ថ្លែងក្នុងសិក្ខាសាលាលើកកម្ពស់ចំណេះដឹងស្ដីពីការប្រែប្រួលអាកាសធាតុសម្រាប់យុវជន និងអ្នកសារព័ត៌មាននៅកម្ពុជា នៅសាលាខេត្ដសៀមរាប នាព្រឹកថ្ងៃទី៩ ខែមេសា ឆ្នាំ២០២៤នេះ ឯកឧត្តម ជួប ប៉ារីស៍ រដ្ឋលេខាធិការក្រសួងបរិស្ថាន បានជំរុញ និងណែនាំឲ្យយុវជនយល់ដឹងកាន់តែច្បាស់ពីបម្រែបម្រួលអាកាសធាតុ ដើម្បីចូលរួមលើកកំពស់បរិស្ថាន ជាពិសេសបន្ស៊ាំនឹងការប្រែប្រួលអាកាសធាតុ។
ឯកឧត្តម ជួប ប៉ារីស៍ មានប្រសាសន៍ថា ចំពោះសិក្ខាសាលានាពេលនេះ ពិតជាមានសារៈសំខាន់សម្រាប់យុវជន ដែលជាការផ្ដល់ចំណេះដឹងពីការប្រែប្រួលអាកាសធាតុនេះ ជាពិសេសយេនឌ័រ ក្នុងការចូលរួមឆ្លើយតបការប្រែប្រួលអាកាសធាតុ និងការគ្រប់គ្រងធនធានធម្មជាតិ ពីព្រោះសមភាពយេនឌ័រមានសារៈសំខាន់ក្នុងការពិភាក្សាពីការរៀបចំគោលនយោបាយ ការធ្វើសេចក្ដីសម្រេចចិត្ត ការធ្វើផែនការយុទ្ធសាស្រ្តសម្រាប់កាត់បន្ថយឧស្ម័នផ្ទះកញ្ចក់ និងបន្ស៊ាំនិងការប្រែប្រួលអាកាសធាតុ ខណៈដែលការបម្រែបម្រូលអាកាសធាតុនេះ កាន់តែនៅជាមួយយើងជារៀងរហូត។ ការប្រែប្រួលអាកាសធាតុនេះ បណ្ដាលមកពីការកើនឡើងនូវឧស្ម័នផ្ទះកញ្ចក់នៅភពផែនដី ដែលបណ្ដាលមកពីការដុតពីហ្វុសស៊ីលពីប្រទេសជឿនលឿន ឬប្រទេសឧស្សាហកម្មធំៗ ដែលក្នុងនោះ ក៍ធ្វើឱ្យប្រទេសកម្ពុជារងគ្រោះផងដែរ។
ឯកឧត្ដម បានបញ្ជាក់ថា ក្រសួងបរិស្ថានបានដាក់ចេញនូវយុទ្ធសាស្ត្រចក្រាវិស័យបរិស្ថានឆ្នាំ២០២៣-២០២៨ ក្នុងគោលបំណងតម្រង់ទិស និងចង្អុលបង្ហាញការងារអាទិភាព ដើម្បីធានាឱ្យបាននូវចីរភាពបរិស្ថាន និងសុក្រឹតកម្មបរិស្ថាន ដែលជាកិច្ចឆ្លើយតបទៅនឹងការប្រែប្រួលអាកាសធាតុ និងលើកកម្ពស់សេដ្ឋកិច្ចបៃតង សំដៅសម្រេចឱ្យបាននូវគោលដៅយុទ្ធសាស្ត្របញ្ចកោណ គឺជាប្រទេសអព្យាក្រឹតកាបូន និងមានគម្របព្រៃឈើ ៦០ភាគរយ នៅឆ្នាំ២០៥០។ ជាមួយគ្នានោះ យុទ្ធសាស្ដ្រចក្រាក្រសួងបរិស្ថាន ដោយបានដាក់ចេញមុំបី គឺដាំឈើឡើងវិញ ការពារព្រៃឈើឱ្យបានល្អ និងជួយដល់ប្រជាសហគមឱ្យពួកគាត់មានជីវភាពល្អ ដើម្បីមិនអោយពួកគាត់កាប់បំផ្លាញព្រៃឈើបន្ដទៀត។
លោក យុន លីនណេ អភិបាលរងខេត្ដសៀមរាប មានប្រសាសន៍ថា ដើម្បីចូលរួមចំណែក្នុងការអនុវត្តសម្រេចឱ្យបាននូវកម្មវិធីនយោបាយ និងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល និងយុទ្ធសាស្ត្រចក្រាវិស័យបរិស្ថានរបស់ក្រសួងបរិស្ថាន រដ្ឋបាលខេត្តសៀមរាបបាននឹងកំពុងចូលរួមអនុវត្ត និងសម្របសម្រួលដៃគូអភិវឌ្ឍន៍ រដ្ឋបាលក្រុងស្រុក មន្ទីរ អង្គភាព អង្គការសង្គមស៊ីវិល និងវិស័យឯកជន ក្នុងការអនុវត្តសកម្មភាពការងារយ៉ាងសកម្ម និងទទួលខុសត្រូវខ្ពស់ដើម្បីសម្រេចបានលទ្ធផលប្រកបដោយប្រសិទ្ធិភាព និងប្រសិទ្ធិផល។ ជាក់ស្តែងសិក្ខាសាលាថ្ងៃនេះ គឺពិតជាបានចូលរួមចំណែកយ៉ាងធំធេងក្នុងការបញ្ជ្រាបចំណេះដឹងដល់យុវជនដែលជាសសរទ្រូងប្រទេស ដើម្បីបង្កើនការរយល់ដឹងដល់យុវជន និងអ្នកសារព័ត៌មានក្នុងស្រុកពាក់ព័ន្ធនឹងការប្រែប្រួលអាកាសធាតុ៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
