ក្រុមអ្នកជំនាញនៃអាជ្ញាធរជាតិអប្សរា និងឥណ្ឌា នឹងសហការគ្នាជួសជួសជុលគំនូរបុរាណ នៅតាមជញ្ជាំងនៃព្រះវិហារដែលមានអាយុរាប់រយឆ្នាំ ក្នុងវត្តរាជបូណ៍ ក្រុងសៀមរាប។
ថ្លែងក្នុងពិធីសម្ពោធបើកការដ្ឋានអភិរក្ស និងជួសជុលគំនូរបុរាណ នៅក្នុងព្រះវិហារ នៃវត្តរាជបូណ៌ ខេត្តសៀមរាប នៅព្រឹកថ្ងៃទី០៣ ខែវិច្ឆិកា ឆ្នាំ២០២៣ រដ្ឋមន្ត្រីក្រសួងវប្បធម៌ និងវិចិត្រសិល្បៈកម្ពុជា លោកជំទាវបណ្ឌិតសភាចារ្យ ភឿង សកុណា មានប្រសាសន៍ថា ពលរដ្ឋកម្ពុជាគឺពិតជាមានមោទនភាពបំផុត ដែលបានចូលរួមក្នុងគម្រោងអភិរក្ស និងជួសជុលផ្ទាំងគំនូរបុរាណដ៏មានតម្លៃ និងកិត្យានុភាព។ ដោយសាររាជរដ្ឋាភិបាលកម្ពុជានិងរដ្ឋាភិបាលឥណ្ឌា បានចុះហត្ថលេខាលើកិច្ចព្រមព្រៀងហិរញ្ញប្បទាន ដើម្បីអភិរក្សគំណុរបុរាណនៅក្នុងព្រះវិហារនៃវត្តរាជបូណ៌នេះតាំងតែពីថ្ងៃទី១២ ខែវិច្ឆិកា ឆ្នាំ២០២២។
លោកជំទាវបន្តថា ថ្វីត្បិតតែគំរោងនៃការអភិរក្សនិងជួសជុល មានការយឺតយ៉ាវដោយសារកាលៈទេសៈក៏ដោយ ក៏លោកជំទាវជឿជាក់យ៉ាងមុតមាំថា ការប្តេជ្ញាចិត្តរបស់យើងក្នុងការការពារគំនូរដ៏មានអត្ថន័យនិងមានតម្លៃទាំងនេះនៅតែរឹងមាំ។ ហើយក៏សូមឲ្យគម្រោងនេះក្លាយជាជំហានមួយទៀត ក្នុងការពង្រឹងទំនាក់ទំនងវប្បធម៌រវាងកម្ពុជា-ឥណ្ឌា ព្រមទាំងជំរុញកិច្ចសហប្រតិបត្តិការវប្បធម៌រវាងប្រទេសទាំងពីរឱ្យកាន់តែច្រើនឡើង។
លោកជំទាវបណ្ឌិត ដេវីយ៉ានី ខូប្រាកេឌី (Devyani KhoBragade) ឯកអគ្គរដ្ឋទូតសារណរដ្ឋឥណ្ឌា មានប្រសាសន៍ដែរថា ការគាំទ្រលើគំរោងអភិរក្សនិងជួសជុលគំនូរបុរាណក្នុងព្រះវិហារនៃវត្តរាជបូណ៌នេះ គឺឥណ្ឌាមានគោលបំណងស្តារឡើងវិញ ព្រមទាំងពង្រឹងទំនាក់ទំនងវប្បធម៌រវាងប្រទេសទាំងពីរ។ តាមរយៈកិច្ចខិតខំប្រឹងប្រែងនេះ ឥណ្ឌាសង្ឃឹមថា ជាការលើកកម្ពស់ការយល់ដឹងពីគ្នាទៅវិញទៅមក ការគោរពនិងការដឹងគុណចំពោះប្រវត្តិសាស្ត្រ និងវប្បធម៌រួមរបស់ប្រទេសទាំងពីរ។
សូមជម្រាបថា តាំងពីឆ្នាំ២០០៥មក អ្នកជំនាញរបស់អាជ្ញាធរជាតិអប្សរាបានចូលរួមយ៉ាងសកម្មនៅក្នុងកិច្ចអភិរក្សនិងថែរក្សាសំណង់ទាំងឡាយរបស់វត្តរាជបូណ៌ ហើយចាប់ពីឆ្នាំ២០១៤-២០២០វត្តរាជបូណ៌ត្រូវបានចុះទៅក្នុងបញ្ជីបេតិកភណ្ឌជាតិកម្ពុជា។ សម្រាប់ព្រះវិហាររបស់វត្តរាជបូណ៍ បានសាងសង់ឡើងតាំងពីសតវត្សទី១៨ នៃគ្រីស្ដសករាជ។ ទាំងស្ថាបត្យកម្មនិងការតុបតែងនៅក្នុងទីវត្តនេះ គឺធ្វើតាមរចនាបថខ្មែរសុទ្ធសាធ ដែលបង្ហាញឱ្យឃើញពីស្នាដៃការច្នៃប្រឌិតនិងមត៌កវប្បធម៌ខ្មែរដ៏សំបូរបែប។ នៅលើដំបូលជើងទម្រទ្វារបង្អួចនិងជញ្ជាំងនៃវត្តរាជបូណ៌មានគំនូរបុរាណចំនួនប្រមាណ ១៥៧ផ្ទាំង ដែលបង្ហាញពីជីវិតរបស់ព្រះសម្មាសម្ពុទ្ធ រឿងរាមាយណៈ(រាមកេរ្តិ៍)មានបង្ហាញពីឋាននរកនិងឋានសួគ៌ព្រមទាំងជីវិតប្រចាំថ្ងៃរបស់មនុស្សផងដែរ។ បច្ចុប្បន្នស្ថានភាពរបស់ផ្ទាំងគំនូរទាំងអស់នេះ គឺស្ថិតក្នុងការប្រឈមពុកផុយ ដែលទាមទារឱ្យមានការជួសជុលនិងអភិរក្សឡើងវិញជាបន្ទាន់៕
អត្ថបទ និងរូបភាព៖ លោក ជា ស្រស់ , យូ វង្ស
កែសម្រួល៖ លោក អ៊ុន ណារាជ្យ
