ពិធីបើកវិញ្ញាសារប្រឡងជ្រើសរើសនាយទាហាន ក្នុងខេត្តសៀមរាប

នៅវិទ្យាល័យអង្គរ ខេត្តសៀមរាប ព្រឹកថ្ងៃទី ២២ ខែ ធ្នូ ឆ្នាំ២០១៩ ទីចាត់ការហ្វឹកហ្វឺន អគ្គបញ្ជាការនៃកងយោធពលខេមរភូមិន្ទ និងកងយោធភូមិភាគទី៤ បានធ្វើការបើកវិញ្ញាសារ ប្រឡងជ្រើសរើស វគ្គនាយទាហានសកម្មជំនាន់ទី២៤ , វគ្គនាយទាហានជើងគោកជំនាន់ទី១២ វគ្គនាយទាហាន បន្តវេនជំនាន់ទី១៣ និង វគ្គនាយទាហានជំនាញបច្ចេកទេសយោធា។

ការប្រឡងនេះ ក្រោមវត្តមានអញ្ជើញចូលរួមកាត់កញ្ចប់វិញ្ញាសាររបស់ឯកឧត្តមឧត្តមសេនីយ៍ឯក ពៅ ហេង មេបញ្ជាការយោធភូមិភាគទី៤ លោក លី សំរិទ្ឋ អភិបាលរងនៃគណៈអភិបាលខេត្តសៀមរាប លោកឧត្តមសេនីយ៍ទោ ជិន សាបឿន នាយករងទីចាត់ការហ្វឹកហ្វឹន អគ្គបញ្ជាការដ្ឋាននៃកងយុទ្ឋពលខេមរៈភូមិន្ទ និងជាប្រធានមណ្ឌលប្រឡងភូមិភាគ៤ ព្រមទាំងវត្តមានអញ្ជើញចូលរួមពីសំណាក់ មេបញ្ជាការរងយោធភូមិភាគទី៤ លោកលោកស្រីជាគណៈមេប្រយោគផងដែរ ។

មានប្រសាសន៍ក្នុងឱកាសបើកវិញ្ញាសារប្រឡងនោះ លោកអភិបាលរងខេត្ត បានបញ្ជាក់ថា ការប្រឡងនេះពុំមានបែកធ្លាយវិញ្ញាសារ និងពុំមានស៊ីសំណូកសូកប៉ាន់អ្វីឡើយ។ ហេតុនេះ សូមបេក្ខជនត្រូវពឹងលើសមត្ថភាពចំណេះដឹងផ្ទាល់ខ្លួន ពោលអ្នកចេះគឺជាប់ ម៉្យាងទៀតការប្រឡងជ្រើសរើសមន្ត្រីក្របខណ្ឌកងយោធពលខេមរភូមិន្ទពេលនេះ ជាឱកាសដ៏ប្រពៃ ដែលបេក្ខជនបានបង្ហាញពី សមត្ថភាព ចំណេះដឹង ដើម្បីរួមចំណែក ការពារ និង កសាងអភិវឌ្ឍន៍ប្រទេសជាតិ បន្តវេនពីរៀមច្បងយើង ។

លោកអភិបាលរងខេត្ត បន្តថា ថ្វីបើប្រទេសជាតិយើងមានសុខសន្តិភាពពេញលេញក៏ដោយក្តី ក៏យើងនៅតែត្រូវការកងទ័ព ដើម្បីជារបងការពារប្រជាពលរដ្ឋ ការពារសមិទ្ឋផល ដែលសង្គមជាតិយើងទទួលបាន ឱ្យស្ថិតស្ថេរគង់វង្សរឹងមាំយូរអង្វែងតទៅមុខទៀត។ ក្នុងនោះ ទព័ជាកម្លាំងស្នូលរបស់ប្រទេសជាតិ កត្តាចាំបាច់ដែលប្រទេសជាតិត្រូវការមាន គឺកងទ័ពគ្រប់ប្រភេទ ខ្លាំងពូកែ ប្រកបដោយវិន័យ សីលធម៌ គុណភាព និង ជាកម្លាំងរួមចំណែក ការពារ និងកសាងអភិវឌ្ឍន៍ប្រទេសលើគ្រប់វិស័យ ។

តាមរបាយការណ៍យរបស់លោកឧត្តមសេនីយ៍ទោ ជិន សាបឿន នាយករងទីចាត់ការហ្វឹកហ្វឹន អគ្គបញ្ជាការដ្ឋាននៃកងយុទ្ឋពលខេមរៈភូមិន្ទ និងជាប្រធានមណ្ឌលប្រឡងភូមិភាគ៤ បានឲ្យដឹងថា៖ បេក្ខជនទាំងពីរភេទ ដែលបានដាក់ពាក្យចូលប្រឡងបំពេញក្របខណ្ឌ កងយោធពលខេមរភូមិន្ទ នៅភូមិភាគទី៤នេះ មានចំនួន ១,៥៦៦នាក់ ក្នុងនោះស្រី ៦៥៥នាក់ ចែកចេញជា៦៤បន្ទប់ប្រឡង មកពីខេត្តចំនួន៤ គឺខេត្តសៀមរាប កំពង់ធំ ព្រះវិហារ និង ខេត្តឧត្តរមានជ័យ។ វិញ្ញាសារ បេក្ខជនត្រូវប្រឡងនោះ មានវិញ្ញាសារចំណេះដឹងទូទៅ វិញ្ញាសារកីឡា និង ភាសារអង់គ្លេស ។ បេក្ខជន ដែលប្រឡងជាប់នឹងត្រូវទៅពិនិត្យសុខភាព និងបញ្ជាក់លិខិតថ្កោលទោស និងបំពេញឯកសារបែបទមួយចំនួនទៀតនៅរាជធានីភ្នំពេញ ក្រោយមកទើបអាចចូលទៅសិក្សាវគ្គបណ្តុះបណ្តាលជំនាញនៅតាមសាលាហ្វឹកហ្វឺននាយទាហាននានានៅក្នុងប្រទេស។

អត្ថបទនិង រូបភាព៖ យូ វង្ស
កែសម្រួល៖ សេង ផល្លី