នាថ្ងៃទី១៩ ខែធ្នូ ឆ្នាំ២០១៩ នៅបរិវេណមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តសៀមរាប មានរៀបចំទិវាជនមានពិការភាពកម្ពុជាលើកទី២១ និងទិវាជនមានពិការភាពអន្តរជាតិលើកទី៣៧ ក្នុងទិសដៅលើកកម្ពស់ការយល់ដឹងទាំងផ្នែកស្មារតី ផ្គត់ផ្គង់សម្ភារៈ ដល់ជនមានពិការភាពនៅកម្ពុជា និងបន្តសហប្រតិបត្តិការជាមួយអាជ្ញាធរមូលដ្ឋាន មន្ទីរ អង្គភាពពាក់ព័ន្ធនានា ព្រមទាំងបណ្តាអង្គការក្នុង និងក្រៅរដ្ឋាភិបាល។
តាមសេចក្តីប្រកាសរបស់អង្គការសហប្រជាជាតិ ថ្ងៃទី០៣ ខែធ្នូ ត្រូវបានកំណត់យក ជាថ្ងៃទិវាជនមានពិការភាពអន្តរជាតិ ហើយឆ្នាំនេះគឺជាខួបលើកទី២១ នៃទិវាជនមានពិការកម្ពុជា ដែលស្របនឹងខួបលើកទី៣៧ នៃទិវាជនមានពិការអន្តរជាតិ ក្រោមប្រធានបទ”លុបបំបាត់ឧបសគ្គរារាំងជនមានពិការភាពដើម្បីសង្គមមួយប្រកបដោយបរិយាបន្ន” ។
ក្នុងរបាយការណ៍សង្ខេបរបស់មន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត ស្ដីពីសកម្មភាពវិស័យពិការភាពនៅក្នុងខេត្តសៀមរាប បានបង្ហាញថា ខេត្តសៀមរាប មានជនមានពិការភាពសរុបចំនួន ៧,៤៧៩នាក់ ក្នុងនោះជនមានពិការភាព ដែលកំពុងបានទទួលរបបគោលនយោបាយពីរាជរដ្ឋាភិបាលកម្ពុជា មានសរុបចំនួន ២,១៤១នាក់ ប្រពន្ធ ១,៧៩៩នាក់ កូន ១,៩៣៩នាក់ អ្នកបម្រើការងារ ១០១ នាក់។
ព័ត៌មានជាតិ ថ្មីៗ
ក្នុងរបាយការណ៍ដដែល បានបង្ហាញថា ជនមានពិការភាព ទទួលបាន ការផ្តល់សេវាស្តារលទ្ធភាពពលកម្មកាយសម្បទា ដោយឥតគិតថ្លៃ ក្នុងឆ្នាំ២០១៩ ទទួលបាន ការបំពាក់ជើងសិប្បនិម្មិតលើជង្គង់ ចំនួន ១៩គ្រឿង ការបំពាក់ជើងសិប្បនិម្មិតក្រោមជង្គង់ចំនួន ១០៣គ្រឿង ការបំពាក់ដៃសិប្បនិម្មិតចំនួន ០១ គ្រឿង ការបំពាក់រណបជើងចំនួន ៣៣ គ្រឿង ឈើជ្រែងឃ្លៀកចំនួន ៣៣ គ្រឿង រទេះរុញ ចំនួន ១៤ គ្រឿង ការជួសជុលជើងគ្រប់ប្រភេទ ចំនួន ១,០០៣ គ្រឿង ការជួសជុលរណបគ្រប់ ប្រភេទចំនួន ៤១គ្រឿង ការជួសជុលរទេះរុញគ្រប់ប្រភេទ ចំនួន ៤៥គ្រឿង អ្នកជំងឺព្យាបាលដោយចលនា ចំនួន ២៧២នាក់ និងចំនួន នៃព្យាបាលចំនួន ១,៨៥១ដង។ ដោយឡែក មន្ទីរបានទទួលប្រកាសទទួលស្គាល់ជនពិការ ដើម្បីទទួលបានរបបគោលនយោបាយចំពោះជនពិការក្រីក្រ នៅតាមសហគមន៍ ស្រុកប្រាសាទបាគង ក្នុងខេត្តសៀមរាប ចំនួន ៩១៧នាក់ ក្នុងនោះ កម្រិតធ្ងន់ទទួលបានរបប ២០,០០០រៀលក្នុង១ខែ រយៈ១២ខែក្នុង១ឆ្នាំ ចំនួន ៥៧៩នាក់, កម្រិតមធ្យមទទួលបានរបប ២០,០០០៛ ក្នុង១ខែ រយៈពេល៦ខែក្នុង១ឆ្នាំចំនួន ៣៣៨នាក់។ ក្រៅពីនោះ មន្ទីរបានប្រគល់ រទេះរុញចំនួន ២៥ គ្រឿង ជូន ជនមានពិការភាពក្នុងខេត្តសៀមរាប ដែលជាអំណោយរបស់ព្រះមហាក្សត្រ នៃព្រះរាជាណាក្រថៃ ។
ឆ្លៀតក្នុងឱកាសនោះ ឯកឧត្តម ទេស ច័ន្ទគិរី សមាជិកក្រុមប្រឹក្សាខេត្តសៀមរាប ក៏បានអានសារលិខិតទាំងស្រុង របស់សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា និងជាប្រធានកិត្តិយសក្រុមប្រឹក្សាសកម្មភាពជនពិការ ក្នុងឱកាសសន្និបាតបូកសរុបការអនុវត្តផែនការយុទ្ធសាស្ត្រជាតិ ស្តីពីពិការភាព២០១៤-២០១៨ និងប្រកាសដាក់ឲ្យប្រើប្រាស់ជាផ្លូវការផែនការយុទ្ធសាស្ត្រជាតិស្តីពីពិការភាព២០១៩-២០២៣ ដែលបានបង្ហាញពីការខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការជួយដល់ជនមានពិការភាព ទៅលើជីវភាព ការអប់រំ និងលើកកម្ពស់សិទ្ធសេរីភាពជាដើម ឲ្យមានភាពស្មើគ្នា ចៀសផុតពីការរើសអើង ដើម្បីចូលរួមអភិវឌ្ឍន៍ប្រទេសជាតិ ប្រកបដោយសុខសន្តិភាព និងរីកចម្រើនទៅមុខបន្ថែមទៀត។
អត្ថបទ និង រូបភាព៖ យូ វង្ស
កែសម្រួលអត្ថបទ៖ សេង ផល្លី
