នៅព្រឹកថ្ងៃទី១៧ ខែធ្នូ ឆ្នាំ២០១៩នេះ ប្រទេសកម្ពុជាបានធ្វើជាម្ចាស់ផ្ទះ នៃកិច្ចប្រជុំបណ្ដាញបញត្ដិករថាមពលអាស៊ានលើកទី១០” ASEAN Energy Regulators Network Meeting(AERN) ដើម្បីធ្វើឲ្យចុះសម្រុងបច្ចេកទេស និងពាណិជ្ជកម្មនៃការងារភាគី រវាងប្រព័ន្ធអគ្គិសនីរបស់ប្រទេសសមាជិកអាស៊ាន ព្រមទាំងដើម្បីផ្ទេរតំណែងប្រធានបន្តឲ្យទៅប្រទេសឥណ្ឌូនេស៊ីហើយកិច្ចប្រជុំនេះដែរបានប្រារម្ភធ្វើឡើងនៅខេត្តសៀមរាប ដោយកិច្ចប្រជុំនេះមានរយៈពេល២ថ្ងៃ ចាប់ពីថ្ងៃទី១៧ ដល់ថ្ងៃទី១៨ ខែធ្នូឆ្នាំ២០១៩នេះ ។
ឯកឧត្តម យឹម វិសិដ្ឋ ប្រធានអាជ្ញាធរអគ្គិសនីកម្ពុជា និងជាប្រធានបណ្តាញបញ្ញត្តិករថាមពលអាស៊ាន សម្រាប់អាណត្តិ២ឆ្នាំ ២០១៨-២០១៩ បានមានប្រសាសន៍ថា ការសហការរវាងបញ្ញត្តិករ នៃបណ្តាប្រទេសក្នុងអាស៊ានជាការគាំទ្រដ៏ខ្លាំងក្លាដើម្បីឈានទៅសម្រេចលទ្ធផលធំនៃគម្រោងការតភ្ជាប់រវាងប្រព័ន្ធអគ្គិសនីរបស់ប្រទេសនានាក្នុងអាស៊ាន ។ បណ្តាញបញ្ញត្តិករថាមពលអាស៊ានត្រូវបានបង្កើតឡើងក្នុងឆ្នាំ២០១២ ដើម្បីគាំទ្រដល់_HAPUA (Heads of ASEAN Power Utilities/Authorities) នៅក្នុងការអភិវឌ្ឍប្រព័ន្ធបណ្តាញអគ្គិសនីអាស៊ាននៃកម្មវិធីនៃផែនការសកម្មភាពសហប្រតិបត្តិការវិស័យថាមពលពីឆ្នាំ២០១៦-២០២៥ ។
ឯកឧត្ដមបានបន្ដថា ក្រុមការងាររបស់បណ្តាញបញ្ញត្តិករថាមពលអាស៊ាន គឺការធ្វើឲ្យចុះសម្រុងបច្ចេកទេស និងពាណិជ្ជកម្មនៃការតភ្ជាប់ពហុភាគី រវាងប្រព័ន្ធអគ្គិសនីរបស់ប្រទេសសមាជិកអាស៊ាន ។ អាជ្ញាធរអគ្គិសនីកម្ពុជាបានធ្វើជាម្ចាស់ផ្ទះ រៀបកិច្ចប្រជុំលើកទី០៩ របស់បណ្តាញបញ្ញត្តិករថាមពលអាស៊ានម្តងរួចមកហើយ កាលពីថ្ងៃ៤-៥ ខែកក្កដា ឆ្នាំ២០១៨ នៅទីក្រុងភ្នំពេញ ដោយឡែកសម្រាប់ឆ្នាំ២០១៩ នេះ បណ្តាញបញ្ញត្តិករថាមពលអាស៊ាន (The 10thនេះគឺជាកិច្ចប្រជុំលើកទី២ ដែលបានធ្វើឡើងលើទឹកដីប្រទេសកម្ពុជា ហើយក៏ជាកិច្ចប្រជុំចុងក្រោយក្នុងអាណត្តិ២ឆ្នាំ(២០១៨-២០១៩) ដែលកម្ពុជាជាប្រធាន ដោយក្នុងកិច្ចប្រជុំលើកទី១០នេះ នឹងការមានផ្ទេរតំណែងប្រធានបន្តឲ្យទៅប្រទេសឥណ្ឌូនេស៊ី ។
