ឯកឧត្តម ទៀ សីហា អភិបាលខេត្តសៀមរាប មានប្រសាសន៍ថា រសជាតិម្ហូបខ្មែរ គឺមានតម្លៃណាស់ក្នុងការថែរក្សាអត្តសញ្ញាណជាតិ និងជាផ្នែកមួយនៃការរួមចំណែកដល់ការអភិវឌ្ឍវិស័យទេសចរណ៍វប្បធម៌កម្ពុជា ក្នុងនោះដេរឯកឧត្តម ក៏បានបង្ហាញនូវការគាំទ្រ និងពេញចិត្តចំពោះការព្យាយាម របស់ប្រធានសមាគមចុងភៅកម្ពុជា ដែលមានជំហរក្នុងការជម្រុញឲ្យរសជាតិម្ហូបខ្មែរ ក្លាយជាគោលដៅនៃការថែរក្សាអត្តសញ្ញាណជាតិ និងជាផ្នែកមួយដើម្បីរួមចំណែក ដល់ការអភិវឌ្ឍវិស័យទេសចរណ៍វប្បធម៌កម្ពុជា ។ ឯកឧត្តមមានប្រសាសន៍បែបនេះ ក្នុងពេលដែលឯកឧត្តម មានវត្តមានកាត់ខ្សែបូរ សម្ពោធភោជនីយ៍ដ្ឋាន អង្គារដី ម្ហូបបូរាណខ្មែរ នារាត្រីថ្ងៃទី១៧ ខែធ្នូ ឆ្នាំ២០១៩ នៅសង្កាត់ជ្រាវ ក្រុងសៀមរាប ។
លោក ឡុង ប៊ុនហោ ប្រធានសមាគមចុងភៅកម្ពុជា ដែលជាម្ចាស់ភោជនីយ៍ដ្ឋានម្ហូបខ្មែរបូរាណ បាននិយាយថា កម្មវិធីបើកសម្ពោធភោជនីយ៍ដ្ឋានរបស់លោកនាថ្ងៃនេះ គឺជាផ្លែផ្កាដែលកើតចេញពីសេចក្តីព្យាយាមជាច្រើនឆ្នាំកន្លងមក និងជាថ្ងៃដែលក្តីស្រម៉ៃ បានក្លាយជាការពិត ។ ជាពិសេសកន្លងមកលោកក៏ធ្លាប់បានដឹកនាំប្រតិភូចុងភៅកម្ពុជា ទៅចូលរួមប្រកួតប្រជែងជាច្រើនលើកនៅក្រៅប្រទេស ម្ហូបខ្មែរទទួលបានពានជ័យលាភី និងមេដាយជាច្រើន ហើយម្ហូបខ្មែរក៏ត្រូវបានផ្សព្វផ្សាយទៅកាន់អន្តរជាតិ ដូច្នេះលោកមានជំនឿចិត្តថា ម្ហូបខ្មែរ គឺជាគោលដៅនៃការចង់ភ្លក់រសជាតិនៃភ្ញៀវបរទេស និងមានមេចុងភៅបរទេសជាច្រើន ទទួលស្គាល់គុណភាពរសជាតិម្ហូបខ្មែរ ។
លោកបន្តថា នេះគោលបំណងរបស់លោក គឺចង់ឲ្យម្ហូបខ្មែរនឹងត្រូវបានអភិរក្សនៅក្នុងភោជនីយដ្ឋានមួយនេះ ដោយលោកយល់ថាម្ហូបខ្មែរវាជាកម្មវត្ថុនៃការបង្កើតឡើងនូវភោជនីយ៍ដ្ឋាននេះ ដោយក្នុងនោះយើងមានម្ហូប ប្រមាណពី៣០ ទៅ៥០មុខ និងមិនមានប្រភេទម្ហូបបរទេសនោះឡើយ ។ ហើយទាំងនេះក៏មិនគ្រប់គ្រាន់នោះទេ ក្នុងនាមប្រធានសមាគមចុងភៅកម្ពុជា បើអាចមានលទ្ធភាព នឹងស្វែងរកដៃគូ ចងក្រងឯកសារម្ហូបខ្មែរជាផ្លូវការ ដើម្បីរក្សាទុកសម្រាប់កូនចៅជំនាន់ក្រោយ ព្រោះថា រសជាតិនៃម្ហូបខ្មែរ ត្រូវបាននៅជាប់ជាមួយនឹងជីវភាពរស់នៅរបស់ប្រជាជនខ្មែរជាច្រើនជំនាន់ ជាច្រើនសតវត្សកន្លងមកហើយ ហើយដែលអាចនិយាយបានថា រសជាតិនៃម្ហូប គឺជាអត្តសញ្ញាណឆ្លុះបង្ហាញអំពីជីវភាពរស់នៅរបស់ប្រជាជនខ្មែរ ដែលមានតម្លៃជាបេតិកភណ្ឌអរូបី របស់ជាតិ ។
ព័ត៌មានជាតិ ថ្មីៗ
អត្ថបទ និង រូបភាព៖ ងិន គីមឡេង
