បន្ទាប់ពីទទួលបានថវិកាពីអង្គកឋិនទានកាលពីពេលថ្មីៗកន្លងទៅ ដោយមានការផ្តួចផ្តើមដោយ ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប និងលោកជំទាវ ឯកឧត្តមអ្នកឧកញ៉ា សៀង ណាំ សមាជិករដ្ឋសភា តំណាងរាស្រ្តមណ្ឌលសៀមរាប និងជាប្រធានក្រុមការងារខេត្តចុះជួយស្រុកក្រឡាញ់ និង លោកជំទាវ ព្រមទាំងសមាជិក សមាជិកា អាជ្ញាធរមូលដ្ឋានគ្រប់លំដាប់ថ្នាក់និងបងប្អូនប្រជាពលរដ្ឋ ក្នុងស្រុកក្រឡាញ់ទាំងមូលផងនោះ នៅព្រឹកថ្ងៃទី១៦ ខែធ្នូ ឆ្នាំ២០១៩នេះ ផ្លូវគ្រួសក្រហមមួយ ០១ខ្សែ ប្រវែង ៦១៥ ម៉ែត ទទឹង ៥,១ ម៉ែត្រ ស្ថិតក្នុងភូមិសំពៅលូន ឃុំក្រឡាញ់ ស្រុកក្រឡាញ់ ដែលចំណាយថវិកាចំនួន៦៥៥០០ដុល្លារ ក្នុងនោះ ជាង៤ម៉ឹនដុល្លារសម្រាប់ថ្លៃបេតុង ជាថវិកាបានមកពីអង្គកឋិន ដោយឡែកថ្លៃដែក ថ្ម ថ្លៃពលកម្ម ចាក់ដីបង្ហាប់គ្រឺះ និងសេវាផ្សេងៗទៀតជាការបរិច្ចាកថវិកាផ្ទាល់របស់ឯកឧត្តម អ្នកឧកញ៉ា សៀង ណាំ និងលោកជំទាវត្រូវបានបើកការដ្ឋានសាងសង់ចាក់បេតុងអាមេ ។
តំណាងប្រជាពលរដ្ឋ និងមេភូមិទាំង៣ភូមិ បានសម្តែងក្តីត្រេកអរ និងដឹងគុណចំពោះថ្នាក់ដឹកនាំគ្រប់ជាន់ថ្នាក់ដែលតែងតែគិតគូអភិវឌ្ឍក្នុងមូលដ្ឋានរបស់ពួកគាត់ និងចាត់ទុកសមិទ្ឋិផលផ្សេងៗ និងផ្លូវបេតុងមួយខ្មែនៅពេលនេះថាពិតជាបានបំពេញតាមសេចក្តីត្រូវការ និងសម្រួលដល់ការធ្វើដំណើររបស់ពួកគាត់ ដែលជាគុណបំណាច់មិនអាចកាត់ថ្លៃបាន ។
ព័ត៌មានជាតិ ថ្មីៗ
បើតាមលោកស្រី ម៉ននី រង្សី អភិបាលនៃគណៈអភិបាលស្រុកក្រឡាញ់ បានឲ្យដឹងថា បច្ចុប្បន្នឃុំក្រឡាញ់មានផ្លូវបេតុងចំនួន ២ខ្សែរួចមកហើយ ដោយមួយខ្សែប្រវែង២០៥ម ជាមូលនិធិរបស់ស្រុក និងមួយខ្សែទៀតកំពុងចាក់បេតុងនេះប្រវែងជាង៦១៥ម៉ែត្រ ហើយសម្រាប់ផ្លូវមួយខ្សែនេះ ពីមុនគឺពិបាកធ្វើដំណើរណាស់ ហើយក្នុងនោះដែរសម្រាប់ឆ្នាំ២០២០ខាងមុខ អាជ្ញាធរឃុំ និងស្រុក ក៏មានគម្រោងនឹងចាង់បេតុង និងផ្លូវដីក្រហមនៅភូមិអូរក្រឡាញ់ មានប្រវែង៥០០ម ដោយប្រើប្រាស់គម្រោងមូលនិធិរបស់ឃុំ ។
លោកស្រី អភិបាលស្រុក បន្តថា ចំពោះសមិទ្ធផលនៃផ្លូវមួយខ្សែដែលបានបើកការដ្ឋានសាងសង់នាពេលនេះ ពិតជាបានរួមចំណែកយ៉ាងសំខាន់ក្នុងការកាត់បន្ថយការលំបាករបស់ប្រជាពលរដ្ឋក្នុងការធ្វើដំណើរនិងដើរតួនាទីយ៉ាងសំខាន់ក្នុងកិច្ចការងារសន្តិសុខ សណ្តាប់ធ្នាប់សាធារណៈ និងសុខុមាលភាពសង្គមព្រមទាំងជួយលើកកំពស់ជីវភាព និងកាត់បន្ថយភាពក្រីក្ររបស់ប្រជាពលរដ្ឋក្នុងមូលដ្ឋានបានមួយកម្រិតផងដែរ ។
មានប្រសាសន៍សំណេះសំណាលនាឱកាសនោះដែរ ឯកឧត្តមអ្នកឧកញ៉ា សៀង ណាំ បានមានប្រសាសន៍ថា ផ្លូវ គឺជាសរសៃឈាមនៃសេដ្ឋកិច្ចជាតិនិងសេដ្ឋកិច្ចគ្រួសារ ។ ហើយផ្លូវដែលបានដែលបានដំណើរការសាងសង់នាពេលនេះ គឺបានផ្តល់សារៈសំខាន់ណាស់សម្រាប់ បងប្អូនប្រជាពលរដ្ឋ ជួយបង្កលក្ខណៈងាយស្រួល ក្នុងការទំនាក់ទំនងគ្នា ងាយស្រួលដឹកកសិផលទៅកាន់ទៅផ្សារជួយសម្រួលក្នុងការធ្វើដំណើររបស់ប្រជាពលរដ្ឋ និងសិស្សានុសិស្សទៅកាន់សាលារៀន កាត់បន្ថយការលំបាកក្នុងការនាំអ្នកជំងឹទៅកាន់មណ្ឌលសុខភាពយប់ព្រលប់ជាដើមផង ។
ឯកឧត្តម មានប្រសាសន៍បន្តទៀតថា ក្រោមការនាំការដឹកនាំដ៏ឈ្លាសវៃ និងក្រោមគោលនយោបាយឈ្នះឈ្នះ របស់សម្តេចតេជោ ហ៊ុន សែន ជានាយករដ្ឋមន្ត្រី បានធ្វើឲ្យមាតុប្រទេសយើង ទទួលបានសុខសន្តិភាព ស្ថេរភាពពេញលេញ និងអភិវឌ្ឍរីកចម្រើនលើគ្រប់វិស័យមកដល់ថ្ងៃនេះ ហើយ ស្របពេលនឹងប្រទេសជាតិមានសុខសន្តិភាពនេះ ទើបធ្វើឲ្យជីវភាពរបស់ប្រជាពលរដ្ឋពីមួយថ្ងៃទៅមួយថ្ងៃ មានសេដ្ឋកិច្ចកាន់តែល្អប្រសើរឡើង ៕
អត្ថបទ និង រូបភាព៖ យូ វង្ស
កែសម្រួល៖ អ៊ុន ណារាជ្យ
