ថ្លែងនៅក្នុងកិច្ចប្រជុំបូកសរុប និងវាយតម្លៃលទ្ធផលការងារអប់រំយុវជន និងកីឡា ឆ្នាំសិក្សា២០១៨-២០១៩ និងលើកទិសដៅឆ្នាំសិក្សា២០១៩-២០២០ ដែលរៀបចំធ្វើឡើងនៅការិយាល័យអប់រំយុវជន និងកីឡាស្រុកពួកខេត្តសៀមរាប នាព្រឹកថ្ងៃទី២០ ខែធ្នូ ឆ្នាំ២០១៩ លោក ស៊ិន ចាន់ថុល អភិបាល នៃគណៈអភិបាលស្រុកពួក មានប្រសាសន៍ថា តាមការពិនិត្យទៅលើបណ្តាញសង្គមហ្វេសប៊ុកបច្ចុប្បន្នឃើញថាយុវជន និងសិស្សានុសិស្សមួយចំនួនបានសរសេរអក្សរខុសច្រើនទាំងអក្ខរាវីរុទ្ឋ និងទាំងអត្ថន័យ ហើយភាគច្រើនសំណេររបស់ពួកគាត់ តែងសរសេរទៅតាមការស្តាប់ច្រើនជាងការបានឃើញបានអាននៃពាក្យទាំងនោះ ។
លោកបន្តថា ក្នុងនោះការងារទាំងនេះ វាពឹងផ្អែក និងផ្តើមចេញពី លោកគ្រូអ្នកគ្រូទាំងអស់គ្នាក្នុងការជួយតម្រង់ទិស និងកែពួកគាត់ទាំងអស់គ្នា លើសពីនេះលោកគ្រូអ្នកគ្រូខ្លួនឯងក៍ត្រូវប្រុងប្រយ័ត្ននូវអាកប្បកិរិយា ឥរិយាបទសំដីសំដៅ និងសិលធម៌ក្នុងទីសាធារណៈរបស់ខ្លួន ឱ្យបានសមរម្យក្នុងនាមយើងជាគំរូសម្រាប់ពួកគាត់ ក្នុងគោលបំណងរួមតែមួយរបស់យើងចំពោះសិស្ស គឺជួយដល់ពួកគាត់ឱ្យមានចំណេះដឹងប្រកបដោយគុណភាពពិតប្រាកដ ។ ក្នុងនោះដែរ លោកអភិបាលស្រុក ក៏បានជំរុញដល់មន្ត្រីអប់រំ និងលោកគ្រូអ្នកគ្រូក្នុងស្រុកពួកទាំងអស់ ត្រូវជួយទប់ស្កាត់នូវភាពអសកម្ម និងបញ្ហាដែលអាចនាំឱ្យសិស្សធ្លាក់ទៅក្នុងអំពើអបាយមុខ ក្មេងទំនើង និងអំពើពាលាអាវាសែ ផ្សេងៗ។
បើតាមរបាយការណ៍របស់ លោក កែ វណ្ណនី ប្រធានការិយាល័យអប់រំយុវជននិងកីឡាស្រុកពួកខេត្តសៀមរាប បានឲ្យដឹងដែរថា ក្នុងឆ្នាំសិក្សា២០១៨-២០១៩ ការងារអប់រំក្នុងស្រុកពួកទទួលបានលទ្ធផលគួរឲ្យកត់សម្គាល់ ជារួមអនុវិស័យបឋមសិក្សាអត្រាពិតចូលរៀនថ្មី៩៨,៩៩% អត្រាឡើងថ្នាក់៩១.៨៣% អត្រាត្រួតថ្នាក់៤.៨០% និងអត្រាបោះបង់២,៧៧% អនុវិស័យមធ្យមសិក្សាអត្រាឡើងថ្នាក់៨៥.១៧% អត្រាត្រួតថ្នាក់៥.៤២% និងអត្រាបោះបង់៩.៨១១អនុវិស័យអប់រំក្រៅប្រព័ន្ធ ផ្នែកអក្ខរកម្មអត្រាទាំងបីឡើងថ្នាក់ ត្រួតថ្នាក់ និងបោះបង់គឺ៨៨.៨៤% ៧.១៤% និង៤.០២% ផ្នែកចូលរៀនឡើងវិញអត្រាទាំងបីគឺ ៨២.៩៦% ១៧.០៤១ និង០.០០% និងផ្នែកកម្មវិធីសមមូលអត្រាទាំងបីគឺ១០០% ០០% និង០០% ។
លោក កែ វណ្ណនី បន្តថា សមិទ្ធផលសម្រេចបានខាងលើនេះ វាពិតជាបង្ហាញយ៉ាងប្រត្យក្សពីការខិតខំប្រឹងប្រែងរបស់យើងទាំងអស់គ្នា ប្រកបដោយស្មារតីទទួលខុសត្រូវតាមតួនាទី និងភារកិច្ច និងទាមទារឲ្យមន្ត្រីអប់រំគ្រប់លំដាប់ថ្នាក់គិតគូអំពីអភិក្រម្យទូទាំងវិស័យពាក់ព័ន្ធនឹងការពង្រីកកាលានុវត្តភាព លើគ្រប់ការដ្ឋានអនុវិស័យដើម្បីឲ្យសក្តិសមជាមន្ត្រីអប់រំស្ថិតក្នុងសម័យបដិវត្តឧស្សាហកម្ម ។
ក្នុងនោះបើតាមរបាយការណ៍របស់ការិយាល័យអប់រំស្រុក បានបង្ហាញទៀតថា ក្នុងឆ្នាំសិក្សា២០១៩-២០២០ ក្នុងស្រុកពួកមានមានសាលាមត្តេយ្យសិក្សាចំនួន៥៥ មានសិស្ស៤,០៨៩នាក់ ស្រី២,០១៣នាក់ចែកចេញជា១៣២ថ្នាក់ និងមានមត្តេយ្យសហគមន៏១៨កន្លែង ១៨ថ្នាក់ មានសិស្ស៤៣៧ ស្រី២២៩នាក់ សាលាបឋមសិក្សាចំនួន៦៣ មានសិស្ស១៨,៨៧៣នាក់ ស្រី៨,៩៩៨នាក់ចែកចេញជា៥៤៨ថ្នាក់ និងសាលាមធ្យមសិក្សាចំនួន១៤ មានសិស្ស ១០,៤៨៩នាក់ ស្រី៥,៨១៨នាក់ចែកចេញជា២១៣ថ្នាក់ ក្នុងនោះមានវិទ្យាល័យ៣ និងអនុវិទ្យាល័យ១១ និងមានបុគ្គលិកក្របខ័ណ្ឌសរុបចំនួន១,០៩០នាក់ ស្រី៦៥០នាក់ និងគ្រូជាប់កិច្ចសន្យាចំនួន២៨៤នាក់ ស្រី២១០នាក់ ៕
អត្ថបទ និង រូបភាព៖ យូ វង្ស
កែសម្រួល៖ អ៊ុន ណារាជ្យ
