នៅថ្ងៃទី២៥ ខែកញ្ញា ឆ្នាំ២០២៤នេះ ក្រុមគ្រូពេទ្យនៃមណ្ឌលសុខភាពចុងឃ្នៀស សហការជាមួយអង្គការ UNICEF អង្គការ RACHA បានចុះពិនិត្យ និងផ្ដល់សេវាជូនប្រជាពលរដ្ឋដែលមានលំនៅដ្ឋានផ្ទះបណ្តែតទឹក ក្នុងភូមិទី៤ សង្កាត់ចុងឃ្នៀស ក្រុងសៀមរាប មានជំងឺទឹកនោមផ្អែម និងជំងឺលើសសម្ពាធឈាម ផ្តល់នូវវ៉ាក់សាំងដល់កុមារមានអាយុក្រោម ២ឆ្នាំ ផ្ដល់ថ្នាំទម្លាក់ព្រូនដល់កុមារ ពិនិត្យសម្ពាធឈាម ជាតិស្ករ និងធ្វើការពិនិត្យអ្នកមានផ្ទៃពោះផងដែរ។
លោកស្រី ឌុច ស្រីរត្ន ប្រធានមណ្ឌលសុខភាពចុងឃ្នៀស បានឱ្យដឹងថា តាមរយៈការបម្រើសេវាព្យាបាលជូនដល់ប្រជាពលរដ្ឋ ២៤/២៤ម៉ោង ក្នុងត្រីមាសទី៣នេះ មណ្ឌលសុខភាពចុងឃ្នៀស មានប្រជាពលរដ្ឋមកពិនិត្យ និងពិគ្រោះជំងឺ ប្រមាណ១.០០០នាក់ ដូចជាជំងឺទូទៅ ១.៥៥០នាក់, ពិនិត្យផ្ទៃពោះ ៩៧នាក់, សេវាពន្យារកំណើត ៧៨នាក់, កុមារមកទទួលថ្នាំបង្ការ និងតាមដានពីការលូតលាស់ ៨៧នាក់ និងសម្រាលកូនចំនួន៤នាក់។
លោកស្រីក៏បានបញ្ជាក់ថា ប្រជាពលរដ្ឋទាំងក្នុងសង្កាត់ចុងឃ្នៀស ក៏ដូចជាឃុំសង្កាត់ និងមូលដ្ឋានផ្សេងៗទៀត នៅថ្ងៃចុះពិនិត្យនេះ ក៏អាចចូលរួមស្រាវជ្រាវរកជំងឺមិនឆ្លងបានដោយឥតគិតថ្លៃ។ ក្នុងនោះលោកស្រីក៏បានណែនាំដល់ប្រជាពលរដ្ឋ ដើម្បីសុខភាពក្រុមគ្រួសារ សូមបងប្អូនបញ្ឈប់ការជក់បារី ពិសារគ្រឿងស្រវឹង ដែលជាហេតុងាយបង្កឱ្យកើតជំងឺទឹកនោមផ្អែម និងលើសសម្ពាធឈាមផងដែរ៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
