ព្រឹកថ្ងៃទី១៩ ខែធ្នូ ឆ្នាំ២០១៩នេះ វេទិកាផ្សព្វផ្សាយ និងពិគ្រោះយោបល់ របស់ក្រុមប្រឹក្សាខេត្កសៀមរាបអាណត្តិទី៣ គោលដៅទី៥ ត្រូវបានរៀបចំនៅក្នុងបរិវេណវត្តខ្នារធ្នង់ ឃុំគោកធ្លកក្រោម ស្រុកជីក្រែង ខេត្តសៀមរាប ដើម្បីលើកកម្ពស់គណនេយ្យភាព តម្លាភាព ការឆ្លើយតប និងការចូលរួមរបស់ប្រជាពលរដ្ឋគ្រប់ស្រទាប់វណ្ណៈ ហើយនេះក៏ជាយន្តការមួយ ពង្រឹងនីតិរដ្ឋ អភិបាលកិច្ចល្អនៅមូលដ្ឋាន របស់ក្រុមប្រឹក្សាថ្នាក់ក្រោមជាតិ។
វេទិកាផ្សព្វផ្សាយ និងពិគ្រោះយោបល់នេះ ប្រព្រឹត្តទៅក្រោមអធិបតី ឯកឧត្តម អ៊ាន ឃុន ប្រធានក្រុមប្រឹក្សាខេត្តសៀមរាបស្តីទី លោក ពៅ ពិសិដ្ឋ អភិបាលរងខេត្ត តំណាងឯកឧត្តម ទៀ សីហា អភិបាលខេត្តសៀមរាប និងវត្តមាន ឯកឧត្តម លោកជំទាវសមាជិក សមាជិកាក្រុមប្រឹក្សាខេត្ត ក្រុមប្រឹក្សាស្រុកជីក្រែង និងស្រុកស្វាយលើ លោក លោកស្រីអភិបាល អភិបាលរងស្រុកជីក្រែង និងស្រុកស្វាយលើ កងកម្លាំងប្រដាប់អាវុធ ព្រមទាំងបងប្អូនប្រជាពលរដ្ឋ លោកគ្រូ អ្នកគ្រូ សិស្សានុសិស្សសរុប ៦៥៩នាក់ ស្រី ១៥៧នាក់ ក្នុងនោះស្រុកជីក្រែង ចំនួន ៣៨៤នាក់ ស្រី ១០៩នាក់ ស្រុកស្វាយលើ ចំនួន១៨៩នាក់ ស្រី ៣៦នាក់ , ក្រុមការងាររដ្ឋបាលខេត្ត និងវាគ្មិនតំណាងមន្ទីរ អង្គភាពជុំវិញខេត្តចំនួន ៦៥នាក់ ស្រី ៩នាក់ បានចូលរួម ។
ព័ត៌មានជាតិ ថ្មីៗ
ជារួម អង្គវេទិកាផ្សព្វផ្សាយ និង ពិគ្រោះយោបល់នាថ្ងៃនេះ ទទួលបាន និងលើកជាសំណួរសំណូមពរ អំពីទុក្ខកង្វល់របស់ពួកគាត់នៅតាមមូលដ្ឋាន ដោយបានផ្តោតទៅលើបញ្ហា ហេដ្ឋារចនាសម្ព័ន្ធ (សុំសាងសង់សាលាឃុំ, ) បញ្ហាព្រៃឈើ (សុំឲ្យប្រជាការពារ និង ប្រជាពលរដ្ឋចូលរួមការពារព្រៃឈើ និង ការសុំភ្ជួរដីអាស្រ័យផលលើដីចំការ ) បញ្ហាបរិស្ថាន ការងារអប់រំ (សុំឲ្យមានការថែទាំសម្ភារៈកុំព្យូទ័រនៅតាមសាលានិងសាងសង់អគារសិក្សា ) បញ្ហាតម្លៃកសិផលរបស់កសិករ បញ្ហាធារាសាស្ត្រ (ជីកស្រះ .ទំនប់ ប្រព័ន្ធប្រឡាយ ) បញ្ហាអគ្គិសនី និង សុំឲ្យអាជ្ញាធរជាតិអប្សរារក្សាសាលាឃុំនៅកន្លែងដដែល ។
មានមតិបូកសរុបនិងបិទអង្គវេទិកានោះ ឯកឧត្តម អ៊ាន ឃុន ក៏បានធ្វើការថ្លែងអំណរគុណ ពីការចូលរួមរបស់សមាជិក សមាជិកានៃអង្គវេទិកាទាំងមូល អាចនិយាយបានថា ជាកម្លាំងចលករជំរុញឲ្យមានការអភិវឌ្ឍ តាមបែបប្រជាធិបតេយ្យនៅថ្នាក់ក្រោមជាតិ កាន់តែមានល្បឿនទៅមុខ ហើយនេះក៏ជាសកម្មភាព ធ្វើឲ្យថ្នាលលទ្ធិប្រជាធិបតេយ្យនៅកម្ពុជា កាន់តែចាក់ឫសជ្រៅនៅសហគមន៍មូលដ្ឋាន ។
អង្គវេទិកាអស់ រយៈពេលពេញមួយព្រឹកនេះ ជាសញ្ញាវិជ្ជមានថ្មីបន្ថែមទៀត ចំពោះ កិច្ចខិតខំប្រឹងប្រែង ក្នុងកិច្ចពិគ្រោះយោបល់ ពិភាក្សា ដើម្បីពិនិត្យ ពិចារណា និង ធ្វើការឆ្លុះបញ្ចាំងទៅលើសមិទ្ធផលដែលសម្រេចបាន និង បញ្ហាប្រឈមក្នុងឆ្នាំ២០១៩ និង គម្រោងសកម្មភាពជាអាទិភាពសម្រាប់ឆ្នាំ២០២០របស់រដ្ឋបាលខេត្តសៀមរាប។ ក្នុងនោះឯកឧត្តមក៏បានជំរុញដល់មន្ទីរជំនាញ និង សមត្ថិកិច្ចពាក់ព័ន្ធ ចុះធ្វើការផ្សព្វផ្សាយពីច្បាប់ព្រៃឈើ និង ធ្វើការទប់ស្កាត់ បង្រ្កាបឲ្យខាងតែបាន ចំពោះការកាប់ទន្ទ្រានព្រៃឈើ ដែលធ្វើឲ្យប៉ះពាល់បរិស្ថានធនធានធម្មជាតិ និង បាត់បង់ជម្រកសត្វព្រៃ។
អត្ថបទ និង រូបភាព៖ សហការីមន្ទីរ និង ម៉ី សុខារិទ្ធ
កែសម្រួលអត្ថបទ៖ សេង ផល្លី
