វេលាម៉ោងប្រមាណ ៩យប់ ថ្ងៃទី២១ ខែធ្នូ ឆ្នាំ២០១៩ មានគ្រោះថ្នាក់ចរាចរណ៍ ២ករណីកើតឡើង នៅលើកំណាត់ផ្លូវជាតិលេខ៦ ស្ថិតក្នុងភូមិខ្នារ សង្កាត់ជ្រាវ ក្រុងសៀមរាប ចំណុចច្រកចូលបុរីសៀងណាំ និងខាងមុខសណ្ឋាគារអង្គរ អេរ៉ា។
ករណីទីមួយ គ្រោះថ្នាក់រវាង រថយន្តសណ្ដោង ដឹករថយន្តរបស់ក្រុមហ៊ុននីសាន់ ជាមួយរថយន្តដឹកទំនិញ ប្រភេទទម្ងន់៥តោន ករណីនេះ រថយន្តសណ្ដោង ដឹករថយន្តរបស់ក្រុមហ៊ុននីសាន់ មានទិសដៅត្រង់ពីលិចទៅកើត រីឯ រថយន្តដឹកទំនិញ ប្រភេទទម្ងន់៥តោន មានទិសដៅពីកើតទៅលិច និងបានបុកគ្នានៅចំណុចច្រកចូលបុរីសៀង ណាំ បណ្ដាលរថយន្តដឹកទំនិញ ប្រភេទទម្ងន់៥តោនក្រឡាប់មួយចំហៀង ។
ដោយឡែក ករណីទីពីរកើតឡើងនៅចំណុចក្បែរនឹងករណីទីមួយ បង្កដោយស្ត្រីម្នាក់បើកបររថយន្ត ឡិចស៊ីស ៥៧០ ពណ៌ខ្មៅ ចេញពីពិធីជប់លៀងមង្គលការ និងប្រើប្រាស់ទូរស័ព្ទកំពុងបើកបរ បណ្ដាលឲ្យបានរ៉េចង្កូត ទៅបុកខឿនពុះចែកទ្រូងផ្លូវ ខាងមុខសណ្ឋាគារអង្គរ អេរ៉ា។
ព័ត៌មានជាតិ ថ្មីៗ
លោកវរៈសេនីយ៍ឯក ជឹម សុវណ្ណ នាយការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តសៀមរាប បានបញ្ជាក់តាមទូរសព្ទឲ្យអ្នកព័ត៌មានដឹងថា ករណីគ្រោះថ្នាក់ចរាចរណ៍ ទាំងពីរនេះ ពុំបង្កឲ្យមានគ្រោះថ្នាក់ដល់អាយុជីវិតឡើយ។ ចំណែករថយន្តបង្ក ដែលជាប់ពាក់ព័ន្ធក្នុងករណីទាំងពីរនេះ ត្រូវសមត្ថកិច្ចនាំយកទៅស្នងការដ្ឋាននគរបាលខេត្តសៀមរាប ចាត់ការតាមនីតិវិធី។
អត្ថបទនិង រូបភាព៖ គឿន វេត
កែសម្រួល៖ សេង ផល្លី
