នៅថ្ងៃទី២២ ខែធ្នូ ឆ្នាំ២០១៩ វេលាម៉ោងប្រមាណ ១០ព្រឹក កម្លាំងប៉ូលិសប្រឆាំងបទល្មើសសេដ្ឋកិច្ចនៃ ស្នងការដ្ឋាននគរបាលខេត្តសៀមរាប បង្រ្កាបបានរថយន្តដឹកឈើ ០១គ្រឿង ធ្វើដំណើរចេញមកពីរខេត្តព្រះវិហារ ទៅកាន់ខេត្តបន្ទាយមានជ័យ ។
ប្រតិបត្តិការនេះ សមត្ថកិច្ចជំនាញ បានធ្វើការឃាត់រថយន្តដឹកឈើ ម៉ាកសាំយ៉ុងពណ៌ស ពាក់ស្លាកលេខ សៀមរាប 2A.7978 នៅត្រង់ចំណុចខាងលិចរមណីដ្ឋានកែច្នៃ ភូមិវប្បធម៌។ លុះនៅវេលាម៉ោង១២រសៀលថ្ងៃដដែល សមត្ថកិច្ចជំនាញក៏បានស្រាវជ្រាវរកឃើញ រថយន្តម៉ាកតូយ៉ូតា ដឹកទ្វារសន្លឹក ពាក់ស្លាកលេខ សៀមរាប 1115.SR2 មួយគ្រឿងទៀត។
តាមការឲ្យដឹងតាមទូរសព្ទពី លោក ម៉ុង ប៊ុនលីម នាយខណ្ឌរដ្ឋបាលព្រៃឈើខេត្តសៀមរាប វត្ថុតាងដែលសមត្ថកិច្ចឃាត់បានរួមមានរថយន្តពីរគ្រឿង ឈើអារប្រភេទលេខមួយ(សុក្រម) ៤០០សន្លឹក និងទ្វារកែច្នៃរួច ចំនួន ៣០សន្លឹក និងបានយកទៅរក្សាទុកនៅរដ្ឋបាលព្រៃឈើបន្ទាយស្រី។
អត្ថបទនិង រូបភាព៖ គឿន វេត
កែសម្រួល៖ សេង ផល្លី
