នៅរសៀលថ្ងៃទី១៦ខែធ្នូឆ្នាំ២០១៩ក្នុងពិធីប្រគល់អណ្តូងទឹកចំនួន ១៥ អណ្តូង ជូនប្រជាពលរដ្ឋចំនួន ០៩ភូមិ ក្នុងឃុំស្នូល ស្រុកក្រឡាញ់ ដែលជាអំណោយរបស់សមាគម ROTARY អន្តរជាតិ តំបន់ ៣៤៦២ និងតំបន់ ៣៣៥០ ក្លិបរ៉ូតារី ភូលី / ក្លិបរ៉ូតារី សៀមរាប អង្គរ ផ្តល់តាមរយៈឯកឧត្តម អ្នកឧកញ៉ា សៀង ណាំ សមាជិករដ្ឋសភា តំណាងរាស្រ្តមណ្ឌលសៀមរាបនិងជាប្រធានក្រុមការងារខេត្ត ចុះជួយស្រុកក្រឡាញ់ ។
បើតាមលោកស្រី ម៉ននី រង្សី អភិបាលនៃគណៈអភិបាលស្រុកក្រឡាញ់ បានឲ្យដឹងថា ក្នុងឆ្នាំ ២០១៨-២០១៩ កន្លងទៅនេះ ប្រទេសកម្ពុជារបស់យើង បានទទួលរងនូវការប្រែប្រួល អាកាសធាតុយ៉ាងខ្លាំង ពិសេសគឺគ្រោះរំាងស្ងួត បានធ្វើឲ្យប៉ះពាល់យ៉ាងខ្លំាងមកលើជីវភាពរស់នៅរបស់នៅប្រចំាថ្ងៃ របស់ប្រជាពលរដ្ឋនៅតាមទីជនបទ ទើបប្រមុខរាជរដ្ឋាភិបាលកម្ពុជា បានចេញសារាចរណែនាំដល់អ្នកពាក់ ព័ន្ធ គ្រប់ផ្នែកទាំងអស់ ជាពិសេស អាជ្ញាធរមូលដ្ឋានត្រូវយកចិត្តទុកដាក់ថែរក្សាទឹក និង ប្រភពទឹកឱ្យបានល្អព្រោះវានឹងអាចខ្វះទឹកហូបខ្វះទឹកប្រើប្រាស់ប្រចាំថ្ងៃ សម្រាប់ប្រជាជនកម្ពុជាទាំងមូល ដូច្នេះ សូមពុក ម៉ែ បងប្អូន មា មីង និង ក្មួយៗទាំងអស់ ជាពិសេសអ្នកនៅក្នុងស្រុកក្រឡាញ់ ត្រូវយកចិត្តទុកដាក់ពី បញ្ហាទឹក គឺត្រូវចេះសន្សំសំចៃទឹក ធានាឱ្យបានថា ទឹកអាច ប្រើប្រាស់ បាន រហូតដល់រដូវស្សាវិញ រឺរដូវភ្លៀងធ្លាក់មកដល់ ។
កញ្ញា អ៊ឹង ចឺអ៊ី ប្រធានក្លិប រ៉ូតថារី រាជធានីភ្នំពេញតំបន់ ៣៣៥០ដែលជាម្ចាស់ជំនួយ មានប្រសាសន៍ដែរថា អណ្តូងទឹកដែលត្រូវផ្តល់ជូនប្រជាពលរដ្ឋមានចំនួន១៥ស្ថិតក្នុងភូមិចំនួន៩រួមមាន៖ ភូមិតាឡឹង ភូមិតាសែង ភូមិធាស្នា ភូមិតាយិន ភូមិសំរោង ភូមិសង្កែ ភូមិព្រៃលៀង ភូមិតាពេជ្រ និងភូមិស្នួល ក្នុងស្រុកក្រឡាញ់ ខេត្តសៀមរាប ចំានយថវិកាសរុបចំនួន១៦៨៧៥ដុល្លារអាមេរិក ។ ក្នុងនោះកញ្ញាសង្ឃឹមថាការផ្តល់នូវអណ្តូងទឹកនេះ នឹងអាចជួយដល់ជីវភាពរស់នៅរបស់ប្រជាពលរដ្ឋនិងកាត់បន្ថយជំងឺផ្សេងៗមកពីការប្រើប្រាស់ទឹកមិនស្អាត ហើយក៏សង្ឃឹមដែលថានឹងអាចមានគំរោងជំនួយបន្ថែមទៀតជួយដល់ប្រជាជនក្នុងតំបន់ ។
មានប្រសាសន៍សំណេះសំណាលក្នុងឱកាសនោះ ឯកឧត្តម អ្នកឧកញ៉ា សៀង ណាំ បានបញ្ចាក់ថា អណ្តូងទឹកស្អាតពិតជាមានសារសំខាន់ក្នុងការជួយកាត់បន្ថយភាពក្រីក្ររបស់ប្រជាពលរដ្ឋកម្ពុជា ។ ទោះបីកម្ពុជានាពេលបច្ចុប្បន្ន ក្រោមការដឹកនាំរបស់សម្តេចអគ្គមហាសេនាបតីតេជោហ៊ុន សែន បានធ្វើឲ្យប្រទេសកម្ពុជាមានការរីកចំរើន មានមុខមានមាត់នៅលើពិភពលោកក្តី ក៏នៅតាមតំបន់ជនបទមួយចំនួនកំពុងតែជួបប្រទះការខ្វះខាតទឹកស្អាតប្រើប្រាស់ ដែលបញ្ហានេះ វាជាកត្តារាំងស្ទះមួយដល់ការរីកចំរើនរបស់កម្ពុជាផងដែរ។