ឯកឧត្ដម បញ្ជាក់ទៀតថា កិច្ចប្រជុំលើកទី១០ នៅខេត្តសៀមរាបនាពេលនេះ គឺមានការចូលរួមពីតំណាងលេខាធិការអាស៊ាន(ASEC)តំណាងមជ្ឈមណ្ឌលថាមពលអាស៊ាន(ACE) ទីភ្នាក់ងារថាមពលអន្តរជាតិ(IEA) តំណាងស្ថាប័នបញ្ញត្តិករនៃប្រទេសកម្ពុជា ឥណ្ឌូនេស៊ី ឡាវ ម៉ាឡេស៊ី ភូមា ថៃ និងវៀតណាម តំណាងក្រសួងរ៉ែ និងថាមពលនៃព្រះរាជាណាចក្រកម្ពុជា និងតំណាងអគ្គិសនីកម្ពុជា ។ ក្នុងនោះរចនាសម្ព័ន្ធគ្រប់គ្រងរបស់បណ្តាញបញ្ញត្តិករជាមពលអាស៊ាន គឺមានប្រធាន (Chairman) និង អនុប្រធាន (Vice-Chairman) ក្នុងអាណត្តិ២ឆ្នាំ ប្តូរវេនគ្នា ទៅតាមលំដាប់តួអក្សរនៃឈ្មោះប្រទេស ដោយក្នុងអាណត្តិ២០១៦-២០១៧ គឺប្រទេសប្រុយណេ ជាប្រធាន និងប្រទេសកម្ពុជា ជាអនុប្រធាន ហើយអាណត្តិឆ្នាំ២០១៨-២០១៩ ប្រទេសកម្ពុជា ជាប្រធាន និងប្រទេសឥណ្ឌូនេស៊ី ជាអនុប្រធាន ។ បណ្តាញបញ្ញត្តិករថាមពលអាស៊ាន (AERN) មានក្រុមការងារចំនួន២ ៖ ១.ក្រុមការងារ១(AWG1) ដែលទទួលការងារបច្ចេកទេស និងបទបញ្ញត្តិដែលបច្ចុប្បន្នប្រទេសវៀតណាមជាប្រធាននិងក្រុមការងារ២(AWG2)ដែលទទួលការងារច្បាប់និងពាណិជ្ជកម្មដែលបច្ចុប្បន្នប្រទេសប្រុយណេ ជាប្រធាន ។
សូមបញ្ជាក់ថា បណ្តាញបញ្ញត្តិករថាមពលអាស៊ាន(AERN)ត្រូវបានបង្កើតឡើងកាលពីឆ្នាំ២០១២ តាមការផ្តួចផ្តើមរបស់កិច្ចប្រជុំថ្នាក់មន្ត្រីជាន់ខ្ពស់អាស៊ាន (Senior Official Meeting)លើកទី២៨ ។ ការបង្កើត AERNនេះ ក្នុងគោលបំណងកំណត់ទិសដៅសំខាន់ៗរួមមាន ការផ្លាស់ប្តូរចំណេះដឹង និងបទពិសោធន៍លើផ្នែកបញ្ញត្តិកម្ម ការផ្តល់នូវវេទិកាដ៏ល្អមួយសម្រាប់បញ្ញត្តិករផ្នែកថាមពលធ្វើការពង្រឹងការទំនាក់ទំនងគ្នា ដើម្បីបង្កើនចំណេះដឹងផ្នែកបញ្ញត្តិកម្មថាមពលរបស់ប្រទេសជាសមាជិក និងការអភិវឌ្ឍន៍សេដ្ឋកិច្ចក្នុងតំបន់ ៕
អត្ថបទ និង រូបភាព៖ បូ សាវី
កែសម្រួល៖ អ៊ុន ណារាជ្យ
