មជ្ឈមណ្ឌលសិក្សាពេញមួយជីវិតមួយខ្នង ស្ថិតក្នុងភូមិត្រពាំងស្វាយ ឃុំស្វាយលើ ស្រុកស្វាយលើ ខេត្តសៀមរាប មានបណ្តោយ ១៥ម៉ែត្រ ទទឹង៨ម៉ែត្រ មាន៣បន្ទប់ រួមទាំងការបំពាក់គ្រឿងសង្ហារឹម បរិក្ខាថាមពលអគ្គីសនី ម៉ាស៊ីនបន្សុទ្ធទឹកសុទ្ធ និងថវិកាសម្រាប់ប្រតិបត្តិការ និងទុនវិនិយោគគម្រោងកម្មវិធី សរុបថវិកាចំនួន ១០០.000 ដុល្លា ជាជំនួយរបស់អង្គការយូណេស្កូជប៉ុនប្រចាំកម្ពុជា ត្រូវបានសម្ពោធដាក់ឱ្យប្រើប្រាស់ជាផ្លូវការនៅថ្ងៃទី៩ ខែមេសា ឆ្នាំ២០២៤។
លោក នង វត្ថា នាយកអង្គការយូណេស្កូជប៉ុនប្រចាំកម្ពុជា មានប្រសាសន៍ថា អ្វីដែលធ្វើឱ្យមជ្ឈមណ្ឌលថ្មីនេះ មានលក្ខណៈប្លែកពីគេ គឺការអនុវត្តតាមវិធីសាស្ត្រសហគមន៍ក្នុងការសិក្សាពេញមួយជីវិត ព្រោះថាការអប់រំមិនមានដែនកំណត់ ហើយមិនបានកំណត់ត្រឹមតែរៀនក្នុងថ្នាក់ប៉ុណ្ណោះទេ ប៉ុន្តែអាចដំណើរការបានសម្រាប់មនុស្សគ្រប់វ័យ គ្រប់កម្រិតសិក្សា គ្រប់ពេលវេលា គ្រប់ទីកន្លែង គ្រប់មធ្យោបាយ និងគ្រប់មជ្ឈដ្ឋាន ដើម្បីអោយក្លាយជាពលរដ្ឋល្អ និងចេះរួមរស់ជាមួយគ្នាប្រកប ដោយសុខដុមនៅក្នុងសង្គម សំដៅធានាសិទ្ធិសេរីភាព និងសុភមង្គល បុគ្គល គ្រួសារ និងសង្គម ក្នុងការឆ្លើយតបទៅនឹងទីផ្សាការងារដែលមានភាពបត់បែននិងប្រែប្រួលទៅតាមបរិបទសង្គម។
លោកបន្តថា សមិទ្ឋិផលនេះ គ្រប់គ្រងដោយប្រជាជនក្នុងសហគមន៍ ដើម្បីបំរើប្រយោជន៍ដល់សហគមន៍ និងជាកន្លែងសិក្សាកម្មវិធីអប់រំក្រៅប្រព័ន្ឋ។ តាមរយៈមុខងារសំខាន់ៗ មជ្ឈមណ្ឌលសិក្សាពេញមួយជីវិត ផ្ដល់នូវសំណាញ់សុវត្ថិភាពសង្គមកាន់តែទូលំទូលាយ សម្រាប់ប្រជាជនទូទៅក្នុងការផ្តល់ សេវាអប់រំ ការផ្តល់មុខជំនាញវិជ្ជាជីវៈ បំណិនជីវិត និងប្រាក់ចំណូលដល់សហគមន៌។ ដូច្នេះ មជ្ឈមណ្ឌលសិក្សាពេញមួយជីវិតនេះ ដើរតួនាទីជាអ្នកវិនិយោគទុនដល់គ្រួសារសហគមន៌ នឹងផ្តល់ឱកាសទទួលបានសេវាអប់រំ ដែលជាមូលដ្ឋានគ្រឹះនៃការបង្កើតមុខរបរការងារនិងការលូតលាស់សេដ្ឋកិច្ចគ្រួសារក៏ដូចជាសង្គមសំដៅកែលម្អគុណភាពរស់នៅរបស់ប្រជាពលរដ្ឋ។
លោក លី សារី អភិបាលរងខេត្ត មានប្រសាសន៍ថា មជ្ឈមណ្ឌលសិក្សាពេញមួយជីវិតស្វាយលើ គឺជាមធ្យោបាយដ៏ប្រសើរបំផុត និងមានប្រសិទ្ធភាព ក្នុងការបង្កើនចំណេះដឹងពហុវិស័យ ដើម្បីពង្រីក និងពង្រឹងសមត្ថភាពប្រជាជន ក្នុងការទទួលយកព័ត៌មានចំណេះដឹង និងជំនាញសម្រាប់លើកស្ទួយជីវភាពរស់នៅប្រចាំថ្ងៃ។ ក្នុងនោះក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រី ដែលជាអ្នកបន្តវេនដ៏មានសក្តានុពល បានឱ្យប្រទេសកម្ពុជា មានសន្ទុះរីកចម្រើនជឿនលឿនលើគ្រប់វិស័យ ក្នុងនោះវិស័យសិក្សាធិការអប់រំ គឺជាវិស័យអាទិភាពមួយដែលបាននឹងកំពុងជម្រុញពង្រីក ហើយមានការឈានឡើងទាំងបរិមាណ និងគុណភាពឥតឈប់ឈរគួរជាទីមោទនៈ។ រាជរដ្ឋាភិបាលកម្ពុជា ពិសេសក្រសួងអប់រំបានចាប់ទុកការអភិវឌ្ឍធនធានមនុស្ស គឺជាការងារមួយដ៏ចាំបាច់បំផុត ដែលមិនអាចខ្វះបាន ដើម្បីរួមចំណែកអភិវឌ្ឍប្រទេសជាតិ ស្របតាមកាលៈទេសៈនៃការរីកចម្រើនទាំងផ្នែកវិទ្យាសាស្ត្រ និងបច្ចេកវិទ្យាទំនើប។
លោកអភិបាលរងខេត្ត ក៏បានណែនាំដល់អាជ្ញាធរមូលដ្ឋាន គណៈកម្មការគ្រប់គ្រង និងប្រជាពលរដ្ឋទាំងអស់ ត្រូវចូលរួមថែរក្សាការពារសមិទ្ធផលនេះឱ្យបានគង់វង្ស និងធ្វើឱ្យមានការរីកចំរើន ដើម្បីជាផលប្រយោជន៍របស់ប្រជាជន។ ហើយក៏សូមអំពាវនាវដល់សប្បុរសជនជាតិ និង អន្តរជាតិ និងបណ្តាអង្គការ ប្រទេសនានាជាមិត្តជួយ ឧបត្ថម្ភគាំទ្រដល់ការអភិវឌ្ឍន៍វិស័យ អប់រំរបស់ខេត្តសៀមរាប ដែលកំពុង ត្រូវការធនធានមនុស្ស និងពេលវេលាយ៉ាងច្រើនទៀត ដើម្បីបោះជំហានឆ្ពោះទៅកាន់ការលូតលាស់រីកចម្រើនប្រកបដោយ និរន្តរភាពនាថ្ងៃអនាគត៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