ឯកឧត្តមមានប្រសាសន៍ទៀតថា អណ្តូងទឹកស្អាតដែលជាអំណោយ ROTARYនាពេលនេះពិតជាបានរួមចំណែកយ៉ាងធំធេងក្នុងការកាត់បន្ថយភាពក្រីក្ររបស់ប្រជាជនកម្ពុជានៅទីជនបទ ។ ឯកឧត្តម បានផ្តាំផ្ញើដល់យាយតា អ៊ុពូមីង បងប្អូនប្រជាពលរដ្ឋទាំងអស់ត្រូវថែរក្សាសុខភាពអនាម័យឱ្យបានគ្រប់ៗគ្នា ជាពិសេសរដូវប្រាំងឈានចូលមកដល់ខាងងមុខនេះត្រូវ ពិសារទឹកដាំពុះ ឬទឹកស្អាត បរិភោគចំណីអាហារត្រូវពិនិត្យពិច័យឱ្យបានត្រឹមត្រូវ ដើម្បីចៀសវាងពីជំងឺរាករុស ដែលនាំឱ្យខូចសុខភាពនិងខាតបង់ថវិកាគ្រួសារក្នុងការពិនិត្យ និងព្យាបាលជំងឹផ្សេងៗ ។
លោក ធួក ណូក តំណាងប្រជាពលរដ្ឋនៅឃុំស្នួលស្រុកក្រឡាញ់ខេត្តសៀមរាប បានសម្តែងក្តីសោមនស្សរីករាយក្រោយពីបានទទួលអណ្តូងទឹកស្អាតពីសមាគម ROTARY អន្តរជាតិ ដែលអណ្តូងនេះមានគុណភាពនិងអាចមានទឹកប្រើប្រាស់គ្រប់រដូវហើយមានអនាម័យទៀត ក្នុងរយៈពេលប៉ុន្មានឆ្នាំនេះ ដោយសារមានការប្រែប្រួលអាកាសធាតុ ក្នុងឃុំពិតជាជួបការលំបាកនិងមានភាពខ្វះខាតទឹកក្នុងការប្រើប្រាស់ ទឹកអណ្តូងនៅតាមប្រឡាយអូរស្រះនិងអណ្តូងត្រូវបានរីងស្ងួតអស់ ជាពិសេសជួបការលំបាកក្នុងការប្រើប្រាស់ប្រចាំថ្ងៃ និងទឹកស្អាត ហើយប្រជាពលរដ្ឋ សន្យាថា នឹងចែកគ្នាប្រើប្រាស់ឱ្យបានគ្រប់ៗគ្នា និងនាំថែរក្សាអណ្តូងទឹកនេះឱ្យបានល្អទៀតផង ។
សូមរំលឹកផងដែរថា៖ក្លិបរ៉ូតតារីសកលដំបូងគេបានបង្កើតឡើងនៅថ្ងៃទី២៣ ខែកុម្ភៈ ឆ្នាំ១៩០៥ ក្នុងទីក្រុងឈីហ្គាហ្គោ នៃរដ្ឋអ៊ីឡាណយសហរដ្ឋអាមេរិក។ក្លិបរ៉ូតថារីរាជធានីភ្នំពេញ(Rotary Club of Phnom Penh Capital) ត្រូវបានបង្កើតឡើងក្នុងឆ្នាំ២០១៦។ក្លឹបរ៉ូតារី ធ្វើសកម្មភាពសប្បុរសជាច្រើន តួយ៉ាងការបរិច្ចាគសម្ភារៈបរិក្ខារពេទ្យនិងរថយន្តសង្គ្រោះបន្ទាន់ដល់មន្ទីរពេទ្យ ជួយឧបត្ថម្ភនិងធ្វើការបរិច្ចាគអង្ករដល់ប្រជាជនដែលរងគ្រោះក្នុងអំឡុងពេលគ្រោះទឹកជំនន់ និងសកម្មភាពមនុស្សធម៌ជាច្រើនទៀត រួមទាំងការងារសង្គមនិងការងារបរិស្ថានអានម័យផងដែរ។
ប្រជាពលរដ្ឋចំនួន ០៩ភូមិ នៅឃុំស្នូលស្រុកក្រឡាញ់ សម្តែងក្តីរីករាយ
ប្រជាពលរដ្ឋចំនួន ០៩ភូមិ នៅឃុំស្នូលស្រុកក្រឡាញ់ សម្តែងក្តីរីករាយនៅពេលទទួលបានអណ្តូងទឹកស្អាតពីសមាគម ROTARY #ព័ត៌មានខេត្តសៀមរាប
Posted by ទូរទស្សន៍ជាតិខេត្តសៀមរាប – TV Siem Reap on Tuesday, December 17, 2019
អត្ថបទ និង រូបភាព៖ យូ វង្ស
កែសម្រួល៖ អ៊ុន ណារាជ្យ
