ផលវិបាកនៃបញ្ហាអាហារូបត្ថម្ភគ្រប់ទម្រង់ គឺជាបញ្ហាសុខភាពសាធារណៈ និងជាបន្ទុកដ៏ធ្ងន់ធ្ងរសម្រាប់រាជរដ្ឋាភិបាលត្រូវដោះស្រាយ និងត្រូវធ្វើការប្រមូលផ្តុំនូវរាល់សកម្មភាពអន្តរាគមន៍នានា។ នេះបើតាមការបញ្ជាក់របស់ ឯកឧត្តម បណ្ឌិតសភាចារ្យ អ៊ុក រ៉ាប៊ុន ទេសរដ្ឋមន្រ្តី ប្រធានក្រុមប្រឹក្សាស្តារអភិវឌ្ឍន៍វិស័យ កសិកម្ម និងជនបទ ក្នុងពិធីបើកយុទ្ធនាការប្រយុទ្ធនឹងភាពស្គមស្គាំងកុមារ ក្រោមប្រធានបទ “រួមគ្នាប្រយុទ្ធនឹងភាពស្គមស្គាំងកុមារគំរាមកំហែងជីវិតកូនៗយើង” នៅខេត្តសៀមរាប នាព្រឹកថ្ងៃទី៩ ខែមេសា ឆ្នាំ២០២៤នេះ។
ឯកឧត្តម អ៊ុក រ៉ាប៊ុន បានមានប្រសាសន៍ថា នៅក្នុងឆ្នាំ២០១៥ បណ្តាប្រទេសនានាក្នុងពិភពលោក រួមនឹងកម្ពុជាបាន ប្តេជ្ញាចិត្តអនុវត្តគោលដៅអភិវឌ្ឍប្រកបដោយចីរភាព ក្នុងនោះក៏មានការលុបបំបាត់កង្វះអាហារូបត្ថម្ភគ្រប់ទម្រង់នាឆ្នាំ២០៣០ ដែលបច្ចុប្បន្ននេះ យើងនៅសល់ពេល៦ឆ្នាំទៀត ដើម្បីសម្រេចបានតាមការតាំងចិត្តរបស់យើង។ ក្រោមកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ដែលមានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ ជាសេនាធិការ បានធ្វើឱ្យស្ថានភាពអាហារូបត្ថម្ភ នៅកម្ពុជាក្នុងរយៈពេល ១០ឆ្នាំកន្លងមកនេះ ត្រូវបានកែលម្អគួរឱ្យកត់សម្គាល់។
ឯកឧត្តម ក៏បានឲ្យដឹងថា ផ្អែកតាមទិន្នន័យពីការអង្កេតប្រជាសាស្ត្រ និងសុខភាពកម្ពុជា(CDHS2021-2022) អត្រាក្រិសក្រិនកុមារត្រូវបានកាត់បន្ថយពីកម្រិតខ្ពស់ ៣២,៤ភាគរយ ក្នុងឆ្នាំ២០១៤ មកត្រឹមកម្រិតមធ្យម ២១,៩ភាគរយ ក្នុងឆ្នាំ២០២២។ ទោះជាយ៉ាងនេះក៏ដោយ ក៏អត្រាប្រេវ៉ាឡង់នៃភាពស្គមស្គាំងកុមារអាយុក្រោម ៥ឆ្នាំ ដែលត្រូវបានគេទទួលស្គាល់ថា ជាបញ្ហាកង្វះអាហារូបត្ថម្ភស្រួចស្រាល់ នៅតែមានកម្រិត ១០ភាគរយដដែល ចាប់តាំងពីឆ្នាំ២០១៤ រហូតដល់ឆ្នាំ២០២២។ ផលវិបាកនៃបញ្ហាអាហារូបត្ថម្ភគ្រប់ទម្រង់ គឺជាបញ្ហាសុខភាពសាធារណៈ និងជាបន្ទុកដ៏ធ្ងន់ធ្ងរសម្រាប់រាជរដ្ឋាភិបាលត្រូវដោះស្រាយ និងត្រូវធ្វើការប្រមូលផ្តុំនូវរាល់សកម្មភាពអន្តរាគមន៍នានា និងអ្នកពាក់ព័ន្ធទាំងអស់ រួមទាំងក្រសួង ស្ថាប័ននៅថ្នាក់ជាតិ ថ្នាក់ក្រោមជាតិ ដៃគូអភិវឌ្ឍន៍ ទាំងអង្គការជាតិ និងអន្តរជាតិ អង្គការសហប្រជាជាតិ វិស័យឯកជន សហគមន៍ ស្ថាប័នស្រាវជ្រាវ ។ល។ ចូលរួមចំណែក ដោះស្រាយ និងបង្កើនកិច្ចអន្តរាគមន៍ ដើម្បីធានាឱ្យមនុស្សគ្រប់រូបមានស្បៀងអាហារគ្រប់គ្រាន់ និងលុបបំបាត់ បញ្ហាអាហារូបត្ថម្ភគ្រប់ទម្រង់ រួមមានកង្វះអាហារូបត្ថម្ភ ការទទួលបានមីក្រូសារជាតិមិនគ្រប់គ្រាន់ ធាត់លើសទម្ងន់ និងការរងគ្រោះជំងឺមិនឆ្លងនានាពាក់ព័ន្ធនឹងរបបអាហារមិនមានសុខភាព ។
ឯកឧត្តមបានអំពាវនាវឱ្យគ្រប់អ្នកពាក់ព័ន្ធទាំងអស់រួមគ្នាប្រយុទ្ធ នឹងភាពស្គមស្គាំងកុមារនៅកម្ពុជា ដោយទី១.ត្រូវលើកកម្ពស់ការយល់ដឹងដល់សហគមន៍ និងគ្រួសារ អំពីសារៈសំខាន់នៃការតាមដានការ លូតលាស់របស់ទារក និងកុមារអាយុក្រោម ៥ឆ្នាំ និងកំណត់រកមើលកុមារមានបញ្ហាស្គមស្គាំង ដើម្បីទទួលបាន ការថែទាំ និងព្យាបាលទាន់ពេលវេលា។ ទី២.លើកកម្ពស់ការយល់ដឹងដល់សហគមន៍ និងគ្រួសារ អំពីផលវិបាក នៃកុមារមានបញ្ហាស្គមស្គាំងស្រួចស្រាល់ធ្ងន់ធ្ងរ ដែលប៉ះពាល់ដល់ការលូតលាស់ ការអភិវឌ្ឍប្រាជ្ញា ការអភិវឌ្ឍ ធនធានមនុស្ស សេដ្ឋកិច្ច និងសង្គម និងទី៣.លើកកម្ពស់កិច្ចសហប្រតិបត្តិការ និងការសម្របសម្រួលសកម្មភាព រួមគ្នាប្រយុទ្ធនឹងភាពស្គមស្គាំងកុមារ៕
អត្ថបទ និងរូបភាព៖ លោក យូ វង្ស, លោក ជា ស្រស់
កែសម្រួល៖ លោក អ៊ុន ណារាជ្យ
