ដើម្បីអបអរសាទរនៃថ្ងៃបើកបវេសនកាលឆ្នាំសិក្សាថ្មី ២០២៤-២០២៥ លោកគ្រូអ្នកគ្រូ និងសិស្សានុសិស្សនៃសាលាបឋមសិក្សាវត្តរាជបូណ៌ នៅថ្ងៃទី០១ ខែវិច្ឆិកា ឆ្នាំ២០២៤នេះ បានរៀបចំធ្វើព្យុហយាត្រា ដង្ហែតាមបណ្ដាផ្លូវមួយចំនួននៅក្នុងក្រុងសៀមរាប។
លោក អន គុណរ័ត្ន នាយកសាលាបឋមសិក្សាវត្តរាជបូណ៌ បានឱ្យដឹងថា សម្រាប់ឆ្នាំសិក្សាថ្មី ២០២៤-២០២៥ មានសិស្សសរុប ៥.៨០០នាក់ ស្រី ២.៨៤៧នាក់ មានចំនួនកើនឡើងធៀបនឹងឆ្នាំ២០២៣។ យ៉ាងណាចំនួនកើនឡើងនេះ នៅតាមថ្នាក់រៀនចំនួនសិស្សច្រើននាក់ ដែលខុសទៅនឹងច្បាប់គរុកោសល្យ ដែលធ្វើឱ្យជួបនូវហានីភ័យទៀតផង។
តាមសារលិខិតសម្តេចធិបតី ហ៊ុន ម៉ាណែត នាយករដ្ឋមន្ត្រី ជូនដល់សិស្សានុសិស្សក្នុងឱកាសបើកបវេសនកាលឆ្នាំសិក្សាថ្មីនេះ ដែលអានដោយលោកស្រី ម៉ាត់ អាហ្សីម៉ាស់ អភិបាលរងក្រុងសៀមរាប មានខ្លឹមសារថា ថ្ងៃនេះគ្រឹះស្ថានសិក្សាសាធារណៈទូទាំងប្រទេស បានរៀបចំពិធីបើកបវេសនកាលឆ្នាំសិក្សាថ្មី ២០២៤-២០២៥ ដែលជាថ្ងៃផ្ដើមសិក្សាដំបូងរបស់កុមារតូចៗ និងជាថ្ងៃចូលរៀនក្នុងឆ្នាំសិក្សាថ្មីរបស់ប្អូនៗសិស្សានុសិស្សគ្រប់កម្រិតថ្នាក់។
លោកស្រីបន្តថា រាជរដ្ឋាភិបាលកម្ពុជា នីតិកាលទី៧ បានអនុវត្តអាទិភាពគោលនយោបាយសំខាន់ៗ ពាក់ព័ន្ធនឹងវិស័យអប់រំ ដូចមានក្នុងបញ្ចកោណទី១ នៃយុទ្ធសាស្ត្របញ្ចកោណដំណាក់កាលទី១ ផ្តោតលើ “ការពង្រឹងគុណភាពវិស័យ អប់រំ កីឡា វិទ្យាសាស្ត្រ និងបច្ចេកវិទ្យា” និងការដាក់ចេញនូវវិធានការគន្លឹះសម្រាប់ដំណោះស្រាយក្នុងនីតិកាលនេះ ក្នុងគោលដៅលើកកម្ពស់គុណភាពអប់រំ ដោយផ្តោតលើការពង្រឹងគុណភាពសាលារៀនរដ្ឋ ចាប់ពីថ្នាក់មត្តេយ្យសិក្សាដល់ថ្នាក់មធ្យមសិក្សា តាមការពង្រឹងកិច្ចការសំខាន់ៗ។
ក្នុងឱកាសនោះ លោកស្រីក៏បានក្រើនរំលឹកដល់សិស្សានុសិស្សទាំងអស់ ចូលកូនៗបើកសៀវភៅអាន ល្អជាងការបើកមើលទូរសព្ទ ព្រមទាំងជំរុញដល់មាតាបិតា អាណាព្យាបាលសិស្សចូលរួមអប់រំកូនៗរបស់ខ្លួននៅតាមផ្ទះ បន្ទាប់ពីលោកគ្រូអ្នកគ្រូនៅសាលារៀន ដែលជាកត្តាចាំបាច់បំផុត ក្នុងការបណ្តុះបណ្តាលធនធានមនុស្ស ប្រកបដោយគុណភាពខ្ពស់ទៅអនាគត៕
អត្ថបទ និងរូបថត៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
