អាជ្ញាធរជាតិអប្សរា៖ សត្វព្រៃកម្ររស់នៅក្នុងព្រៃឧទ្យានអង្គរ មានការតាមដានដោយកាមេរ៉ាសុវត្ថិភាព

តាំងពីឆ្នាំ២០១៣ អង្គការសម្ពន្ធមិត្តសត្វព្រៃ (WILDLIFEALLIANCE) សហការជាមួយអាជ្ញាធរជាតិអប្សរា និងរដ្ឋបាលព្រៃឈើ បានយកព្រៃឧទ្យានអង្គរ ជាទីតាំងសម្រាប់ព្រលែងសត្វព្រៃកម្រនិងជិតផុតពូជចំនួន៥ប្រភេទ។

តាមការបញ្ជាក់របស់ឯកឧត្តម យិត ចាន់ដារដ្ឋ អគ្គនាយករងអាជ្ញាធរជាតិអប្សរា ឲ្យដឹងថា រយៈពេល៦ឆ្នាំកន្លងមកនេះសត្វព្រៃកម្រនិងជិតផុតពូជចំនួន៥ប្រភេទរួមមាន សត្វទោចម្កុដចំនួន៨ក្បាល (២ក្បាលកំពុងផ្ស៉ាំ) ឈ្លូស៤ក្បាល សំពោចក្រអូប៥ក្បាល សត្វភេ៥ក្បាល និងស្វាព្រាហ្មណ៍១២ក្បាល ត្រូវបានយកមកផ្ស៉ាំ និងព្រលែងឲ្យរស់នៅក្នុងព្រៃឧទ្យានអង្គរ ក្រោមការមើលថែយ៉ាងល្អប្រសើរ។

ឯកឧត្តម បញ្ជាក់ថា ចំពោះការថែទាំសត្វព្រៃកម្រទាំង៥ប្រភេទនេះ មានភ្នាក់ងារបំពេញការងារជាប្រចាំពីរនាក់ រួមនិងកាមេរ៉ាសុវត្ថិភាព សម្រាប់តាមដានសកម្មភាពសត្វ និងសកម្មភាពយាយីពីជនខិលខូច។ មិនតែប៉ុណ្ណោះ ក៏មានការចុះតាមដានដោយផ្ទាល់ពីអង្គការសម្ពន្ធមិត្តសត្វព្រៃយ៉ាងតិច១ខែម្តង ដើម្បីតាមដានពីសុខភាពសត្វផងដែរ។

ព័ត៌មានជាតិ ថ្មីៗ

វិស័យទូរគមនាគមន៍ក្នុងខេត្តសៀមរាប មានបញ្ហាប្រឈម ក្នុងពេលកំពុងមានការអនុវត្តគម្រោងស្ថាបនាផ្លូវ៣៨ខ្សែ

19/01/2021

លោកជំទាវ កិត្តិសង្គហបណ្ឌិត ឃួន សុដារី៖ ចំណងមិត្តភាពជាប្រពៃណីដ៏យូរលង់ និងជាដៃគូរយុទ្ធសាស្ត្រគ្រប់ជ្រុងជ្រោយ រវាងកម្ពុជា-ចិន មានលក្ខណៈពិសេស ហើយធន់នឹងវិបត្តិ និងហេតុការណ៍ផ្សេងៗ

19/01/2021

ប្រភពសត្វទាំងនេះ ខ្លះយកមកពីឧទ្យានភ្នំតាម៉ៅ និងខ្លះទៀតយកមកពីកោះក្រពី ខេត្តកោះកុង។ ពួកវាត្រូវបានយកមកព្រលែងនៅទីតាំងសំខាន់ចំនួន៣ ក្នុងរមណីយដ្ឋានអង្គរដូចជា នៅខ្លោងទ្វារខ្មោច ខ្លោងទ្វារតាកាវ និងប្រាសាទតានៃ ដែលមានព្រៃស៊ុបទ្រុប សុវត្ថិភាពសម្រាប់ការស់នៅរបស់ពួកគេ។

នៅក្នុងតំបន់អង្គរ ក្រៅពីមានសត្វព្រៃកម្រទាំង៥ប្រភេទនេះ ក៏មានសត្វជាច្រើនប្រភេទដែលបានរស់នៅតាំងពីយូរហើយដែរដូចជា ពស់ កាំប្រម៉ា អណ្ដើក មាន់ព្រៃ ស្វា សត្វបក្សីជាច្រើនប្រភេទ។ល។ ហើយជាចក្ខុវិស័យទៅអនាគត អាជ្ញាធរជាតិអប្សរា អង្គការសម្ពន្ធមិត្តសត្វព្រៃ និងរដ្ឋបាលព្រៃឈើ ក៏មានគម្រោងយកសត្វព្រៃជាច្រើនប្រភេទខុសគ្នាមានក្ងោក បក្សី សត្វកម្រ សត្វចតុបាទ មកព្រលែងនៅក្នុងតំបន់អង្គរបន្ថែមទៀត ដើម្បីទាក់ទាញទេសចរ និងធម្មជាតិក្នុងតំបន់រមណីយដ្ឋានអង្គរឲ្យកាន់តែស្រស់បំព្រងបន្ថែមទៀត៕

អត្ថបទនិង រូបភាព៖ ខេង ឧត្តម
កែសម្រួល៖ សេង ផល្លី