បើតាមសមត្ថកិច្ចស្រុកប្រាសាទបាគងបានឲ្យដឹងថា កាលពីវេលា ម៉ោង១៦ និង៣០នាទី ថ្ងៃទី ១៧ ខែធ្នូ ឆ្នាំ២០១៩នេះ មានគ្រោះថ្នាក់ចរាចរមួយបានកើតឡើង រវាងម៉ូតូ និងគោយន្តកន្ត្រៃ បើកបរស្របទិសគ្នា នៅត្រង់ចំណុចភូមិតាភោក ឃុំបាគង ស្រុកប្រាសាទបាគងខេត្តសៀមរាប ។
សមត្ថកិច្ចបានឲ្យដឹងទៀតថា មុនពេលកើតហេតុមានម៉ូតូម៉ាកហុងដាសេ១២៥ សេរី០១២ ពណ៌ខ្មៅ ពាក់ផ្លាកលេខសៀមរាប១C ៧៣៩៦ បើកបរដោយឈ្មោះ អឺ ម៉ៅ ភេទស្រី អាយុ៥២ឆ្នាំ សញ្ជាតិខ្មែរ មានទីលំនៅភូមិរលួសលិច ឃុំរលួស ស្រុកប្រាសាទបាគង ខេត្តសៀមរាប បើកបរដោយស្ថានភាពស្រវឹង បានបើកបរម៉ូតូក្នុងទិសដៅ ពីជើងទៅត្បូង លុះមកដល់កន្លែងកើតហេតុបានបើកទៅបុកនឹងគោយន្តកន្រ្តៃមួយគ្រឿងពីក្រោយ ដែលជារបស់ឈ្មោះ ប្រោះ បញ្ញា ភេទប្រុស អាយុ២៨ឆ្នាំ មានទីលំនៅក្នុងភូមិក្បូន ឃុំខ្ចាស់ ស្រុកសូទ្រនិគម ខេត្តសៀមរាប ដែលបើកបរក្នុងទិសដៅស្របគ្នា ក្រោយពេលកើតហេតុរួចអ្នកបេីកគោយន្តកន្ត្រៃបានគេចខ្លួនបាត់ ។
សមត្ថកិច្ចបញ្ជាក់បន្ថែមថា មូលហេតុដែលបណ្ដាលឲ្យមានគ្រោះថ្នាក់ចរាចរនេះ ដោយសារតែស្រ្តីជាជនរងគ្រោះបើកបរក្នុងស្ថានភាពស្រវឹង ក្រោយកើតហេតុសមត្ថកិច្ចបានចុះទៅដល់កន្លែងកើតហេតុ និងបានធ្វើការវាស់ធ្វេីកំណត់ហេតុហើយបានដកហូតយកវត្ថុតាងយកមករក្សាទុកនៅអធិការស្រុកប្រាសាទបាគងបណ្ដោះអាសន្នដេីម្បីរងចាំការដេាះស្រាយបន្តតាមនីតិវិធីនៅពេលក្រោយ ចំនែកស្រ្តីរងគ្រោះត្រូវបានបញ្ជូនទៅមន្ទីរពេទ្យបង្អែកខេត្តសៀមរាប តែដោយសារស្ថានភាពធ្ងន់ធ្ងរស្រ្តីរងគ្រោះក៏បានស្លាប់ ហើយក៏បានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី ៕
ព័ត៌មានជាតិ ថ្មីៗ
អត្ថបទ និង រូបភាព ៖ ថាច់ ពិសុទ្ធ
កែសម្រួល ៖ អ៊ុន ណារាជ្យ
