លោកស្រីឧត្ដមសេនីយ៍ត្រី ដួង ថាវរី ស្នងការរងនគរបាលខេត្តសៀមរាប បានមានប្រសាសន៍ថា ក្រោយទទួលបានព័ត៌មានតាមបណ្តាញទំនាក់ទំនងសង្គមហ្វេសប៊ុក និង ប្រព័ន្ធផ្សព្វផ្សាយមួយចំនួន កាលពីថ្ងៃទី១៨ ខែធ្នូ ឆ្នាំ២០១៩ ម្សិលមិញនេះ ដែលបានសរសេរថា ម្ដាយចាញ់បៀរអស់ខឹងកូនចាក់អង្ករលេង ចាប់វាយកូនជាំពេញខ្លួនហើយ ហើយម្ដាយក្មេងនោះបានយកដែកមកវាយក្មេងនោះចំក្បាលធ្វើឲ្យពក ក្មេងស្រីនេះទើបតែមានអាយុ៣ឆ្នាំ តែម្ដាយក្មេងស្រីតែងតែវាយធ្វើបាបក្មេងស្រីរូបនេះ នៅពេលដែលចាញ់បៀរម្ដងៗ រួចមក កម្លាំងសមត្ថកិច្ចនគរបាលខេត្តសៀមរាប សហការជាមួយនឹងមន្ត្រីជំនាញពាក់ព័ន្ធ និង អាជ្ញាធរមូលដ្ឋាន បានចុះធ្វើការស្រាវជ្រាវរកអាសយដ្ឋានរបស់ស្ត្រីនោះចាប់ពីពេលរសៀលរហូតដល់ម៉ោងប្រមាណ១០និង៣០នាទីយប់ ទើបរកផ្ទះស្ត្រីនោះឃើញ គឺស្ថិតនៅក្នុងភូមិទ្រាំង សង្កាត់ស្លក្រាម ក្រុងសៀមរាប ប៉ុន្តែម្ចាស់ផ្ទះមិនបាននៅឡើយ ហើយខណៈពេលដែលម្ចាស់ផ្ទះមិននៅ ស្របពេលដែលវេលាយប់ផងនោះ សមត្ថកិច្ចបានផ្ដាំផ្ញើដល់អ្នកជិតខាង នៅពេលឃើញម្ចាស់ផ្ទះ សូមប្រាប់គាត់ឲ្យចូលខ្លួនស្រាយបំភ្លឺនៅប៉ុស្តិ៍នគរបាលរដ្ឋបាលសង្កាត់ស្លក្រាម នៅថ្ងៃទី១៩ ខែធ្នូ ជាកំណត់ ។
លោកស្រីឧត្ដមសេនីយ៍ត្រី ដួង ថាវរី មានប្រសាសន៍បន្ថែមថា លុះវេលាម៉ោង០៨និង៤០នាទីព្រឹក ថ្ងៃទី១៩ ខែធ្នូ ឆ្នាំ២០១៩ ព្រឹកមិញនេះ ស្ត្រីដែលជាប់សង្ស័យថាបានវាយកូនស្រីខ្លួនឯង បានចូលមកបំភ្លឺនៅប៉ុស្តិ៍នគរបាលរដ្ឋបាលសង្កាត់ស្លក្រាម ដែលស្ត្រីនោះមានឈ្មោះ ម៉ី រ៉ាវី អាយុ១៩ឆ្នាំ មានមុខរបរស៊ីឈ្នួលលាងចាន ហើយគាត់បានបញ្ជាក់ថា រូបគាត់មិនបានលេងបៀរចាញ់ រួចវាយធ្វើបាបកូនរបស់គាត់ដូចអ្វីដែលគេបង្ហោះនៅលើបណ្ដាញសង្គមនោះឡើយ រីឯមូលហេតុដែលធ្វើឲ្យគាត់ជ្រុលដៃវាយកូនរបស់គាត់ដោយដង្គៀបចាប់ភ្លើងនោះ គឺដោយសារតែខឹងនឹងកូនរបស់គាត់ គឺកូនទី០២ ឈ្មោះ យឺម រក្សា ភេទស្រី អាយុ៤ឆ្នាំ បានចាក់អង្ករលេងធ្វើឲ្យទទឹក ហើយនៅចំពោះមុខសមត្ថកិច្ច អ្នកស្រី ម៉ី រ៉ាវី បានធ្វើកិច្ចសន្យាបញ្ឈប់ការប្រើអំពើហិង្សាលើកូនរបស់ខ្លួនទៀតផង ។
