លោកម៉ែន វុទ្ធី នាយសង្កាត់រដ្ឋបាលព្រៃឈើស្វាយលើ បានឲ្យដឹងថា នារសៀលថ្ងៃទី២០ ខែធ្នូ ឆ្នាំ២០១៩ សមត្ថកិច្ចចម្រុះខេត្តសៀមរាប បានឃាត់ខ្លួនជនសង្ស័យចំនួន ០៤នាក់ ក្នុងនោះមានជនជាតិវៀតណាម ៣នាក់ និងខ្មែរម្នាក់ ដោយសារតែជនសង្ស័យខាងលើ បានធ្វើសកម្មភាពលួចចូលទៅខួងយករ៉ែក្រោមដីមានតម្លៃ ក្នុងតំបន់ព្រៃពូជឈើធ្នង់ ។
លោកម៉ែន វុទ្ធី ឲ្យដឹងទៀតថា ប្រតិបត្តិការដែលធ្វើឡើងនាពេលនេះដែរ ដោយមានការដឹកនាំដោយលោក សាត ពៅ អភិបាលរងស្រុកស្វាយលើ សហការជាមួយកម្លាំងកងរាជអាវុធហត្ថស្រុក និងកម្លាំងអធិការដ្ឋាននគបាលស្រុកស្វាយលើ ដោយក្នុងករណីនេះសមត្ថកិច្ចចម្រុះបានធ្វើការដកហូតម៉ាស៊ីនខួងរ៉ែចំនួន ២គ្រឿង និងសម្ភារ:ផ្សេងៗមួយចំនួនទៀត ដែលជនសង្ស័យបានប្រើសម្រាប់ចូលខួងរករ៉ែនៅចំណុចភ្នំ១០០ក្នុងភូមិពពេល ឃុំតាសៀម ស្រុកស្វាយលើ ខេត្តសៀមរាប ។
លោកបន្តថា ជនសង្ស័យទាំង៤នាក់រួមមាន ទី១ ឈ្មោះ វៀង ឌឹកវិន ភេទប្រុស អាយុ២៧ឆ្នាំ ជនជាតិវៀតណាម ,ទី២ ឈ្មោះ តឹង វឹងងី ភេទប្រុស អាយុ៥៤ឆ្នាំ ជនជាតិវៀតណាម ,ទី៣ ឈ្មោះ តឹង វឹងដាក ភេទប្រុស អាយុ២០ឆ្នាំ ជនជាតិវៀតណាម និងទី៤ ឈ្មោះ ទឹង សិត ភេទប្រុស អាយុ១៩ឆ្នាំ ជនជាតិខ្មែរ ហើយក្នុងនោះដែរជនសង្ស័យបានសារភាពថា ពួកគេមកលួចធ្វើជិត១សប្តាហ៍ ដោយខួងបានចំនួន២អណ្តូងក្នុងជម្រៅជិត៥០ម៉ែត្រ ហើយរ៉ែដែលរកបានជាប្រភេទរ៉ែដែក និងស្ពាន់ ។
ព័ត៌មានជាតិ ថ្មីៗ
លោកបញ្ជាក់ទៀតថា ចំពោះវត្ថុតាងដែលបានរឹបអូសត្រូវបានយកមករក្សាទុកនៅសាលាស្រុកស្វាយលើបណ្ដោះអាសន្ន រីឯជនសង្ស័យទាំង ៤នាក់ត្រូវបានបញ្ជូនខ្លួនមកកាន់តុលាការនារសៀលថ្ងៃទី២០ ខែធ្នូ ឆ្នាំ២០១៩ដដែលនេះ ដើម្បីចាត់ការបន្តតាមផ្លូវច្បាប់ ។ ហើយក្នុងនោះដែរមជ្ឍដ្ឋានពលរដ្ឋក្នុងស្រុក ក៏បានសាទរទៅនឹងចំណាត់ការរបស់អាជ្ញាធរស្រុកស្វាយលើ ដែលបានចុះទប់ស្កាត់ការរុករានរ៉ែមានតម្លៃក្រោមដីរបស់ខ្មែរ ដែលដូនតាបានបន្សល់ទុក បានទាន់ពេល ៕
សមត្ថកិច្ចចម្រុះខេត្តសៀមរាបឃាត់ខ្លួនជនជាតិវៀតណាម៣នាក់ និងខ្មែរម្នាក់ ករណី……
សមត្ថកិច្ចចម្រុះខេត្តសៀមរាបឃាត់ខ្លួនជនជាតិវៀតណាម៣នាក់ និងខ្មែរម្នាក់ ករណីលួចខួងរករ៉ែក្នុងតំបន់ភ្នំ១០០#ព័ត៌មានខេត្តសៀមរាប
Posted by ទូរទស្សន៍ជាតិខេត្តសៀមរាប – TV Siem Reap on Friday, December 20, 2019
អត្ថបទនិង រូបភាព៖ ទ្រា ពន្លឺ
កែសម្រួល៖ អ៊ុន ណារាជ្យ
