នារសៀលថ្ងៃទី០៦ ខែវិច្ឆិកា ឆ្នាំ២០២៣នេះ សភាពាណិជ្ជកម្មមណ្ឌលសៀមរាប-ឧត្តរមានជ័យ សាកលវិទ្យាល័យស៍អ៊ីសថ៍អេយសៀ និងសមាគមសហគ្រិនស្រ្តីកម្ពុជាសាខាខេត្តសៀមរាប បានសហការគ្នារៀបចំវេទិកាអប់រំផ្លូវចិត្ត និងធ្វើការចែករំលែកចំណេះដឹង ដើម្បីអ្នកទាំងអស់គ្នា ក្រោមប្រធានបទស្តីពី “អាហារផ្លូវចិត្ត”ដោយមានការចូលរួមពីព្រះសង្ឃ និស្សិត លោកលោកស្រីតំណាងអង្គការ អាជីករ និងប្រជាពលរដ្ឋជាច្រើនរូប។
លោកឧកញ៉ាបណ្ឌិត ហ៊ុយ ភៀវ ប្រធានសភាពាណិជ្ជកម្មមណ្ឌលសៀមរាប-ឧត្តរមានជ័យ មានប្រសាសន៍ថា បើយើងក្រលេកមើលស្ថានភាពបច្ចុប្បន្ន មនុស្សយើងមានជួបបញ្ហាផ្សេងៗក្នុងជីវភាពប្រចាំថ្ងៃទាំងមុខរបរ បញ្ហាគ្រួសារ និងសង្គម ជាពិសេសនៅពេលស្ថានភាពសេដ្ឋកិច្ចមានការធ្លាក់ចុះ ប៉ះពាល់ដល់មុខរបរ ការងារផ្សេងៗ ដែលអាចបណ្ដាលឱ្យយើងមានជំងឺបាក់ទឹកចិត្ត រហូតបណ្តាលឱ្យមានការធ្វើអត្តឃាតខ្លួនឯង ដោយសារតែមានវិបត្តិផ្លូវចិត្តធ្ងន់ធ្ងរ ដោយគិតថារកដំណោះស្រាយមិនបាន។
ព័ត៌មានជាតិ ថ្មីៗ
លោកឧកញ៉ាបណ្ឌិត បញ្ជាក់ថា ជាក់ស្ដែងការរៀបចំវេទិកាអប់រំផ្លូវចិត្តនាពេលនេះ គឺពិតជាមានសារៈសំខាន់ណាស់ក្នុងការអប់រំផ្លូវចិត្តរបស់យើងឱ្យចេះគិតពិចារណាបានវែងឆ្ងាយ ដឹងពីហេតុ និងផល ដំណើររឿងក្នុងជីវិត និងវិធីកែខៃនូវបញ្ហាដែលកើតមានឡើងក្នុងដំណើរជីវិតយើង។ ចំនុចនេះដែរ ទាមទាឲ្យយើងគ្រប់គ្នាគួរយកចិត្តទុកដាក់ ពីព្រោះវាអាចនឹងបង្កជាបញ្ហាប្រឈមដល់យើងនៅថ្ងៃអនាគត។ ដូចអ្វីដែលព្រះពុទ្ធឱវាទបានសំដែងកន្លងមកបានធ្វើឱ្យយើងមានការគិតពិចារណាតាមហេតុ និងផល ការអាធ្យាស្រ័យ ផ្លូវរំងាប់អារម្មណ៍ផ្សេងៗ បានជួយឱ្យ ការរស់នៅរបស់យើង មានសេចក្តីសុខ សុភមង្គលជាមួយមិត្តភ័ក្តិនិងគ្រួសារ និងមនុស្សនៅជុំវិញខ្លួនយើង។
ជាមួយគ្នានោះដែរ លោកគ្រូ សាន សុជា ដែលជាវាគ្មិនក្នុងវេទិកានេះ ក៍បានធ្វើការបកស្រាយ និងពន្យលនែនាំ ព្រមទាំងឆ្លើយតបទៅនឹងសំនួររបស់អ្នកសម្របសម្រួលកម្មវិធី និងប្អូនៗនិស្សិត អាជីករ ដែលបានមានចម្ងល់ហើយបានសួរនាំទាក់ទងទៅនឹង “អាហារផ្លូវចិត្ត” ដោយវាគ្មិនបានធ្វើការបកស្រាយ និងចែករំលែកចំណេះដឹង ដើម្បីជាប្រយោជន៍ក្នុងការអប់រំផ្លូវចិត្តដល់អ្នកចូលរួមទាំងអស់បានយល់នូវអ្វីដែលជាអាហារផ្លូវចិត្ត ហើយវាមាននូវគុណប្រយោជន៍យ៉ាងណាខ្លះដល់យើងទាំងអស់គ្នាផងដែរ៕
អត្ថបទ និងរូបភាព៖ លោក ទ្រា ពន្លឺ, ជា ស្រស់
កែសម្រួល៖ លោក អ៊ុន ណារាជ្យ