បើតាមការបំភ្លឺរបស់ឈ្មោះ ម៉ី រ៉ាវី បានបញ្ជាក់ថា នៅថ្ងៃទី១៨ ខែធ្នូ ឆ្នាំ២០១៩ វេលាម៉ោង១៣ រូមគាត់និងកូន២នាក់ បានដេកបំបៅកូននៅលើអង្រឹង ចំណែកកូនឈ្មោះ រក្សា ឲ្យគេងនៅក្រោមអង្រឹង ប្រហែលកន្លះម៉ោងក្រោយកូនដែលកំពុងបំបៅបានភ្ញាក់ ហើយគាត់ក៏ភ្ញាក់ដែរ ហើយបានរកកូនឈ្មោះ រក្សា ស្រាប់តែឃើញគេកំពុងលេងអង្ករជាមួយទឹក បណ្ដាលឲ្យអង្ករសើមអស់ ហើយគាត់គិតថាវាដួសលេងបន្តិច ប៉ុន្តែពេលបើកធុងអង្ករមើលដែលមានចំនួន៧គីឡូក្រាម ត្រូវសើមអស់ ឃើញទឹកពេញធុង បណ្ដាលឲ្យគាត់មានចិត្តខឹងខ្លាំងពេក បានទាញដង្កៀបចាប់ភ្លើងពីដៃកូនដែលកំពុងលេង យកមកវាយចំនួន៣ដង្កៀប ត្រូវជើងឆ្វេង ហើយដៃឆ្វេងចំនួន៣ដង្កៀប ធ្វើឲ្យកូនរើបំរាស់ ។
ព័ត៌មានជាតិ ថ្មីៗ
អ្នកស្រី ម៉ី រ៉ាវី បានបញ្ជាក់ទៀតថា បន្ទាប់មកឈប់វាយ គាត់បានឲ្យកូនដេកលើអង្រឹងវិញ ហើយបានចេញមកអង្គុយលេងជាមួយអ្នកជិតខាង នៅខាងក្រៅផ្ទះ ក៏ត្រូវបានចាស់ទុំប្រដៅណែនាំ ដែលពេលនោះធ្វើឲ្យគាត់មានការស្ដាយក្រោយជាខ្លាំង បន្ទាប់មកដើរចូលទៅក្នុងផ្ទះវិញ ដើម្បីយកប្រេងកូឡាមកលាបលើស្នាមរបួស ពេលនោះទើបគាត់ដឹងថា មានស្នាមរបួសក្រោយខ្នងចំនួន២ដង្កៀបទៀត និងមានស្នាមជាំនៅលើក្ដោងច្រមុះ បន្ទាប់មកគាត់បានដាក់ដាំបាយដោយយកអង្ករដែលសើមមកចំអិន ដើម្បីយកមកស្អំលើរបួសស្នាម ។
សូមបញ្ជាក់ថា អ្នកស្រី ម៉ី រ៉ាវី មានកូនចំនួន០៣នាក់នៅក្នុងបន្ទុក គឺកូនទី០១ ឈ្មោះ យឺម រ៉ាយុ ភេទប្រុស អាយុ៥ឆ្នាំ មិនទាន់បានចូលរៀន , កូនទី០២ ឈ្មោះ យឺម រក្សា ភេទស្រី អាយុ៤ឆ្នាំ និង កូនទី០៣ ឈ្មោះ យឺម សារ៉ាក់ ភេទប្រុស អាយុ៨ខែ មានមុខរបរដើរស៊ីឈ្នួលលាងចាន ឬជួយលក់ដូរ ដើម្បីបានកម្រៃខ្លះមកចិញ្ចឹមខ្លួន និងក្រុមគ្រួសារ ចំណែកប្ដីឈ្មោះ យឺម យន អាយុ៤០ឆ្នាំ មានមុខរបរធ្វើសំណង់ ៕
អត្ថបទ ៖ លោក ហេង វន្នី
រូបថត ៖ សមត្ថកិច្ចនគរបាលខេត្តសៀមរាប
កែសម្រួលអត្ថបទ ៖ លោក លីវ សាន្ត
