នៅវេលាម៉ោងប្រមាណ៩.៥០នាទីព្រឹក ថ្ងៃទី១៨ ខែ ធ្នូ ឆ្នាំ២០១៩នះ លំហាត់សមយុទ្ធទ្រង់ទ្រាយធំគ្រប់គ្រងគ្រោះអាសន្នប្រចាំឆ្នាំ Full Scale Airport_Emergency Exercise ដែលមានឈ្មោះ REPEX-19 នៅក្នុងអាកាសយានដ្ឋានអន្តរជាតិសៀមរាប ។ លំហាត់សមយុទ្ធនេះធ្វើឡើងក្នុងគោលបំណងធ្វើការសាកល្បង ហ្វឹកហ្វឺន និងផ្តល់បទពិសោធន៍ ដល់ស្ថាប័ននានាដែលមានការពាក់ព័ន្ធ សំដៅលើកកម្ពស់ការជួយសង្គ្រោះជនរងគ្រោះបានទាន់ពេលវេលា នៅពេលមានឧបទ្ទវហេតុគ្រោះថ្នាក់ធ្លាក់យន្តហោះ ជាយថាហេតុ ។
នៅក្នុងលំហាត់សមយុទ្ធទ្រង់ទ្រាយធំនេះ មានកង់ឡានចាស់ៗ បង្កើតជាអណ្តាតភ្លើង និងផ្សែងខ្មួលខ្មាញ់ជាសិប្បនិម្មិតនៃការធ្លាក់យន្តហោះ មានការចល័តរថយន្តពន្លត់អគ្គិភ័យ ការដឹកជញ្ជូនរងគ្រោះទៅកាន់មន្ទីរពេទ្យនានា ក្នុងក្រុងសៀមរាប ដែលជាប្រធានបទ នៃការធ្វើលំហាត់សមយុទ្ធទ្រង់ទ្រាយធំនេះ ។
ឯកឧត្តម ទៀ សីហា អភិបាលខេត្ត បានមានប្រសាសន៍ថា លំហាត់សមយុទ្ធនេះ ជាការដាស់ស្មារតី និងការទទួលខុសត្រូវក្នុងដែនសមត្ថកិច្ចរបស់ខ្លួន ដើម្បីធានាសុវត្ថិភាពជូនភ្ញៀវជាតិ និងអន្ដរជាតិ ដែលធ្វើដំណើរតាមយន្ដហោះ ហើយការធ្វើសមយុទ្ធនេះ ត្រូវធ្វើអោយបានតាមប្រតិទិនតាមគ្រោងទុក។
បើតាមគណ:កម្មការរៀបចំ បានឲ្យដឹងថា អ្នកជិះលើយន្តហោះ ចំនួន៧៤នាក់ ត្រូវបានទទួលរងគ្រោះថ្នាក់ទាំងអស់ និងអ្នកនៅលើដី (អ្នកជួយសង្គ្រោះ ) ម្នាក់ត្រូវរងរបួសផងដែរ ក្នងនោះ÷ របួសអាទិភាពទី ១ ចំនួន ១៤នាក់ អាទិភាពទី ២ ចំនួន ១៦នាក់ អាទិភាពទី ៣ ចំនួន ៣៧នាក់ និងស្លាប់ចំនួន ២១នាក់ ក្នុងចំណាត់ការនោះ អ្នករងរបួសត្រូវបានក្រុមការងារបញ្ជូនទៅសង្រ្គោះនៅមន្ទីរពេទ្យរដ្ឋ និងឯកជន ក្នុងខេត្ត និងបញ្ជូនទៅសង្គ្រោះនៅមន្ទីរពេទ្យឯភ្នំពេញចំនួន ៣នាក់ផងដែរ ។
សូមជម្រាបជូនថា លំហាត់សមយុទ្ធទ្រង់ទ្រាយធំនេះ បានរៀបចំឡើងក្នុងរយះពេល២ឆ្នាំម្ដង ដោយអាកាសយានដ្ឋានអន្តរជាតិខេត្តសៀមរាប និងរដ្ឋបាលខេត្តសៀមរាប ដែលមានស្ថាប័នពាក់ព័ន្ធជិត ៣០០នាក់នាក់បានចូលរួម ។ នេះជាការយកចិត្តទុកដាក់ពីសំណាក់ប្រមុខនៃរាជរដ្ឋាភិបាលកម្ពុជា រដ្ឋលេខាធិការដ្ឋានអាកាសចរស៊ីវិលកម្ពុជា និង អាជ្ញាធរខេត្តសៀមរាប សំដៅលើកកម្ពស់ប្រសិទ្ធភាព ក្នុងការជួយសង្គ្រោះជនរងគ្រោះបានទាន់ពេលវេលា ៕
លំហាត់សមយុទ្ធទ្រង់ទ្រាយធំ លើកទី ៦ នៅខេត្តសៀមរាប ត្រូវបានបញ្ចប់
លំហាត់សមយុទ្ធទ្រង់ទ្រាយធំ លើកទី ៦ នៅខេត្តសៀមរាប ត្រូវបានបញ្ចប់ប្រកបដោយជោគជ័យ#ព័ត៌មានខេត្តសៀមរាប
Posted by ទូរទស្សន៍ជាតិខេត្តសៀមរាប – TV Siem Reap on Wednesday, December 18, 2019
អត្ថបទ ៖ លីវ សុខុន
រូបភាព៖ សហការី
