នាព្រឹកថ្ងៃទី២៩ ខែតុលា ឆ្នាំ២០២៤ លោក ឌី រ៉ាដូ អភិបាលរងខេត្តតំណាងឯកឧត្តម ប្រាក់ សោភ័ណ អភិបាល នៃគណៈអភិបាលខេត្តបានអញ្ជើញចូលរួមពិធីបើកព្រឹត្តិការណ៍ ស្នាមញញឹមនៃកម្ពុជា នៅតំបន់រមណីយដ្ឋានអង្គរ ក្រោមអធិបតីភាពលោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ តំណាងដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដោយមានវត្តមានអញ្ជើញចូលរួមពីសំណាក់ ឯកឧត្ដម លោកជំទាវ អ្នកឧកញ៉ា ឧកញ៉ា លោក លោកស្រី ជាថ្នាក់ដឹកនាំ មន្ត្រីរាជការ សិស្សានុសិស្ស និប្រជាពលរដ្ឋយ៉ាងច្រើនកុះករ។
ព្រឹត្តិការណ៍ស្នាមញញឹមកម្ពុជា នេះ ក្រោមប្រធានបទ “យើងរួមគ្នាដើម្បីវប្បធម៌ ទេសចរណ៍” មានរយៈពេលពីរថ្ងៃ ចាប់ពីថ្ងៃទី២៩ ដល់ថ្ងៃទី៣០ ខែតុលា ឆ្នាំ២០២៤ ដែលរៀបចំដោយក្រសួងវប្បធម៌ និងវិចិត្រសិល្បៈ រួមសហការជាមួយសមាគមសិល្បករខ្មែរ ក្រសួងទេសចរណ៍ អាជ្ញាធរជាតិអប្សរា សហភាពសហព័ន្ធយុវជនកម្ពុជា ខេត្តសៀមរាប ដើម្បីជំរុញបង្កើតព្រឹត្តិការណ៍សកម្មភាពសិល្បៈវប្បធម៌ ព្រមទាំងសកម្មភាពផ្សេងៗ ដើម្បីផ្សព្វផ្សាយ និងជំរុញទាក់ទាញ បង្កើនកំណើនភ្ញៀវទេសចរណ៍ជាតិ អន្តរជាតិ ជាពិសេសសម្រាប់គោលដៅទេសចរណ៍ខេត្តសៀមរាប អង្គរ។
ព័ត៌មានជាតិ ថ្មីៗ
ប្រធានសមាគមសិល្បករខ្មែរ លោកជំទាវអ្នកឧកញ៉ា ម៉ៅ ចំណាន គិតម៉េង បានមានប្រសាសន៍ថា ការរៀបចំព្រឹត្តិការណ៍ស្នាមញញឹមនៃកម្ពុជា ជាលើកទី២នេះ ធ្វើឡើងក្នុងគោលបំណងចំនួន២ ទី១ដើម្បីអបអរសាទរខួបទី២០ នៃការយាងឡើងគ្រងព្រះបរមរាជ្យសម្បត្តិ របស់អង្គព្រះករុណាជាអម្ចាស់ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា និងទី២ ធ្វើឡើងដើម្បីជាការរួមគ្នាជំរុញការផ្សព្វផ្សាយអំពីសិល្បៈ វប្បធម៌ អរិយធម៌ដ៏ផូរផង់របស់ខ្មែរ និងជាការបង្ហាញសក្តានុពលទេសចរណ៍ដ៏សម្បូរបែបរបស់កម្ពុជាទៅកាន់ពិភពលោក។
លោកជំទាវ អ្នកឧកញ៉ា បន្តលើកឡើងថា ជាមួយគ្នានេះការរៀបចំព្រឹត្តិការណ៍នេះ ក៏ដើម្បីរួមចំណែកដល់កិច្ចខិតខំប្រឹងប្រែងរបស់រាជរដ្ឋាភិបាលកម្ពុជា អាណត្តិទី៧ ដែលដឹកនាំដោយសម្តេចមហាបវរធិបតី ហ៊ុន ម៉ាណែត ពោលគឺរួមគ្នាសម្រេចឲ្យបាននូវគោលដៅយុទ្ធសាស្ត្របញ្ចកោណដំណាក់កាលទី១ និងឈានទៅសម្រេចឲ្យបាននូវចក្ខុវិស័យកម្ពុជានៅឆ្នាំ២០៣០ និងឆ្នាំ២០៥០។
មានប្រសាសន៍នៅក្នុងពិធីបើកព្រឹត្តិការណ៍ស្នាមញញឹមកម្ពុជា លើកទី២ នេះ លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានលើកឡើងថា ព្រឹត្តិការណ៍ដ៏អស្ចារ្យនេះ ជាការបង្ហាញរួមគ្នារបស់កូនខ្មែរគ្រប់ភាគី ដើម្បីផ្សព្វផ្សាយពីអ្វីដែលខ្មែរមាន។ លោកជំទាវបណ្ឌិតសភាចារ្យ ក៏បានជំរុញឲ្យកូនខ្មែរគ្រប់រូបត្រូវខិតខំបន្ថែមទៀតដើម្បីផ្សព្វផ្សាយអំពីអ្វីដែលខ្មែរយើងមាន ដើម្បីលុបបំបាត់នូវអ្វីដែលមិនល្អ ចំពោះវប្បធម៌ អរិយធម៌ដ៏ផូរផង់របស់យើង។
ជាមួយគ្នានេះ លោកជំទាវបណ្ឌិតសភារចារ្យរដ្ឋមន្ត្រី ក៏បានឲ្យដឹងដែរថា ព្រឹត្តិការណ៍ស្នាមញញឹមនៃកម្ពុជានេះ ក៏នឹងក្លាយជាព្រឹត្តិការណ៍ដ៏ធំប្រចាំឆ្នាំផងដែរ៕
អត្ថបទ និងរូបភាព÷ ជា ស្រស់
កែសម្រួល÷ ហាំ ម៉េងហួត
