ជើងហោះហើរថ្មីចំនួន២ មកពីប្រទេសថៃ គឺក្រុមហ៊ុនអាកាសចរណ៍ Thai Airways International និងក្រុមហ៊ុនអាកាសចរណ៍ Thai Air Asia បានចាប់ផ្ដើមបើកជើងហោះហើរដំបូងរបស់ខ្លួនឡើងវិញ បន្ទាប់ពីអាក់ខានប្រតិបត្ដិការមួយរយៈដោយសារវិបត្ដិជំងឺកូវីដ-១៩ ហើយធ្វើដំណើរមកកាន់អាកាសយានដ្ឋានអន្ដរជាតិសៀមរាបអង្គរ ដោយក្រុមហ៊ុនទាំងពីរនេះ នឹងបន្ដដឹកជញ្ជូនអ្នកដំណើរជាប្រចាំថ្ងៃ និងប្រចាំសប្ដាហ៍ ដោយចាប់ផ្ដើមពីថ្ងៃទី២៩ ខែតុលា ឆ្នាំ២០២៤តទៅ។
ឯកឧត្ដម ប៊ុន រដ្ឋា នាយកអាកាសយានដ្ឋានអន្ដរជាតិសៀមរាបអង្គរ កាលពីរសៀលថ្ងៃទី២៩ ខែតុលា ឆ្នាំ២០២៤នេះ បានឱ្យដឹងថា ជើងហោះហើរដំបូងរបស់ក្រុមហ៊ុនអាកាសចរណ៍ Thai Air Asia មានដឹកអ្នកដំណើរទៅមកជិត ១០០នាក់ បានបើកជើងហោះហើរថ្មី មកកាន់អាកាសយានដ្ឋានសៀមរាបអង្គរ ដោយហោះហើរ ៣ជើង ក្នុង១សប្ដាហ៍ ទាំងទៅទាំងមក ចាប់ពីថ្ងៃទី២៩ ខែតុលា ឆ្នាំ២០២៤នេះតទៅ ដោយមកពីព្រលានយន្ដហោះអន្ដរជាតិភូកេត ប្រទេសថៃ និងចេញពីអាកាសយានដ្ឋានអន្ដរជាតិសៀមរាបអង្គរ។
ព័ត៌មានជាតិ ថ្មីៗ
ឯកឧត្ដម ប៊ុន រដ្ឋា បានឱ្យដឹងទៀតថា ចំពោះជើងហោះហើររបស់ក្រុមហ៊ុនអាកាសចរណ៍ Thai Airways វិញក៏បានចាប់ផ្ដើមដំណើរការឡើងវិញរបស់ខ្លួនដែរ ដោយបានចាប់ផ្ដើមកាលពីថ្ងៃទី២៧ ខែតុលា ឆ្នាំ២០២៤ មានអ្នកដំណើរជិត១០០នាក់ ចេញពីព្រលានយន្ដហោះអន្ដរជាតិសុវណ្ណភូមិ មកកាន់អាកាសយានដ្ឋានអន្ដរជាតិសៀមរាបអង្គរ និងហោះហើរចេញពីអាកាសយានដ្ឋានសៀមរាបអង្គរ មានអ្នកដំណើរជាង១០០នាក់ ដោយចេញពីទីក្រុងបាងកក មកកាន់អាកាសយានដ្ឋានអន្តរជាតិសៀមរាបអង្គរ និងបន្តដំណើរហោះហើររបស់ខ្លួនជាប្រចាំថ្ងៃ ដោយក្នុងមួយថ្ងៃពីរជើងទាំងចេញ និងចូល។
ឯកឧត្ដមបញ្ជាក់ថា បច្ចុប្បន្ននេះមានអ្នកដំណើរឆ្លងកាត់កាត់អាកាសយានដ្ឋានអន្ដរជាតិសៀមរាបអង្គរ ប្រមាណ៤.០០០នាក់ក្នុងមួយថ្ងៃ។ ហើយនៅចុងឆ្នាំ២០២៤ និងដើមឆ្នាំ២០២៥ មានជើងហោះហើរថ្មីៗជាច្រើនទៀត បានធ្វើកិច្ចព្រមព្រៀងមកកាន់អាកាសយានដ្ឋានអន្ដរជាតិសៀមរាបអង្គរ។
សូមបញ្ជាក់ថា នៅក្នុងរយៈពេល១០ខែ ឆ្នាំ២០២៤នេះ អាកាសយានដ្ឋានអន្ដរជាតិសៀមរាបអង្គរ មានជើងហោះហើរកើនឡើងប្រហែលជាង ២០ភាគរយ បើធៀបរយៈពេលដូចគ្នានៅឆ្នាំ២០២៣ ខណៈដែលអ្នកដំណើរតាមជើងយន្ដហោះកើនឡើងជាង៣០ភាគរយ បើប្រៀបធៀបរយៈពេលដូចគ្នានៅខែតុលា ឆ្នាំ២០២៣។ ដោយឡែក សម្រាប់ខែតុលា ឆ្នាំ២០២៤ ជើងហោះហើរនៅអាកាសយានដ្ឋានអន្ដរជាតិសៀមរាបអង្គរ មានការកើនប្រហែល៩ភាគរយ ធៀបនឹងខែ តុលា ឆ្នាំ២០២៣។
បើតាមរបាយការណ៍រយៈពេល ៩ខែ ឆ្នាំ២០២៤ ស្ថានភាពដឹកជញ្ជូនតាមផ្លូវអាកាសនៅអាកាសយានដ្ឋានអន្តរជាតិសៀមរាបអង្គរ មានជើងហោះហើរចេញចូលចំនួន ១០.៩៨៩ជើង មានការកើនឡើងប្រមាណ២៤ភាគរយ បើធៀបរយៈពេលទៅនឹងរយៈពេលដូចគ្នាកាលពីឆ្នាំ២០២៣ អ្នកដំណើរចេញចូលមានចំនួនចំនួន ៩៧៤.២០៣នាក់ មានការកើនឡើងប្រមាណ៣១ភាគរយ បើធៀបរយៈពេលទៅនឹងរយៈពេលដូចគ្នាឆ្នាំ២០២៣ ទំនិញតាមផ្លូវអាកាសចេញចូលមានចំនួនជាង ៧៦តោន ថយចុះប្រមាណ ៤៦ភាគរយ បើធៀបរយៈពេលទៅនឹងរយៈពេលដូចគ្នាកាលពីឆ្នាំ២០២៣៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
