សម្រាប់លទ្ធផលនៃការប្រឡងសញ្ញាបត្រមធ្យមសិក្សាទុតិយភូមិ ឆ្នាំ២០២៤នេះ ខេត្តសៀមរាប ទទួលបានចំណាត់ថ្នាក់ទី២ ដែលមានបេក្ខជនប្រឡងជាប់បាននិទ្ទេស A ចំនួន ២២១នាក់ តាមពីក្រោយរាជធានីភ្នំពេញ ដែលមានរហូត ៦៩០នាក់។
យោងតាមលទ្ធផលនៃការប្រឡងសញ្ញាបត្រមធ្យមសិក្សាទុតិយភូមិ ដែលចេញដោយក្រសួងអប់រំ យុវជន និងកីឡា នៅព្រឹកថ្ងៃទី៣១ ខែតុលា ឆ្នាំ២០២៤នេះ សម្រាប់ខេត្តសៀមរាប មានបេក្ខជនប្រឡងជាប់ចំនួន ៩.១២៥នាក់ ស្រី៥.៥០៤នាក់។ ក្នុងនោះសម្រាប់ និទ្ទេស A មានចំនួន២២១នាក់, និទ្ទេស B ចំនួន៨៦៤នាក់, និទ្ទេស C ចំនួន២០៧១នាក់, និទ្ទេស D មានចំនួន៣.២៩៨នាក់ និង និទ្ទេស E មានចំនួន២.៦៧១នាក់។
គួរឱ្យដឹងថា ចំនួនបេក្ខជនដែលបានដាក់ពាក្យប្រឡងសញ្ញាបត្រមធ្យមសិក្សាទុតិយភូមិនៅខេត្តសៀមរាប សម្រាប់ឆ្នាំ២០២៤នេះ មានចំនួនតិចជាងឆ្នាំ២០២៣ ប៉ុន្តែលទ្ធផលបេក្ខជនដែលការប្រឡងជាប់មានចំនួនកើនឡើងជាងឆ្នាំ២០២៣ ដែលមានចំនួនត្រឹមតែ ៨.៦៣៣នាក់ ខណៈបេក្ខជនទទួលបាននិទេ្ទស A មានចំនួន១៨៨នាក់។
ព័ត៌មានជាតិ ថ្មីៗ
ជាមួយនឹងលទ្ធផលនៃការប្រឡងនេះដែរ សម្ដេចធិបតី ហ៊ុន ម៉ាណែត នាយករដ្ឋមន្ត្រី កាលពីថ្ងៃទី៣០ ខែតុលា ឆ្នាំ២០២៤នេះ បានបង្ហាញការអបអរសាទរចំពោះប្អូនៗបេក្ខជនដែលបានប្រឡងជាប់ និងទទួលបានលទ្ធផលល្អប្រសើរ ក្នុងការប្រឡងនេះ។ ក្នុងនោះបេក្ខជនដែលទទួលបានលទ្ធផលមិនគាប់ប្រសើរ សូមកុំបាក់ទឹកចិត្ត ហើយត្រូវខិតខំប្រឹងប្រែងរៀនសូត្របន្ថែមទៀត ដើម្បីប្រែក្លាយលទ្ធផលឱ្យបានគាប់ប្រសើរក្នុងការប្រឡងឆ្នាំក្រោយ ឬអាចចាប់យកឱកាសក្នុងការសិក្សាជំនាញវិជ្ជាជីវៈ ឬកម្រិតនៃការសិក្សាបន្ទាប់ ដើម្បីបន្តអភិវឌ្ឍចំណេះដឹង និងជំនាញ សម្រាប់ចាប់យកអាជីពច្បាស់លាស់ ដើម្បីកសាងអនាគតដ៏ភ្លឺស្វាង៕
អត្ថបទ៖ លោក អ៊ុន ណារាជ្យ
