ្យដឹងថា ៖ក្នុងទូទាំងខេត្តសៀមរាប មានអ្នកជំងឺអេដស៍សរុបមានចំនួន៤.៩០៩ នាក់ ក្នុងនោះស្ត្រីចំនួន ២.៣១៣នាក់ ហើយលេខាធិការដ្ឋានបានសន្និដ្ឋានថា រក្សាបាននូវសមិទ្ធផលនៃគោលដៅព្យាបាល ៩០-៩០-៩០ (មាន៧៣% មេរោគត្រូវបានបង្រ្កាប) ស្ទើរតែគ្រប់អ្នកផ្ទុកមេរោគអេដស៍ដែលដឹងពីស្ថានភាពខ្លួន បានទទួលការព្យាបាល ប៉ុន្តែមានការកើនឡើងការឆ្លងថ្មីក្នុងសមាមាត្រនៃការឆ្លងថ្មីខ្ពស់ ក្នុងចំណោមយុវវ័យ អាយុ ១៥ ដល់២៤ឆ្នាំ ហេតុនេះយុវវ័យគឺត្រូវការទទួលបានចំណេះដឹងពី ការបង្ការ និងការធ្វើតស្ត ព្រោះមានសារៈសំខាន់ណាស់ ក្នុងការឈានទៅការកាត់បន្ថយការឆ្លងថ្មី ហើយមានការកាត់បន្ថយការចម្លងរោគពីម្ដាយទៅកូន គឺមិនទាន់សម្រេចបានតាមទិសដៅនៅឡើយទេ ៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក លីវ សាន្ត
