លោកវរៈសេនីយ៏ឯក តូច សុគន្ធ នាយការិយាល័យស៊ើបអង្កេត និងអនុវត្តនីតិវិធី បានឲ្យដឹងថា នៅវេលាម៉ោង០៨ និង៣០នាទី ព្រឹកថ្ងៃទី២០ ខែធ្នូ ឆ្នាំ២០១៩នេះ កម្លាំងការិយាល័យស៊ើបអង្កេត និងអនុវត្តនីតិវិធីនៃស្នងការដ្ឋាននគរបាលខេត្តសៀមរាប បានទទួលជនបរទេសម្នាក់ពីអធិការដ្ឋាននគរបាលស្រុកពួក ពាក់ព័ន្ធនឹងករណីលួចឆ្លងដែនស្នាក់នៅខុសច្បាប់ ។
លោកវរៈសេនីយ៏ឯក តូច សុគន្ធ បានឲ្យដឹងទៀតថា ជនបរទេសរូបនេះមានឈ្មោះ LAIDUCDIEP ភេទប្រុស កើតថ្ងៃទី០១ ខែមករា ឆ្នាំ១៩៧១ ជាជនជាតិវៀតណាម ហើយបើតាមការសាកសួររបស់កម្លាំងសមត្ថកិច្ច ជនបរទេសរូបនេះចូលមកព្រះរាជាណាចក្រកម្ពុជា កាលពីថ្ងៃទី១៧ ខែធ្នូ ឆ្នាំ២០១៩ តាមច្រកជ្រៃធំដោយពុំមានឯកសារឆ្លងដែន ក្នុងគោលបំណងធ្វើដំណើរទេសចរណ៍ ហើយក៍ធ្វើដំណើរដោយជិះម៉ូតូទៅកាន់ក្រុងប៉ោយប៉ែតខេត្តបន្ទាយមានជ័យ និងបានបន្តដំណើរមកដល់ចំនុចភូមិសរស្តម្ភ ឃុំសរស្តម្ភ ស្រុកពួកខេត្តសៀមរាប នៅវេលាម៉ោងប្រហែលម៉ោង២១ និង៣០នាទី ថ្ងៃទី១៩ ខែធ្នូ ឆ្នាំ២០១៩ នៅពេលដែលជនបរទេសរខាងលើបានចូលសុំផ្ទះប្រជាពលរដ្ឋស្នាក់នៅ ក៍ត្រូវបានសមត្ថកិច្ចធ្វើការឃាត់ខ្លួនដើម្បីសួរនាំ បន្ទាប់ពីសួរនាំរួចរាល់សមត្ថកិច្ចក៏បានបញ្ជូនខ្លួនជនបរទេសខាងលើមកកាន់ការិយាល័យជំនាញខេត្តតែម្ដង ។
លោកវរៈសេនីយ៏ឯក បញ្ជាក់ថា បច្ចុប្បន្នកម្លាំងសមត្ថកិច្ចនគរបាលការិយាល័យស៊ើបអង្កេត និងអនុវត្តនីតិវិធីចាត់បញ្ជូនជនបរទេសរូបនេះបណ្ដោះអាសន្ន ដើម្បីចាត់ការបន្តតាមនីតិវិធីបន្ត ៕
អត្ថបទ និង រូបភាព៖ ថាច់ ពិសុទ្ធ
កែសម្រួល៖ អ៊ុន ណារាជ្យ
