ក្នុងពិធីសំណេះសំណាលជាមួយ ថ្នាក់ដឹកនាំ និងមន្ត្រីនៃមន្ទីរអធិការកិច្ចខេត្តសៀមរាបចុងសប្ដាហ៍កន្លងទៅនេះ ឯកឧត្តម ហួត ហាក់ រដ្ឋមន្រ្តីក្រសួងអធិកាកិច្ច លើកឡើងថា បន្ទាប់ពីព្រះមហាក្សត្រ នៃព្រះរាជាណាចក្រកម្ពុជា សព្វព្រះរាជហឫទ័យរាជានុញ្ញាតប្តូរឈ្មោះ“ក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច” មកជា “ក្រសួងអធិការកិច្ច” ស្របតាមសំណើររបស់រាជរដ្ឋាភិបាល ក្រសួងបាន បំពេញបេសកកម្មរបស់ខ្លួនសម្រេចរយៈពេល ៧២ថ្ងៃកន្លងមកហើយ។
តាមប្រសាសន៍របស់ ឯកឧត្តម រដ្ឋមន្ត្រី ការប្តូរឈ្មោះ ក្រសួងនេះ គឺដើម្បីឆ្លើយតបទៅនឹងកម្មវិធីនយោបាយ និងយុទ្ធសាស្ត្របញ្ចកោណ-ដំណាក់កាលទី១ នៃរាជរដ្ឋាភិបាល នីតិកាលទី៧ នៃរដ្ឋសភា ដែលសំដៅបន្តការកែទម្រង់ស៊ីជម្រៅ ទូលំទូលាយ មានភាពស៊ីចង្វាក់គ្នា។ ការកំណែទម្រង់នេះដែរ ក៏នឹងផ្ដោតលើការលើកកម្ពស់អភិបាលកិច្ច និងសមត្ថភាពសា្ថប័ន ការបង្កើតបរិយាកាសអំណោយផលសម្រាប់អភិវឌ្ឍសង្គម-សេដ្ឋកិច្ច ការអភិវឌ្ឍ-មូលធនមនុស្ស ការធ្វើពិពិធកម្មសេដ្ឋកិច្ច ការបង្កើនភាពប្រកួតប្រជែង ការអភិវឌ្ឍវិស័យឯកជន ដែលប្រកបដោយភាពធន់ ចីរភាព បរិយាប័ន្ន និងសង្គមឌីជីថលជាដើម។
ព័ត៌មានជាតិ ថ្មីៗ
គួររំលឹកថា ក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច ត្រូវបានរាជរដ្ឋាភិបាលបង្កើតឡើងនៅក្នុងឆ្នាំ១៩៩៩ ដោយរួមបញ្ចូលគ្នារវាងស្ថាប័នរដ្ឋលេខាធិការដ្ឋានទំនាក់ទំនងសភា និងអគ្គលេខាធិការដ្ឋានអធិការកិច្ចរាជរដ្ឋាភិបាល។ ការបង្កើតក្រសួងនេះឡើង មានគោលដៅកសាងសង្គមកម្ពុជា ឲ្យមានភាពរឹងមាំប្រកបដោយយុត្តិធម៌ គុណធម៌ និងសមធម៌ លើគ្រប់វិស័យ។ ក្រសួងនេះក៏មានតួនាទីជំរុញប្រជាពលរដ្ឋគ្រប់ស្រទាប់ឱ្យយល់ដឹងទូលំទូលាយអំពីច្បាប់ សេរីភាពក្នុងសង្គមជាតិ ព្រមទាំងចូលរួមទប់ស្កាត់ ប្រយុទ្ធប្រឆាំង កាត់បន្ថយ និងឈានទៅលុបបំបាត់អំពើពុករលួយ។ ក្រោយមក រាជរដ្ឋាភិបាល នីតិកាលទី៧ នៃសភា បានសម្រេចប្តូរឈ្មោះ “ក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច” ទៅជា «ក្រសួងអធិការកិច្ច» តាមរយៈសេចក្តីសម្រេច ក្នុងកិច្ចប្រជុំពេញអង្គគណៈរដ្ឋមន្ត្រីដំបូង នៅវិមានសន្តិភាព នាព្រឹកថ្ងៃទី២៤ ខែសីហា ឆ្នាំ២០២៣ និងឡាយព្រះហស្ថលេខា លើព្រះរាជក្រម ដោយព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា កាលពីថ្ងៃទី៥ ខែតុលា ឆ្នាំ២០២៣។
អត្ថបទ និងរូបភាព៖ លោក ស៊ាន សុផាត
កែសម្រួល៖ លោក សេង ផល្លី
