ប្រធានាធិបតីអាមេរិកលោក ដូណាល់ ត្រាំ បាននិយាយថា នៅតែមានពេលវេលាដ៏អស្ចារ្យ នៅលើ ឆាកកិត្តិយស ដើម្បីថ្លែងសារទៅកាន់អ្នកគាំទ្រ បើទោះជាលោកត្រូវបាន សភាតំណាងរាស្ត្រគ្រប់ គ្រងដោយគណបក្សប្រជាធិបតេយ្យ បោះឆ្នោតដំណើរការនីតិវិធីដកតំណែងលោកជាផ្លូវការក៏ ដោយ។ នេះបើតាមការចេញផ្សាយ ដោយសារព័ត៌មាន BBC នៅព្រឹកថ្ងៃព្រហស្បតិ៍ ទី១៩ ខែធ្នូ ឆ្នាំ២០១៩។
ថ្លែងនៅចំពោះមុខអ្នកគាំទ្រនៅឯរដ្ឋ មីឈីហ្គែន (Michigan) លោក ត្រាំ បានគូសបញ្ជាក់ យ៉ាងដូច្នេះថា «ខ្ញុំគឺជាមនុស្សដំបូងគេបំផុត ដែលត្រូវបានគេចោទប្រកាន់ និងដំណើរការនីតិ វិធីដកតំណែង ទាំងដែលមិនបានប្រព្រឹត្តបទឧក្រិដ្ឋអ្វីទាំងអស់ ហើយខ្ញុំហ៊ាននិយាយថា បក្សប្រជាធិបតេយ្យបានមើលស្រាល លើនីតិវិធីដកតំណែងប្រធានាធិបតី… ដ្បិតប្រធានាធិបតី គឺជាតំណែងមួយដ៏ពិសិដ្ឋ តើសមដែរឬទេអ្នកដែលកំពុងកាន់តំណែងនេះ ហើយត្រូវបានគេចោទ ប្រកាន់ដោយគ្រាន់តែនិយាយទូរស័ព្ទ»។
គួរជម្រាបថា លោក ដូណាល់ ត្រាំ ត្រូវបានគេចោទប្រកាន់ថាបានរំលោភអំណាច តាមរយៈកា រ ដាក់សម្ពាធឱ្យអ៊ុយក្រែន ឱ្យបើកការ ស៊ើបអង្កេតពីបទពុករលួយប្រឆាំងនឹងលោក Joe Biden ដែលត្រូវបានគេរំពឹងថានឹងក្លាយជាគូប្រជែងដ៏ធំរបស់លោក នៅក្នុងការបោះឆ្នោតនៅខែវិច្ឆិកា ឆ្នាំ២០២០ខាងមុខនេះ៕
