យ៉ាងហោចណាស់ ប៊ីចេងក្លែងក្លាយ ចំនួន១៨តោន សញ្ញា “វែកក្រហម” ត្រូវបានសមត្ថកិច្ចជំនាញ រកឃើញនៅ ចំណុចផ្ទះលេខ១១១ ក្នុងបុរីមួយកន្លែង ស្ថិតក្នុងភូមិខ្នារ សង្កាត់ជ្រាវ ក្រុងសៀមរាប ដែលជាទីតាំងផលិតវេចខ្ចប់ និងចែកចាយ នៅថ្ងៃទី១៨ ខែធ្នូ ឆ្នាំ២០១៩។
ការចុះប្រតិបត្តិការនេះ មានការចូលរួមពីកម្លាំងនគរបាលប្រឆាំងបទល្មើសសេដ្ឋកិច្ចខេត្តសៀមរាប សហការជាមួយកម្លាំងនគរបាលក្រសួងមហាផ្ទៃ និងដឹកនាំសម្របសម្រួលពីសំណាក់លោក សំរឹទ្ធ សុខុន ព្រះរាជអាជ្ញារងអមសាលាដំបូងខេត្តសៀមរាប។
សមត្ថកិច្ច បានឲ្យដឹងថា ម្ចាស់ទីតាំងផលិតវេចខ្ចប់ និងចែកចាយ ប៊ីចេងក្លែងក្លាយនេះ មានឈ្មោះ ហ៊ិម មនោរី ភេទស្រី អាយុ៣៧ឆ្នាំ រស់នៅក្នុងមូលដ្ឋានកើតហេតុខាងលើ។ ក្រោយធ្វើការពិនិត្យរួចរាល់ លោកព្រះរាជ្ញារងខេត្តសៀមរាប បានបញ្ជាឲ្យមន្ត្រីនគរបាលយុត្តិធម៌ ធ្វើការឃាត់ខ្លួនម្ចាស់ទីតាំងនោះ នាំទៅការិយាល័យប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្តសៀមរាប ដើម្បីចាត់ការតាមផ្លូវច្បាប់។
គួររំលឹកថា នេះជាលើកទី២ហើយក្នុងឆ្នាំ២០១៩ ដែលសមត្ថកិច្ចបានចុះបង្ក្រាបទីតាំងចែកចាយផលិតក្លែងក្លាយក្នុងសង្កាត់ជ្រាវ ក្រុងសៀមរាប។ លើកទី១ ធ្វើឡើងនៅថ្ងៃទី៣០ ឧសភា ឆ្នាំ២០១៩ ស្ថិតនៅផ្ទះល្វែងបុរីមួយកន្លែង ក្នុងភូមិខ្នារ សង្កាត់ជ្រាវ ក្រុងសៀមរាប ដោយបង្ក្រាបបានផលិតផលនំក្មេងក្លែងម៉ាក រួមមាន ទី១ នំStick Biscuit កញ្ចប់ពណ៌ក្រហម លឿង ចំនួន ៤ពាន់៤៨០កញ្ចប់ ,ទី២ សំបកវេចខ្ចប់ Good Taste (លឿង ខៀវ) ចំនួន០៨គីឡូក្រាម ,ទី៣ សំបកវេចខ្ចប់ Good Taste (លឿង បៃតង) ចំនួន១៨គីឡូក្រាម ,ទី៤ នំសរសៃមឹក (មិនទាន់វេចខ្ចប់) ១១គីឡូក្រាម ,ទី៥ មីសេះក្រហម ៤៨កេស ស្មើ២ពាន់៤០០កញ្ចប់គ្មានការបរិច្ឆេត ,ទី៦ នំពាក់កណ្តាលការផលិត ស្មើ ៥៧៨គីឡូក្រាម ,ទី៧ សំបកវេចខ្ចប់ Showka ពណ៌លឿង ១៤គីឡូក្រាម និងទី៨ នំកងបំពង់មឹករួច ដែលមិនទាន់វេចខ្ចប់ ចំនួន ២៣ការុងធំ ។
