នៅថ្ងៃទី១៨ ខែធ្នូ ឆ្នាំ២០១៩ ក្រុមការងារសមាគមអតីតយុទ្ធជនកម្ពុជាខេត្តសៀមរាប បានប្រគល់ផ្ទះចំនួន ០៤ខ្នង ដល់អតីតយុទ្ធជនក្រីក្រចំនួន ០៤គ្រួសារ ស្ថិតនៅក្នុងស្រុកចំនួន០២ ក្នុងខេត្តសៀមរាប ដែលជាអំណោយដ៏ថ្លៃថ្លារបស់សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា និងជាប្រធានសមាគមអតីតយុទ្ធជនកម្ពុជា។
អតីតយុទ្ធជនក្រីក្រចំនួន ០៤គ្រួសារ ដែលទទួលបានផ្ទះនាពេលនោះរួមមាន៖
១.លោក ពេជ្រ ជា ជាជនពិការ មានកូនចំនួន០៤នាក់ រស់នៅភូមិត្រពំាងខ្នារ ឃុំស្វាយលើ ស្រុកស្វាយលើខេត្តសៀមរាប។
២.លោក ចោម សេនារ៉ា ជាជនបាត់បង់សមត្ថភាព ប្រពន្ធឈ្មោះមឿន ភាន មានកូន០៣នាក់ រស់នៅភូមិជប់លើ ឃុំស្វាយលើ ស្រុកស្វាយលើ ខេត្តសៀមរាប។
៣. លោក សោម សួ ជាជនពិការ ប្រពន្ធឈ្មោះ ឈឺយ សាវី មានកូនចំនួន០៣នាក់ រស់នៅភូមិត្រពំាងឬស្សី ឃុំបឹងមាលា ស្រុកស្វាយលើ ខេត្តសៀមរាប។
៤.អ្នកស្រី ហ៊ាន ហាន ជានិវត្តជន ប្តីស្លាប់ មានកូនចំនួន ០៤នាក់ រស់នៅភូមិប្រលាន ឃុំពពេល ស្រុកសូទ្រនិគម ខេត្តសៀមរាប។
នាពេលកន្លងមក សម្តេចតេជោ និងសម្តេចគតិព្រឹទ្ធបណ្ឌិត ប៊ុនរ៉ានី ហ៊ុនសែន តែងតែយកចិត្តទុកដាក់ និងគិតគូខ្ពស់ចំពោះគ្រួសារអតីតយុទ្ធជនពិការនៅទូទាំងប្រទេស។ ដើម្បីបុព្វហេតុថែរក្សា និងការពារសុខសន្តិភាពសម្រាប់ជាតិមាតុភូមិ ពួកគាត់បានបូជាសាច់ស្រស់ឈាមស្រស់ និងបានបាត់បង់នូវកាយសម្បទា ដែលជាគុណបំណាច់មិនអាចកាត់ថ្លៃបានឡើយ។
អត្ថបទ និង រូបភាព៖ ថាច់ ពិសុទ្ធ
កែសម្រួលអត្ថបទ៖ សេង ផល្លី
