ទស្សនីយភាពថ្មីមួយដែលមិនធ្លាប់មានកន្លងមកក្នុងខេត្តសៀមរាប គឺជាការប្រមូលផ្ដុំគ្នារបស់ដ្រូន (Done) ចំនួន ៥០០គ្រឿង បង្កើតចេញជារូបភាពសំខាន់ជាច្រើន បង្ហោះលើអាកាសនៅចំពីលើទីតាំងខាងមុខព្រះរាជដំណាក់ ក្រុងសៀមរាប ដែលជាទីតាំងនៃការរៀបចំព្រឹត្តិការណ៍ “ សៀមរាបសង្ក្រាន្ត ” នាថ្ងៃខាងមុខនេះ។
ប្រធានរដ្ឋបាលលេខាធិការដ្ឋានសហភាពសហព័ន្ធយុវជនកម្ពុជាខេត្តសៀមរាប លោក ខុម ក្រឹម នៅថ្ងៃទី៩ ខែមេសានេះ បានឲ្យដឹងថា ដ្រូនទាំង ៥០០គ្រឿង នឹងប្រមូលផ្ដុំគ្នា បង្កើតចេញជារូបភាពពិសេសៗជាច្រើនដូចជា៖ រូបប្រាសាទអង្គរវត្ត ទង់ជាតិកម្ពុជា ផ្ការរំដួល អប្សរា ពាក្យសៀមរាបផ្ទះខ្ញុំ នឹងរូបភាពជាច្រើនទៀតដែរទាក់ទងនឹងវប្បធម៍ប្រពៃណីខ្មែរផងដែរ។ ព្រឹត្តិការណ៍ដែលមិនធ្លាប់មានពីមុននៅខេត្តសៀមរាបនេះ នឹងចាប់ផ្ដើននៅវេលាម៉ោង២១ៈ00 ដល់២១ៈ៣០នាទីយប់ ថ្ងៃទី១៤ ខែមេសា ឆ្នាំ២០២៤ខាងមុខនេះ ចំពីលើទីតាំងខាងមុខព្រះរាជដំណាក់ ក្រុងសៀមរាប ដែលជាថ្ងៃរៀបចំព្រឹត្តិការណ៍ “ សៀមរាបសង្ក្រាន្ត ” ដើម្បីឲ្យបងប្អូនប្រជាពលរដ្ឋ ក៏ដូចជាភ្ញៀវទេសចរណ៦ជាតិ អន្តរជាតិ ទទួលបាននូវផ្ទាំងទស្សនីភាពថ្មី និងប្លែកៗទៀតផង។
សូមជម្រាបថា ព្រឹត្តិការណ៍ “ សៀមរាបសង្ក្រាន្ត ” សម្រាប់ឆ្នាំ២០២៤នេះ ក្រោមកិច្ចសហការគ្នារវាងរដ្ឋបាលខេត្ត រួមនឹងសហភាពសហព័ន្ធកម្ពុជាខេត្ត និងអ្នកពាក់ព័ន្ធ នឹងរៀបចំឡើងរយៈពេល៤ថ្ងៃ ចាប់ពីថ្ងៃទី១៣-១៦ ខែមេសា ឆ្នាំ២០២៤ ដែលមានរៀបចំនូវកម្មវិធីកំសាន្តជាច្រើន រួមនឹងការតាំងពីពិព័រណ៍ខ្លែងឯកខ្មែរ និងបង្រៀនធ្វើខ្លែង ការតាំងពិព័រណ៍ម្ហូបអាហារ ការលែងល្បែងប្រជាប្រិយខ្មែរ ការជិះទូកកម្សាន្ត ការសម្តែងរបាំប្រពៃណី ការប្រគុំតន្ត្រីស្គរដៃនិងការសម្តែងរបាំបុរាណ និងមានផ្ទាំងទស្សនីយភាពនានាជាច្រើនទៀត៕
អត្ថបទ៖ កញ្ញា ប្រន ស្រីនិត
កែសម្រួល៖ លោក អ៊ុន ណារាជ្យ
