នៅព្រឹកថ្ងៃទី០១ ខែវិច្ឆិកា ឆ្នាំ២០២៤នេះ អាជ្ញាធរក្រុងរុនតាឯកតេជោសែន បានរៀបចំពិធីបើកបវេសនកាលឆ្នាំសិក្សាថ្មី ២០២៤-២០២៥ នៅវិទ្យាល័យ ហ៊ុន សែន រុនតាឯក ក្រោមវត្តមាន លោកជំទាវ លី ច័ន្ទ្រលក្ស្មី អគ្គនាយិកា AGENT 21 GLOBAL និង លោក អុឹង សុភ័ណ អភិបាលក្រុងរុនតាឯក តេជោសែន ដោយមានការចូលរួមពីមន្ត្រីមន្ទីរអប់រំខេត្តសៀមរាប អាជ្ញាធរមូលដ្ឋាន លោកគ្រូអ្នកគ្រូ និងសិស្សានុសិស្សជាច្រើនរូប។
លោក សាប់ សាខា ប្រធានការិយាល័យប្រឡងនៃមន្ទីរអប់រំខេត្តសៀមរាប មានប្រសាសន៍ថា ពីមួយឆ្នាំទៅមួយឆ្នាំវិស័យអប់រំក្នុងខេត្តសៀមរាប មានការរីកចម្រើនគួរឱ្យកត់សម្គាល់។ ជាក់ស្ដែងលទ្ធផលនៃប្រឡងសញ្ញាបត្រមធ្យមសិក្សាទុតិយភូមិចំនួនបេក្ខជនដែលប្រជាប់មានការកើនឡើងជាបន្តបន្ទាប់ ហើយបេក្ខជនជាប់និទ្ទេស A ក៏មានការកើនឡើងជាលំដាប់។ ចំពោះក្រុងរុនតាឯកតេជោសែន សម្រាប់ការប្រឡងឆ្នាំ២០២៤នេះ ក៏មានបេក្ខជនទទួលបាននិទ្ទេស A ចំនួន៦នាក់ផងដែរ។
ព័ត៌មានជាតិ ថ្មីៗ
មានប្រសាសន៍ក្នុងឱកាសនោះ លោក អុឹង សុភ័ណ អភិបាលក្រុងរុនតាឯក តេជោសែន បានជំរុញ និងលើកទឹកចិត្តដល់ប្អូនៗសិស្សានុសិស្សទាំងអស់ ត្រូវខិតខំសិក្សារៀនសូត្រ យកគំរូតាមសិស្សច្បងយើងដែលទើបប្រឡងជាប់ និងទទួលបាននិទ្ទេស A កាលពីពេលថ្មីៗនេះ ព្រោះពួកគាត់ជាអ្នករស់នៅក្នុងមូលដ្ឋានជាមួយពួកយើងដែរ ដូច្នេះបើពួកគាត់អាចយកនិទ្ទេស A ជូនខ្លួនឯង ក្រុមគ្រួសារ ប្អូនៗក៏អាចមានឱកាសធ្វើបានដូចពួកគាត់ដែរ។ ជាក់ស្ដែងតាមរយៈការសិក្សា និងទទួលបានលទ្ធផលល្អនេះ សបញ្ជាក់ឱ្យយើងគ្រប់គ្នាឃើញយ៉ាងច្បាស់ថា ជីវភាពមិនមែនជាបញ្ហាសម្រាប់ការសិក្សា និងទទួលបានការអប់រំឡើយ។
លោកជំទាវ លី ច័ន្ទ្រលក្ស្មី អគ្គនាយិកា AGENT 21 GLOBAL បានលើកឡើងថាដើម្បីចូលចំណែកក្នុងការអភិវឌ្ឍន៍ក្រុងរុតឯកតេជោសែនទាំងការកសាងលំនៅឋាននិងការចូលរួមផ្នែកសង្គម ជាពិសេសវិស័យអប់រំ ដោយកន្លងមកក្រុមហ៊ុន បានសហការជាមួយនាយកសាលារុនតាឯក ក៏ដូចជាលោកអភិបាលក្រុងរុនតាឯកតេជោសែនដើម្បីបង្កើតកម្មវិធីល្អៗទាំងផ្នែកកីឡាអប់រំនិងសិល្បៈវប្បធម៌សំរាប់សិស្សានុសិស្សដើម្បីឲ្យពួកគេក្លាយជាសសរគ្រឹះ និងជាធនធានសម្រាប់ប្រទេសកម្ពុជាជាពិសេសសម្រាប់ក្រុងរុនតែឯកតេជោសែនផ្ទាល់។ក្នុងឱកាសនោះដែរ លោកជំទាវ ក៏បានប្រកាសផ្ដល់អាហារូបករណ៍រយៈពេល៥ឆ្នាំពេញ នៅសាកលវិទ្យាល័យភូមិន្ទវិចិត្រសិល្បៈ ផ្នែកមហាវិទ្យាល័យស្ថាបត្យកម្ម និងនគរោបនីយវិទ្យា និងឧបត្ថម្ភនូវកង់ចំនួន៦គ្រឿង ដល់សិស្សនិទ្ទេស A ទាំង៦នាក់ផងដែរ៕
អត្ថបទ និងរូបថត៖ លោក ហេង វន្នី
កែសម្រួល៖ លោក អ៊ុន ណារាជ្យ
