ក្រសួងសេដ្ឋកិច្ច និងហិរញ្ញវត្ថុ នៅថ្ងៃទី០៤ ខែវិច្ឆិកា ឆ្នាំ២០២៤នេះ បានរៀបចំវគ្គបណ្តុះបណ្តាលស្តីពី “ភាពជាអ្នកដឹកនាំក្នុងការគ្រប់គ្រងសេដ្ឋកិច្ចនិងហិរញ្ញវត្ថុសាធារណៈ៖ បទពិសោធប្រទេសចិន” ដែលវគ្គបណ្ដុះបណ្ដាលនេះមានរយៈពេលពីរថ្ងៃ ចាប់ពីថ្ងៃទី០៤-០៥ ខែវិច្ឆិកា ឆ្នាំ២០២៤ នៅខេត្តសៀមរាប ដែលមានសិក្ខាកាមជាថ្នាក់ដឹកនាំជាន់ខ្ពស់ចំនួន ៣០រូប មកក្រសួងស្ថាប័នពាក់ព័ន្ធ ក្នុងគោលដៅពង្រឹងពង្រីកសមត្ថភាព និងលើកកម្ពស់ការយល់ដឹងពាក់ព័ន្ធនឹងការគ្រប់គ្រងសេដ្ឋកិច្ច និងហិរញ្ញវត្ថុសាធារណៈ ដោយសហការជាមួយវិទ្យាស្ថានជាតិគណនេយ្យ និងវិទ្យាស្ថានហិរញ្ញវត្ថុ និងអភិវឌ្ឍអាស៊ី-ប៉ាស៊ីភិច នៃទីក្រុងសៀងហៃ ប្រទេសចិន។
ឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋលេខាធិការ និងជាប្រធានក្រុមការងារកសាងសមត្ថភាពនៃក្រសួងសេដ្ឋកិច្ច និងហិរញ្ញវត្ថុ មានប្រសាសន៍ថា ក្រោមចក្ខុវិស័យប្រកបដោយភាពជាអ្នកដឹកនាំដ៏ឈ្លាសវៃរបស់ប្រមុខដឹកនាំប្រទេសទាំងពីរ និងប្រជាជននៃប្រទេសទាំងពីរ កម្ពុជាចិន បានទទួលនូវអត្ថមនុញ្ញផល និងកាលានុវត្តដ៏ប្រសើរជាច្រើន ក្នុងការធ្វើធុរកិច្ច ពាណិជ្ជកម្ម ការប្រកបការងារ ការសិក្សាស្រាវជ្រាវ និងការធ្វើដំណើរកម្សាន្តជាលក្ខណៈបុគ្គល គ្រួសារ និងសហគមន៍។ ទំនាក់ទំនងមិត្តភាព និងកិច្ចសហប្រតិបត្តិការនេះ គឺជាកាលានុវត្តដល់ក្រសួងស្ថាប័នរបស់ប្រទេសទាំងពីរក្នុងការផ្លាស់ប្តូរចំណេះដឹង ជំនាញ និងបទពិសោធទៅវិញទៅមក តាមរយៈការផ្លាស់ប្តូរទស្សនកិច្ចសិក្សា ការផ្តល់អាហារូបកណ៍ និងការចែករំលែកព័ត៌មាន ដែលការណ៍ទាំងនោះ គឺជាគុណប្រយោជន៍ដល់ការអភិវឌ្ឍសមត្ថភាព ចំណេះដឹង និងការយល់ដឹងកាន់តែទូលំទូលាយ ប្រកបដោយជំនាញវិជ្ជាជីវៈ និងនវានុវត្តន៍។
ឯកឧត្តមបញ្ជាក់ថា វគ្គបណ្ដុះបណ្ដាលនៅពេលនេះ គឺជាកម្មវិធីសិក្សាពិសេស ក្នុងគោលបំណងចូលរួមចំណែកបង្កើនសមត្ថភាព និងគុណភាពមូលធនមនុស្ស លើភាពជាអ្នកដឹកនាំក្នុងការគ្រប់គ្រងសេដ្ឋកិច្ច និងហិរញ្ញវត្ថុសាធារណៈ។ ដោយហេតុថា ផ្អែកតាមបទពិសោធនៃប្រទេសអភិវឌ្ឍ ការអភិវឌ្ឍប្រទេសឱ្យរីកចម្រើន និងជឿនលឿនប្រកបដោយចីរភាព គឺត្រូវការជាចាំបាច់នូវការអភិវឌ្ឍមូលធនមនុស្ស។ ក្នុងន័យនេះ ចក្ខុវិស័យវែងឆ្ងាយរបស់ប្រមុខដឹកនាំកម្ពុជា ដោយមូលធនមនុស្សត្រូវបានរាជរដ្ឋាភិបាលចាត់ទុកជាអាទិភាពទី១ នៅក្នុងយុទ្ធសាស្ត្របញ្ចកោណ ដំណាក់កាលទី១ ក្នុងនីតិកាលទី៧ នៃរដ្ឋសភានេះ។
ឯកឧត្តមបន្តថា វគ្គបណ្តុះបណ្តាលនេះដែរ ពិតជាមានសារៈសំខាន់ និងឆ្លើយតបទៅនឹងតម្រូវការចាំបាច់របស់កម្ពុជា សម្រាប់ចូលរួមចំណែកក្នុងការអភិវឌ្ឍសមត្ថភាពមូលធនមនុស្ស ដើម្បីជំរុញនាវាកម្ពុជាឆ្ពោះទៅសម្រេចចក្ខុវិស័យឆ្នាំ២០៥០ ក្នុងការប្រែក្លាយទៅជាប្រទេសចំណូលខ្ពស់ តាមរយៈការផ្តល់ឱកាសដល់សិក្ខាកាម ដើម្បីសិក្សា និងស្វែងយល់ពីមេរៀន បទពិសោធ និងឧត្តមានុវត្តអន្តរជាតិ សំដៅពង្រឹងពង្រីកសមត្ថភាព ចំណេះដឹង និងលើកកម្ពស់ការយល់ដឹងបន្ថែមទៀត សម្រាប់បង្កើនផលិតភាព និងប្រសិទ្ធភាពនៃការអនុវត្តតួនាទី ភារកិច្ច ក្នុងការគ្រប់គ្រងសេដ្ឋកិច្ច និងហិរញ្ញវត្ថុសាធារណៈនៅកម្ពុជា ជាពិសេស សំដៅរួមចំណែកសម្រេចជោគជ័យ ក្នុងការអនុវត្តការកែទម្រង់ការគ្រប់គ្រងហិរញ្ញវត្ថុសាធារណៈ ដំណាក់កាលទី៤ ប្រកបដោយប្រសិទ្ធភាព និងចីរភាព៕
អត្ថបទ និងរូបថត៖ លោក យូ វង្ស
កែសម្រួល៖ លោក អ៊ុន ណារាជ្យ
