កំណាត់ស្ទឹងតាស៊ូ ជាដៃរបស់ស្ទឹងសៀមរាប ហូរកាត់ ឃុំចំនួន៣ ក្នុងស្រុកបន្ទាយស្រី ខេត្តសៀមរាប ត្រូវរងការបំផ្លាញយ៉ាងធ្ងន់ធ្ងរ ដោយសារការដ្ឋានបូមខ្សាច់ចំនួន៥កន្លែង ធ្វើការបូមខ្សាច់រំលោភលើមាត់ស្ទឹងមួយនេះ នេះបើតាមការឲ្យដឹងតាម ពីលោក ឃឹម ហ្វីណង់ អភិបាលស្រុកបន្ទាយស្រី នៅព្រឹកថ្ងៃទី២០ខែធ្នូ ឆ្នាំ២០១៩។
លោកអភិបាលស្រុក បានបញ្ជាក់តាមទូរសព្ទឲ្យភ្នាក់ព័ត៌មានបានដឹងថា ក្នុងចំណោមការដ្ឋានបូមខ្សាច់ទាំង៥ មានការដ្ឋានបូមខ្សាច់២កន្លែង បានរំលោភធ្ងន់ធ្ងរដោយបិទមុខស្ទឹងទាំងស្រុង និងបានបង្ហូរទឹកភក់ចូលទៅក្នុងស្ទឹងវិញដោយផ្ទាល់។ ការដ្ឋានទាំង នោះ ក៏បានចាក់លុបធ្វើផ្លូវឆ្លងស្ទឹងដោយខុសច្បាប់ ដោយមិនមានដាក់លូតាមស្តង់ដាបច្ចេកទេស ធ្វើឲ្យមុខទឹករួមតូច។ ការដ្ឋានមួយចំនួនទៀត បានអនុវត្តន៍ខុសពីលក្ខខណ្ឌអនុញ្ញាត ដោយបានរំកិលទីតាំងពីនៅក្បែរស្ទឹង មកនៅជាប់មាត់ស្ទឹង រឺនៅលើស្ទឹងតែម្ដង។ ដោយឡែក ការដ្ឋានបូមខ្សាច់ មួយក្នុងចំណោម៥នោះ បានប្រតិបត្តិការដោយមិនមានអាជ្ញាប័ណ្ណ ក្រោមលេសជួយស្តារស្ទឹង អស់រយៈពេលជាង ២ឆ្នាំមកហើយ។ ការខូចខាតប្រភពទឹកស្ទឹងនេះ បានធ្វើឲ្យប៉ះពាល់ទិន្នផលស្រូវក្នុងមូលដ្ឋាននេះ ធ្លាក់ចុះមកនៅក្រោម ១តោន ក្នុង១ហិកតា រីឯបរិមាណត្រីក្នុងស្ទឹងមានការធ្លាក់ចុះ និងសត្វពាហនៈក៏មិនអាចផឹកបានដែរ។
តាមការបញ្ជាក់បន្ថែមរបស់លោកអភិបាលស្រុក អាជ្ញាធរស្រុកបន្ទាយស្រី បានទុកឱកាសឲ្យម្ចាស់ការដ្ឋានទាំង៥ ចូលខ្លួនមកដោះស្រាយ។ ក្នុងនោះ អាជ្ញាធរស្រុកបានកំណត់ លក្ខខណ្ឌទី១ ពួកគេត្រូវស្តារភក់ក្នុងស្ទឹងចេញវិញ ឲ្យស្អាតដូចដើម។ លក្ខខណ្ឌទី២ ត្រូវរៀបចំធ្វើយ៉ាងណា ឲ្យច្រាំងស្ទឹងមានទម្រង់ដូចដើមវិញ។ ប្រសិនបើពួកគេនៅតែបន្ត គេចខ្លួន អាជ្ញាធរនឹងធ្វើការរឹបអូសគ្រឿងចក្រ ហើយកសាងសំណុំរឿងបញ្ជូនទៅតុលាការ ព្រមទាំងបិទអាជីវកម្មបូមខ្សាច់នេះជាស្ថាពរ។
ព័ត៌មានជាតិ ថ្មីៗ
តាមការឲ្យដឹងពីប្រជាពលរដ្ឋនៅមូលដ្ឋាន បាននិយាយថា ទីតាំងបូមខ្សាច់ នៅស្រុកបន្ទាយស្រី ជាច្រើនកន្លែង បានកើតមានតាំងពីជំនាន់ អភិបាលស្រុកមុនៗមកម្ល៉េះ ខ្លះមានអាយុកាលជិត១០ឆ្នាំមកហើយ។
សូមរំលឹកថា នៅក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្កសៀមរាបអាណត្តិទី៣ គោលដៅទី៥ ដែលបានរៀបចំនៅស្រុកអង្គរធំ ថ្ងៃទី០៩ ខែធ្នូ ឆ្នាំ២០១៩ និងមានការចូលរួមពីប្រជាពលរដ្ឋ មកស្រុកអង្គរធំ និងស្រុកបន្ទាយស្រី បានស្នើដល់អង្គវេទិកា ជួយបញ្ឈប់ការដ្ឋានបូមខ្សាច់ទាំងនោះ ដើម្បីស្ដារបរិស្ថាន និងប្រភពទឹកនៅក្នុងស្រុកទាំងពីរនេះ។
អត្ថបទ និង រូបភាព៖ គឿន វេត
កែសម្រួលអត្ថបទ៖ សេង ផល្លី
