ឧត្ដមសេនីយនៃកងទ័ពអាកាសអាមេរិក លោក ឆាឡេស ប្រោន (Charles Brown) បាននិយាយថា កាដូបុណ្យណូអែលដែលកូរ៉េខាងជើង អាចនឹងផ្ញើជូនសហរដ្ឋអាមេរិកទំនងជា «ការធ្វើតេស្ដមីស៊ីលអន្តរទ្វីប ICBM» ខណៈសង្រ្គាមពាក្យសម្ដីគំរាមកំហែងដាក់គ្នា ទៅវិញទៅមករវាងប្រទេសទាំងពីរ កំពុងចាប់ផ្ដើមកម្រើកឡើងវិញជាថ្មី។ នេះបើ តាមការចេញផ្សាយដោយសារព័ត៌មាន Japan Times នៅថ្ងៃពុធ ទី១៨ ខែធ្នូ ឆ្នាំ២០១៩។
លោក Charles Brown ដែលជាមេបញ្ជាការកងទ័ពអាកាសអាមេរិកប្រចាំតំបន់ប៉ាស៊ីហ្វិក បានធ្វើការសន្ឋិដ្ឋានដូចខាងលើ កំឡុងកិច្ចពិភាក្សាតុមូលមួយក្នុងទីក្រុងវ៉ាស៊ីនតោន កាលពីថ្ងៃអង្គារសប្ដាហ៍នេះ និងបន្ទាប់ពីក្រុមអ្នកជំនាញជាច្រើនអះអាងដូចៗគ្នាថា ទីក្រុងព្យុងយ៉ាងនឹងបាញ់សាកល្បងមីស៊ីលអន្តរទ្វីប ICBM ក្រោយរបបដឹកនាំលោក គីម ជុងអ៊ុន ធ្វើតេស្ដអាវុធចំនួនពីរលើក នៅឯទីតាំងបាញ់បង្ហោះគ្រាប់រ៉ុក្កែតរយៈចំងាយឆ្ងាយ សូហេ (Sohae) ក្នុងខែធ្នូនេះ។
ក្នុងកិច្ចប្រជុំតុមូលនោះលោក Brown បានគូសបញ្ជាក់យ៉ាងដូច្នេះថា «អ្វីដែលខ្ញុំរំពឹងនោះ គឺកូរ៉េខាងជើងអាចនឹងធ្វើតេស្ដមីស៊ីលរយៈចំងាយឆ្ងាយ ជាកាដូសម្រាប់ថ្ងៃបុណ្យណូអែល… តែបញ្ហានៅត្រង់ថា តើពួកគេនឹងធ្វើតេស្ដកំឡុងរដូវកាលបុណ្យណូអែល ឬចំថ្ងៃបុណ្យណូអែល ឬក៏នៅក្រោយថ្ងៃចូលឆ្នាំសកល»។
គួរបញ្ជាក់ថា យោធាអាមេរិកកំពុងត្រៀមខ្លួន ដើម្បីឆ្លើយតបទៅនឹងរាល់សកម្មភាពបង្ករឿងពីកូរ៉េខាងជើង។ មិនតែប៉ុណ្ណោះអាមេរិកក៏មិនបានបដិសេធដែរ ចំពោះការប្រើប្រាស់យន្ដហោះទម្លាក់គ្រាប់បែក B-1 ឬ B-2 ជាការឆ្លើយតបទៅនឹងការធ្វើតេស្ដអាវុធរបស់កូរ៉េខាងជើង៕
